រាជធានីភ្នំពេញ ៖ មនុស្សជំនិត លោក កឹម សុខា បានទម្លាយពីគោលនយោបាយអតីតបក្សប្រឆាំងមិនបង្ហាញពីសច្ចភាព ដោយទាមទារឲ្យមានការស៊ើបអង្កេតករណីបាត់លុយមូលនិធិបង្កើតទូរទស្សន៍ព្រះអាទិត្យជាង៧០ម៉ឺន ដោយសារអំពើរពុករលួយ ។
លោក មុត ចន្ថា បានសរសេរលើបណ្តាញសង្គម នៅថ្ងៃទី១ មិថុនា ឆ្នាំ២០២១យ៉ាងដូច្នេះថា« គោលនយោបាយរបស់អតីតបក្សប្រឆាំងប្រឆាំងអំពើពុករលួយពិត ឬបន្លំភ្នែក ។ គណបក្សសង្គ្រោះជាតិដែលត្រូវបានរំលាយបានចែងពីគោលនយោបាយប្រឆាំងអំពើពុករលួយយ៉ាងស្រួចស្រាល់ ។
អតីតមេដឹកនាំប្រឆាំង ជាពិសេសលោក សម រង្ស៉ី បានយកបញ្ហាអំពើពុករលួយជាប្រធានបទយ៉ាងសំខាន់ ដើម្បីរិះគន់ និងវាយប្រហារទៅអ្នកដឹកនាំប្រទេសយ៉ាងខ្លាំងក្លា ដែលដណ្តើមបានការគាំទ្រពីប្រជាពលរដ្ឋ និងសហគមន៍អន្តរជាតិដែលខិតខំជម្រុញឱ្យលុបបំបាត់អំពើពុករលួយ និងលើកកម្ពស់អភិបាលកិច្ចល្អ» ។
លោកថា«យើងគាំទ្រចំពោះការប្រយុទ្ធប្រឆាំងនឹងអំពើពុករលួយ និងលើកកម្ពស់សុចរិតភាព និងអភិបាលកិច្ចល្អក្នុងសង្គម ។ ប៉ុន្តែគោលនយោបាយប្រឆាំងអំពើពុករលួយនេះ ត្រូវតែអនុវត្តឱ្យមានប្រសិទ្ធភាព ដោយមិនគ្រាន់តែត្រូវបានប្រើប្រាស់ជាសារនយោបាយសម្រាប់រិះគន់ និងវាយប្រហារទៅលើអ្នកដឹកប្រទេសប៉ុណ្ណោះទេ ផ្ទុយទៅវិញអ្នកនយោបាយប្រឆាំង និងអតីតមេដឹកនាំប្រឆាំងត្រូវតែអនុវត្តខ្លួនឯង និងត្រូវធានាឱ្យមានភាពស្អាតស្អំ សុចរិតភាព និងអភិបាលកិច្ចល្អក្នុងក្របខណ្ឌផ្ទៃក្នុងបក្ស និងសម្រាប់ប្រតិបត្តិការជាប្រចាំ» ។
ជាមួយគ្នានោះ លោកក៏បានលើកឡើងរឿងមូលនិធិបង្កើតទូរទស្សន៍កាលពីមុនយ៉ាងដូច្នេះថា រឿងមូលនិធិទូរទស្សន៍ព្រះអាទិត្យ ឬ “SUN TV” ជាង 700,000ដុល្លារ ដែលត្រូវបានប្រមូលបាន នៅខែកញ្ញា ឆ្នាំ២០១៥ ត្រូវបានគេដកចេញពីគណនេយ្យធនាគារ នៅក្រោយលោក កឹម សុខា ប្រធានគណបក្សសង្គ្រោះជាតិត្រូវបានចាប់ខ្លួន និងនៅមុនគណបក្សសង្គ្រោះជាតិត្រូវបានរំលាយ នេះបើតាមប្រភពព័ត៌មានទទួលបាន។
យោងតាមនីតិវិធីគ្រប់គ្រងហិរញ្ញវត្ថុផ្ទៃក្នុងបក្ស មានមន្ត្រីជាន់ខ្ពស់ពីររូប គឺលោក យឹម សុវណ្ណ ប្រធានគណៈកម្មាធិការប្រតិបត្តិ និងលោក គី វណ្ណដារ៉ា អគ្គហេរញ្ញឹកបក្សដែលមានសិទ្ធិដកប្រាក់បញ្ញើពីកុងធនាគារ ។ គិតមកដល់ពេលនេះ អស់រយៈពេលជិត០៦ឆ្នាំហើយ ដែលបុគ្គលទាំងពីរនេះមិនបានបញ្ជាក់អំពីបច្ចុប្បន្នភាពមូលនិធិទូរទស្សន៍ព្រះអាទិត្យឡើយ ដែលបង្កើតឱ្យមានមន្ទិលសង្ស័យយ៉ាងខ្លាំង ថាតើមូលនិធិនេះត្រូវបានគេយកទៅណា និងអ្នកណាកំពុងគ្រប់គ្រងវា ។
លោកបន្តថា យោងតាមការគណនាអត្រាការប្រាក់របស់ជំនាញធនាគារមួយ គឺបញ្ញើធនាគារគិតអត្រាការប្រាក់តាមរយៈពេលខ្លី និងវែង ។ បើសិនបញ្ញើប្រាក់រយៈពេលយូរ (០៣ឆ្នាំ) អត្រាការប្រាក់លើប្រាក់បញ្ញើ គឺ ៥,៥០% ។ សម្រាប់បញ្ញើប្រាក់ចំនួនជាង 700,000ដុល្លារ នឹងទទួលបានការប្រាក់ចំនួន 38,500ដុល្លារ/ឆ្នាំ ស្មើនឹង 231,000ដុលា/០៦ឆ្នាំ (ដោយមិនទាន់ដកពន្ធលើអត្រាការប្រាក់ ៦%) ដូច្នេះបូកទាំងដើមទាំងការប្រាក់ គឺ 931,000$។
មនុស្សជំនិតលោកកឹម សុខាក៏បានលើកឡើងថា ដើម្បីភាពស្អាតស្អំ ខ្ញុំសូមស្នើដល់អតីតសមាជិកគណៈកម្មាធិការអចិន្ត្រៃយ៍នៃគណបក្សសង្គ្រោះជាតិដែលត្រូវបានរំលាយទាំងអស់ ជាពិសេសកូតាមកពីគណបក្សសិទ្ធិមនុស្ស បញ្ជាក់ប្រាប់ប្រជាពលរដ្ឋខ្មែរដែលជាម្ចាស់មូលនិធិ ឱ្យបានដឹងពីឋានៈបច្ចុប្បន្ននៃមូលនិធិទូរទស្សន៍ព្រះអាទិត្យ ៖ ១-លោក ប៉ុល ហំម ២-លោក យ៉ែម បុញ្ញឫទ្ធិ ៣-លោក ម៉ៅ មុន្នីវណ្ណ ៤-កញ្ញា កឹម មនោវិទ្យា ៥-លោក អ៊ូ ចន្ទរ័ត្ន ៦-លោក អ៊ូ ចន្ទរិទ្ធិ ៧-លោក ទួន យកដា ៨-លោក លឹម ប៊ុនស៉ីដារ៉េ ៩-លោក សួន សូ រីដា ១០-លោក តុ វ៉ាន់ចាន់ ។
លោកថាប្រទេសកម្ពុជាមានច្បាប់ប្រឆាំងអំពើពុករលួយ និងយន្តការខ្លះ ដើម្បីប្រយុទ្ធប្រឆាំង និងស៊ើបអង្កេតបទឧក្រិដ្ឋអំពើពុករលួយ ។ មន្ទីរពេទ្យគន្ធបុប្ផា និងមន្ទីរពេទ្យកុមារអង្គរ កំពុងត្រូវការជំនួយ ដើម្បីសង្គ្រោះកុមារខ្មែរដែលមានជំងឺជាការល្អ ៕
ចែករំលែកព័តមាននេះ