រាជធានីភ្នំពេញ ៖ នៅព្រឹកថ្ងៃចន្ទទី២០ សីហា នេះ គណៈកម្មាធិការជាតិអូឡាំពិកកម្ពុជា នឹងធ្វើសន្និសីទសារព័ត៌មានមួយបង្ហាញពីលទ្ធផលជុំវិញការបញ្ជូនកីឡាករ កីឡាការិនី ឱ្យទៅចូលរួមក្នុងព្រឹត្តិការណ៍អូឡាំពិកនៅទីក្រុងឡុង ប្រទេសអង់គ្លេស ដែលទើបបញ្ចប់ទៅនាពេល ថ្មីៗនេះ ។ ទោះជាលទ្ធផលផ្លូវការកម្ពុជាមិនបានទទួលមេដាយមាស ប្រាក់ និងសំរឹទ្ធិ ដូចក្នុងការប្រកួតស៊ីហ្គេមកន្លងមក ប៉ុន្តែមន្ត្រីកម្ពុជាអះអាងថា កីឡាករកីឡាការិនីកម្ពុជាបានទទួលស្នាដៃល្អពីការប្រកួតនេះ។
កញ្ញា ហែមថុន វិទិនី ជាកីឡាការិនី ផ្នែកហែលទឹកបានប្រាប់កោះសន្តិភាពដូចការបញ្ជាក់របស់មន្ត្រីថ្នាក់ដឹកនាំរបស់គណៈកម្មាធិការជាតិអូឡាំពិកកម្ពុជាដែរថា កីឡាករ កីឡាការិនី ដែលចេញទៅប្រកួតក្នុងព្រឹត្តិការណ៍អូឡាំពិកនៅទីក្រុងឡុង មានចំនួន៦រូប ស្មើនឹង៦វិញ្ញាសា ។ កីឡាករ កីឡាការិនី ទាំងនោះរួមមាន រូបនាង ដែលប្រកួតហែលទឹកសេរីក្នុងរយៈចម្ងាយ៥០ម៉ែត្រនារី លោកហែមថុន ពន្លឺ ហែលទឹកសេរីក្នុងរយៈចម្ងាយ៥០ម៉ែត្របុរស លោកជាង សាម៉ន រត់ប្រណាំង៨០០ម៉ែត្របុរស កញ្ញាចាន់ សីហា រត់ចម្ងាយ២០០ម៉ែត្រនារី លោកឃឹម វឌ្ឍនៈមុន្នី ប្រកួតផ្នែកយូដូបុរស និងកញ្ញាសន ដាវីន ប្រកួតលើវិញ្ញាសាតេក្វាន់ដូនារី ។ កីឡាករ កីឡាការិនី ទាំង៦រូបនេះ បានទៅកាន់ទីក្រុងឡុង កាលពីថ្ងៃទី២៣ កក្កដា និងត្រឡប់មកដល់ប្រទេសកម្ពុជាវិញនៅល្ងាចថ្ងៃទី១៧ សីហា ។
កីឡាការិនីរូបនេះនិយាយថា ក្រៅពីវិញ្ញាសារត់ប្រណាំងរបស់កីឡាករជាង សាម៉ន និងកញ្ញាចាន់ សីហា ដែលមិនអាចបំបែកឯតទគ្គកម្មចាស់របស់ខ្លួននៅស៊ីហ្គេម កាលពីឆ្នាំ២០១១ គឺវិញ្ញាសាផ្សេងទៀត កីឡាករ កីឡាការិនីកម្ពុជា សុទ្ធតែធ្វើបានល្អ ។ ជាក់ស្តែងនៅក្នុងការប្រកួតអូឡាំពិកនៅទីក្រុងឡុងនេះនាងបានទទួលចំណាត់ថ្នាក់លេខ២ក្នុងក្រុមជម្រុះ ហើយប្រើតែរយៈពេល៣០,៤៤វិនាទីដែលល្អជាងកាលស៊ីហ្គេមនៅប្រទេសឥណ្ឌូណេស៊ី ដែលប្រើពេលដល់៣១,៤៥វិនាទី ។ ដោយឡែកកីឡាករ ហែមថុន ពន្លឺ វិញ ក៏បំបែកឯតទគ្គកម្មចាស់របស់ខ្លួនបានដែរ ដោយប្រើពេលតែ២៧,៥វិនាទី គឺតិចជាងកាលប្រកួតហែលទឹកនៅឥណ្ឌូណេស៊ីកាលពីឆ្នាំមុន ។
ដូចគ្នានេះដែរ កីឡាការិនីសន ដាវីន ម្ចាស់មេដាយប្រាក់តេក្វាន់ដូនៅស៊ីហ្គេមប្រទេសឥណ្ឌូណេស៊ី ថ្វីដ្បិតតែត្រូវធ្លាក់ក្រោមដៃម្ចាស់មេដាយមាសស៊ីហ្គេមមកពីម៉ិចស៊ីកូ ក្នុងព្រឹត្តិការណ៍ប្រកួតអូឡាំពិកនោះ ប៉ុន្តែនាងអាចធ្វើបានល្អជាងការប្រកួតកាលពីឆ្នាំមុនឆ្ងាយណាស់ ។ នាងចាញ់ពិន្ទុកីឡាការិនីម៉ិចស៊ីកូតែ៣ទល់នឹង២ គឺប្រផិតប្រផើយបំផុត ខណៈដែលការប្រកួតផ្នែកយូដូរបស់កីឡាករឃឹម វឌ្ឍនៈមុន្នី ក៏ទទួលបានលទ្ធផលល្អជាងការប្រកួតរបស់លោកនៅអន្តរជាតិលើកចុងក្រោយដូចគ្នា ។
តាមរយៈការបញ្ជាក់នេះ បើទោះជាកីឡាករកីឡាការិនីកម្ពុជាមិនទទួលបានជ័យជម្នះ ប៉ុន្តែក៏មានន័យថា លទ្ធផលដែលកម្ពុជាធ្វើបានជាផ្លែផ្កាវិជ្ជមានល្អប្រសើរជាងមុន ។ អ្វីដែលសំខាន់គឺបានធ្វើឱ្យពិភពលោក បានស្គាល់ទង់ជាតិខ្មែរ និងពីសក្តានុពលរបស់កីឡាកម្ពុជានៅលើឆាកអន្តរជាតិ ៕
ចែករំលែកព័តមាននេះ