ខេត្តស្វាយរៀង ៖ លោកយាយ ប៉ក់ យ៉េន អាយុ៨៤ឆ្នាំ ដែលវ័យចាស់ជរាទៅហើយនោះ ត្រូវចិញ្ចឹមប្អូនស្រីអាយុ៨២ឆ្នាំមានជំងឺប្រចាំកាយ និងកូនស្រីអាយុ៥២ឆ្នាំមានជំងឺសរសៃប្រសាទ ធ្វើឲ្យគាត់ជួបការលំបាកក្នុងជីវភាពប្រចាំថ្ងៃយ៉ាងខ្លាំង ក៏បានអំពាវនាវសុំឲ្យសប្បុរសជនមេត្តាជួយឧបត្ថម្ភម្ហូបអាហារដល់ពួកគាត់បានពិសារបានឆ្ងាញ់នៅជីវិតចុងក្រោយនេះដោយអនុគ្រោះ។
លោកយាយ ប៉ក់ យ៉េន អាយុ៨៤ឆ្នាំចាស់ជរា មានប្អូនស្រីឈ្មោះ ប៉ក់ យ៉េត អាយុ៨២ឆ្នាំចាស់ជរាផង មានជំងឺប្រចាំកាយផង និងកូនស្រីម្នាក់ឈ្មោះ ប៉ក់ រ៉ន អាយុ៥២ឆ្នាំ ក៏មានជំងឺសរសៃប្រសាទទៀត រស់នៅក្នុងភូមិព្រៃខ្លា ឃុំពោធិរាជ្យ ស្រុកស្វាយជ្រំ ខេត្តស្វាយរៀង។
បើតាមលោកយាយ ប៉ក់ យ៉េន បានប្រាប់អ្នកសារព័ត៌មានយើងថា គាត់រស់នៅ៣នាក់ប្អូនស្រី និងកូនស្រីដែលមានជំងឺសរសៃប្រសាទ គឺជួបការលំបាកក្នុងជីវភាពយ៉ាងខ្លាំង ហើយកាលពួកគាត់នៅពីក្មេង លោកយាយ និងប្អូនស្រីប្រកបមុខរបរដើរស៊ីឈ្នួលស្ទូង និងច្រូតឲ្យគេ ដោយគាត់គ្មានដីស្រែដូចគេនោះទេ ។
លោកយាយកំសត់បន្តថា រហូតដល់វ័យ៦០ឆ្នាំ រូបគាត់ និងប្អូនស្រីមានជំងឺប្រចាំកាយ ចំណែកកូនស្រីក៏មានជំងឺសរសៃប្រសាទទៀតធ្វើឲ្យជីវភាពកាន់តែដុនដាបនៅខែវស្សា ប្រកបមុខរបរដើរបេះបន្លែលក់ លុះនៅរដូវច្រូតកាត់ក៏ដើររើសគួស្រូវតាមវាលស្រែ ដើម្បីទុកកិនអង្ករហូប ហើយក្នុងរដូវវស្សា គឺខ្វះខាតម្ហូបអាហារ តែបានអាជ្ញាធរ និងព្រះសង្ឃផ្តល់អង្ករ និងទឹកត្រី ទឹកស៊ីអ៊ីវ គ្រាន់ហូបបណ្តោះអាសន្ន ក៏ប៉ុន្តែមិនបានរាល់ខែនោះទេ។
លោកយាយបន្តថា ដោយបញ្ហាសុខភាពមានជំងឺញឹកញាប់ពេក ធ្វើឲ្យខ្វះប្រាក់កាស់សម្រាប់ព្យាបាលជំងឺផង និងខ្វះស្បៀងផង ក៏ចេះតែក្រីក្រទៅៗ ។ ហើយរហូតមកដល់អាយុ៧៥ឆ្នាំនេះ គឺបេះបន្លែលក់ខ្លះ និងដើរសុំទាន សុំអង្ករប្រជាពលរដ្ឋក្នុងភូមិ និងអាជ្ញាធរឲ្យខ្លះ ព្រះសង្ឃឲ្យខ្លះ បានរស់រហូតមកពេលនេះ ក៏ប៉ុន្តែមិនដែលមានប្រាក់ទិញម្ហូបឆ្ងាញ់នោះទេ។
លោកយាយបន្តទៀតថា ចំណែកផ្ទះក៏ទ្រុឌទ្រោម អាជ្ញាធរ និងអ្នកជិតខាងបានរុសរើផ្ទះចាស់ចោល ហើយកាប់កូនឈើ និងឬស្សីសង់ផ្ទះឲ្យរស់នៅរហូតមក។ រីឯអាយុកាន់តែចាស់ ដើរសុំទានគេក៏លែងកើត ម្យ៉ាងជំងឺសរសៃប្រសាទកូនស្រីកាន់តែធ្ងន់ធ្ងរដើរលែងសូវចូលផ្ទះ ជូនកាលចេញពីផ្ទះបាត់៣ទៅ៤ថ្ងៃ លុះពេលអ្នកស្រុកគេឃើញ គេប្រាប់ក៏ទៅតាមយកមកផ្ទះវិញ។
លោកយាយបញ្ជាក់ទៀតថា ហើយនៅឆ្នាំ២០២០នេះ លោកយាយមានអាយុ៨៤ឆ្នាំហើយកាន់តែជរា មិនអាចដើរតាមរកកូនបានទៀតទេ ក៏ប៉ុន្តែពេលមានវិបត្តិកូវីដ-១៩ រាជរដ្ឋាភិបាលបានផ្តល់ប្រាក់ឧបត្ថម្ភប្រជាពលរដ្ឋក្រីក្រ អាជ្ញាធរបានផ្តល់ប្រាក់ឧបត្ថម្ភដល់គ្រួសារលោកយាយ រហូតមកដោយក្នុង១ខែ២០ម៉ឺនរៀលសម្រាប់ទិញអង្ករ និងម្ហូប ហើយគាត់ក៏ឈប់ដើរសុំទានគេបន្តទៀត ទោះបីជាយ៉ាងណាក៏ដោយ លោកយាយនៅតែមានការខ្វះខាត ចង់បានប្រាក់ទិញម្ហូបឱ្យបានឆ្ងាញ់ម្តងក្នុងមួយឆាកជីវិតចុងក្រោយរបស់លោកយាយនេះ៕
ចែករំលែកព័តមាននេះ