រាជធានីភ្នំពេញ ៖ ឯកឧត្តម ប្រាជ ចន្ទ តំណាងរាស្ត្រខេត្តត្បូងឃ្មុំ និងជាប្រធានគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា…
រាជធានីភ្នំពេញ ៖ ឯកឧត្តម ប្រាជ ចន្ទ តំណាងរាស្ត្រខេត្តត្បូងឃ្មុំ និងជាប្រធានគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា និងព្រឹទ្ធសភា នៃរដ្ឋសភា ត្រូវបានគណបក្សប្រជាជនកម្ពុជាសម្រេចជ្រើសរើស ជាប្រធានគណៈកម្មាធិការជាតិរៀបចំការបោះឆ្នោត(គ.ជ.ប) ជំនួសឯកឧត្តម ស៊ិក ប៊ុនហុក ដែលបានសុំលាឈប់ពីតំណែងដោយសារតែកត្តាសុខភាព ។
ឯកឧត្តម ឡេង ប៉េងឡុង អ្នកនាំពាក្យរដ្ឋសភា បានថ្លែងប្រាប់សារព័ត៌មានកោះសន្តិភាពថា រដ្ឋសភា បានទទួលលិខិតពីគណបក្សប្រជាជនកម្ពុជានៅព្រឹកថ្ងៃពុធ ទី ១៦ ខែមិថុនា ឆ្នាំ២០២១ ស្តីពីការសម្រេចយកឯកឧត្តម ប្រាជ ចន្ទ ជាប្រធានគ.ជ.ប ថ្មី ។
«រដ្ឋសភាបានទទួលពីគណបក្សប្រជាជនកម្ពុជាព្រឹកមិញនេះ ដែលសម្រេចជ្រើសយក ឯកឧត្តម ប្រាជ ចន្ទ ជាប្រធានគ.ជ.ប ថ្មី ដូច្នេះរដ្ឋសភានឹងប្រជុំបោះឆ្នោតផ្តល់សេចក្តីទុកចិត្តនៅសប្តាហ៍ក្រោយ» ។ នេះជាបញ្ជាក់របស់អ្នកនាំពាក្យរដ្ឋសភាកម្ពុជា។
ឯកឧត្តម ប្រាជ្ញ ចន្ទ នៅរសៀលថ្ងៃទី ១៦ ខែមិថុនា នេះបានថ្លែងប្រាប់កោះសន្តិភាពថាលោកមិនទាន់មានអ្វីត្រូវនិយាយលម្អិតអំពីតំណែងជាប្រធានគ.ជ.ប ថ្មីនោះទេ ព្រោះរង់ចាំគ្រប់យ៉ាងដំណើរការផ្លូវការសិន ព្រោះនៅរង់ចាំការបោះឆ្នោតផ្តល់សេចក្តីទុកចិត្តនៅសម័យប្រជុំពេញអង្គមួយវគ្គទៀត ។
សូមបញ្ជាក់ថាឯកឧត្តម ប្រាជ្ញ ចន្ទ សព្វថ្ងៃគឺជាតំណាងរាស្ត្រគណបក្សប្រជាជនកម្ពុជាប្រចាំមណ្ឌលខេត្តត្បូងឃ្មុំ និងជាប្រធានគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា និងព្រឹទ្ធសភា នៃរដ្ឋសភា។ ឯកឧត្តម ធ្លាប់កាន់តំណែងជាអភិបាលខេត្តបាត់ដំបងចាប់ពីឆ្នាំ ២០០១ ដល់ឆ្នាំ ២០១៤ ។
ខែមករា ២០០១៤ លោកត្រូវបានតែងតាំង ជាអភិបាលខេត្តត្បូងឃ្មុំ ពេលរាជរដ្ឋាភិបាលទើប បង្កើតខេត្តត្បូងឃ្មុំៗថ្មី។ រហូតដល់ខែ ខែមីនា ឆ្នាំ២០១៩ ឯកឧត្តម ប្រាជ្ញ ចន្ទ ត្រូវបានគណៈកម្មាធិការអចិន្ត្រៃយ៍រដ្ឋសភាដើម្បីពិភាក្សានិងអនុម័តយល់ព្រមជ្រើសតាំងឯកឧត្តម ប្រាជ្ញ ច័ន្ទ ជាសមាជិកគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា និងព្រឹទ្ធសភា នៃរដ្ឋសភា ។
សូមបញ្ជាក់ថា រដ្ឋធម្មនុញ្ញកម្ពុជា ត្រង់ចំណុចសមាសភាពស្ថាប័នគ.ជ.ប បានចែងគជប មានសមាសភាពសរុប ៩ រូប ក្នុងនោះសមាសភាព៤រូប ត្រូវជ្រើសរើសដោយគណបក្សដឹកនាំរដ្ឋាភិបាល ៤រូបទៀតត្រូវជ្រើសរើសដោយគណបក្សមានអាសនៈក្នុងរដ្ឋសភា ដែលមិនចូលរួមក្នុងរដ្ឋាភិបាល និងមួយរូបទៀតជ្រើសរើសដោយមានការព្រមព្រៀងគ្នារវាងគណបក្សទាំងអស់ដែលមានអាសនៈក្នុងរដ្ឋសភា ដែលជារួមគឺជារូបមន្ត (៤-៤-១) ដែលកាលនោះត្រូវបានព្រមព្រៀងគ្នារវាងគណបក្សប្រជាជនកម្ពុជានិងគណបក្សសង្គ្រោះជាតិ ក្រោយការចរចារាប់ខែលើការធ្វើវិសោតនកម្មរដ្ឋធម្មនុញ្ញ ស្តីពី គ.ជ.ប ៕
ចែករំលែកព័តមាននេះ