រាជធានីភ្នំពេញ ៖ បើទោះបីជាមានការអះអាងថា អាជ្ញាធររាជធានីភ្នំពេញ និងអាជ្ញាធរខណ្ឌចំការមន និងរៀបចំពិធីបុណ្យគម្រប់ខួប១០ឆ្នាំដល់ជនរងគ្រោះដែលបាត់បង់ជីវិតនៅលើអតីតស្ពានពេជ្រក្តី តែជាក់ស្តែងនៅព្រឹកថ្ងៃទី២២ ខែវិច្ឆិកានេះ ដែលជាថ្ងៃគម្រប់ខួប១០ឆ្នាំនេះមិនមានអាជ្ញាធរ ឬខាងណាទៅធ្វើពិធីសូត្រមន្តបង្សុកូល និងរាប់បាត្រព្រះសង្ឃទៅតាមប្រពៃណីព្រះពុទ្ធសាសនា ដើម្បីឧទ្ទិសកុសលជូនវិញ្ញាណក្ខន្ធជនរងគ្រោះក្នុងឧបទ្ទវហេតុលើអតីតស្ពានពេជ្រនៅទីតាំងស្តូបគោរពវិញ្ញាណក្ខន្ធនោះទេ គឺមានតែតំណាងក្រុមគ្រួសារជនរងគ្រោះដែលបានបាត់បង់ជីវិតនោះមកពីខេត្ត និងរាជធានីភ្នំពេញ មានតែប្រមាណ៥ឬ៦គ្រួសារប៉ុណ្ណោះ ពិតជាកណ្តោចកណ្តែងពេកហើយ ។
សូមបញ្ជាក់ថា កាលពីថ្ងៃទី២១ ខែវិច្ឆិកាម្សិលមិញនេះ លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានអះអាងថា ទោះបីរាជធានីភ្នំពេញមានស្ថានភាពលំបាកផ្ទួនៗគ្នាដូចជាបញ្ហា គ្រោះទឹកជំនន់ទឹកភ្លៀង និងស្ថានភាពកូវីដ១៩ ដែលត្រូវលុបចោលកម្មវិធីមួយចំនួនក្តី ប៉ុន្តែរដ្ឋបាលរាជធានីភ្នំពេញ មិនបានភ្លេច និងបោះបង់ចោលនូវកម្មវិធីសូត្រមន្ត បង្សុកូល និងរាប់បាត្រព្រះសង្ឃ ទៅតាមទំនៀមទម្លាប់ប្រពៃណីសាសនា ដើម្បីឧទ្ទិសកុសលជូនដល់ជនរងគ្រោះដែលបានបាត់បង់ជីវិតគម្រប់ខួប១០ឆ្នាំ (២២វិច្ឆិកា ២០១០- ២២វិច្ឆិកា ២០២០) ក្នុងឧបទ្ទវហេតុរត់ជាន់គ្នាលើអតីតស្ពានពេជ្រកាលពីយប់ថ្ងៃទី២២ វិច្ឆិកា ២០១០ ឬថ្ងៃទី៣នៃព្រះរាជពិធីបុណ្យអុំទូកឡើយ ដោយអភិបាលរាជធានីភ្នំពេញបានណែនាំឱ្យអាជ្ញាធរខណ្ឌចំការមនជាអ្នករៀបចំធ្វើតាមប្រពៃណីព្រះពុទ្ធសាសនានៅថ្ងៃទី២២ ខែវិច្ឆិកានេះ។
កន្លងមកជារៀងរាល់ឆ្នាំ អាជ្ញាធររាជធានីភ្នំពេញ តែងតែធ្វើពិធីសូត្រមន្តបង្សុកូល និងរាប់បាត្រព្រះសង្ឃទៅតាមប្រពៃណីព្រះពុទ្ធសាសនា ដើម្បីឧទ្ទិសកុសលជូនវិញ្ញាណក្ខន្ធជនរងគ្រោះក្នុងឧបទ្ទវហេតុលើអតីតស្ពានពេជ្រនៃទីក្រុងកោះពេជ្រ រៀងរាល់ថ្ងៃទី២២ខែវិច្ឆិកា ដែលក្រុមគ្រួសារជនរងគ្រោះ តែងតែមកចូលរួម និងបានទទួលអំណោយជាថវិកា សម្រាប់ជាសោហ៊ុយត្រឡប់ទៅវិញផងដែរ ។
ប៉ុន្តែសម្រាប់ឆ្នាំនេះ គឺពិតជាសង្វេគណាស់ បែរជាអាជ្ញាធរមិនធ្វើទៅវិញ ដែលធ្វើឱ្យតំណាងក្រុមគ្រួសារសពជនរងគ្រោះប្រមាណ៥ ឬ៦គ្រួសារនោះមានការខកចិត្ត ។
លោកស្រី សុភាព រស់នៅរាជធានីភ្នំពេញត្រូវជាម្ដាយជនរងគ្រោះបានឱ្យដឹងថា នៅពេលទទួលដំណឹងថា អាជ្ញាធរធ្វើពិធីសូត្រមន្ត បង្សុកូល និងរាប់បាត្រព្រះសង្ឃ ទៅតាមទំនៀមទម្លាប់ប្រពៃណីសាសនា ដើម្បីឧទ្ទិសកុសលជូនដល់ជនរងគ្រោះដែលបានបាត់បង់ជីវិតគម្រប់ខួប១០ឆ្នាំ នៅថ្ងៃទី២២ ខែវិច្ឆិកានេះ គាត់ពិតជាមានក្តីត្រេកអរ និងសប្បាយរីករាយព្រមទាំងខំងើបពីព្រឹក ដើម្បីចូលរួម តែពេលមកដល់បែរជាស្ងាត់ជ្រាបទៅវិញ ។
គួររំលឹកថា កាលពីយប់ថ្ងៃទី២២ ខែវិច្ឆិកា ឆ្នាំ២០១០ ក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ មានឧបទ្ទវហេតុរត់ជាន់គ្នាបានកើតឡើងនៅលើស្ពានកោះពេជ្រ បណ្តាលឲ្យមនុស្សបាត់បង់ជីវិត៣៥៣នាក់ និងរងរបួសជាង៤០០នាក់ផងដែរ ៕
ចែករំលែកព័តមាននេះ