រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា កង់អគ្គិសនីជាច្រើនគ្រឿងត្រូវបានរងការខូចខាតដោយសារអណ្តាតភ្លើងឆាបឆេះនៅក្នុងផ្ទះល្វែងជាន់ទីមួយទាំងកណ្តាលរាត្រី និងគ្រឿងសម្ភារ:មួយចំនួនផ្សេងទៀតក៏ត្រូវភ្លើងឆាបឆេះផងដែរ តែសំណាងល្អករណីឆាបឆេះនេះដែរ មិនបង្កឱ្យមានគ្រោះថ្នាក់ដល់ជីវិតមនុស្សឡើយ។
សេចក្តីរាយការណ៍បន្តថា ហេតុការណ៍អគ្គិភ័យខាងលើនេះ បានកើតឡើងកាលពីវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី១៦ ខែមករា ឆ្នាំ២០២២ នៅតាមបណ្តោយផ្លូវ១១១ ស្ថិតនៅក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ។
យោងតាមប្រភពព័ត៌មានពីបុរសម្នាក់ជាបុគ្គលិកនៅក្នុងហាង បានឲ្យដឹងថា នៅមុនពេលកើតហេតុ នៅជាន់ទី១ នៃទីតាំងកើតហេតុខាងលើ ស្រាប់តែមានផ្កាភ្លើងឆ្លងចរន្តចេញពី ឌីសង់ទ័រ បណ្តាលឱ្យក្លាយជាអណ្តាតភ្លើងឆាបឆេះទៅដល់កង់អាគុយ ដែលស្តុកទុកក្នុងឃ្លាំងខាងលើតែម្តង។ គ្រាន់តែភ្លើងឆេះភ្លាម ប្រជាពលរដ្ឋបានធ្វើការទាក់ទងទៅកាន់សមត្ថកិច្ចមូលដ្ឋាន ប៉ុន្តែដោយសារស្ថានភាពភ្លើងពិបាកគ្រប់គ្រង សមត្ថកិច្ចមូលដ្ឋានក៏បានទាក់ទងបន្តទៅកាន់ការិយាល័យបង្ការពន្លត់អគ្គិភ័យ ដើម្បីសុំជំនួយធ្វើការអន្តរាគមន៍បាញ់ទឹកពន្លត់ឱ្យយទាន់ពេល។
គួរបញ្ជាក់ផងដែរថា នៅក្នុងហេតុការណ៍អគ្គិភ័យខាងលើនេះ មិនបណ្តាលឲ្យនរណាម្នាក់រងរបួសនោះទេ គ្រាន់តែខូចខាតគ្រឿងសម្ភារ:មួយចំនួន និងកង់អាគុយតែប៉ុណ្ណោះ។ ហើយក្រោយពេលកើតហេតុ កម្លាំងជំនាញរបស់ការិយាល័យនគរបាលបង្ការ និងពន្ល់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានប្រើប្រាស់រថយន្តពន្លត់អគ្គិភ័យជាច្រើនគ្រឿង និងបានបាញ់ទឹកអស់ចំនួន២គ្រឿង ទើបធ្វើឲ្យរលត់ទៅវិញនៅវេលាម៉ោង១២និង៥០នាទីយប់ថ្ងៃដដែល៕
ចែករំលែកព័តមាននេះ