ខេត្តតាកែវ ៖ ស្រះទឹកដែលមានពាក់ព័ន្ធទៅនឹងរឿងប្រវត្តិសាស្ត្រធំៗចំនួន២ គឺត្រពាំងខ្នារ និងស្រះយុវជន ឬអ្នកស្រុកហៅថា «អាង» នោះ ដែលមានទីតាំងនៅតាមបណ្តោយផ្លូវជាតិលេខ៣ ស្ថិតនៅផ្សារត្រាំខ្មារ…
ខេត្តតាកែវ ៖ ស្រះទឹកដែលមានពាក់ព័ន្ធទៅនឹងរឿងប្រវត្តិសាស្ត្រធំៗចំនួន២ គឺត្រពាំងខ្នារ និងស្រះយុវជន ឬអ្នកស្រុកហៅថា «អាង» នោះ ដែលមានទីតាំងនៅតាមបណ្តោយផ្លូវជាតិលេខ៣ ស្ថិតនៅផ្សារត្រាំខ្មារ ក្នុងភូមិត្រាំខ្នារ(ខាងកើត) ឃុំសូភី ស្រុកបាទី ខេត្តតាកែវ មានចម្ងាយ៤២គីឡូម៉ែត្រពីរាជធានីភ្នំពេញ ត្រូវបានក្រុមហ៊ុនសំណង់មួយឈ្មោះថា «ក្រុមហ៊ុន ឈ្នះ ឈ្នះ» បានកំពុងតែលើកគម្រោង និងស្នើសុំទៅសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីធ្វើការចាក់ដីលុបស្រះទឹកទាំង ២ ក្នុងគោលបំណងធ្វើការសាងសង់ផ្សារស្តង់ ផ្សាររាត្រី សួនច្បារ ចំណតរថយន្ត និងហេដ្ឋានរចនាសម្ព័ន្ធផ្សេងៗទៀតនោះ។
ក្រោយពេលដែលលេចធ្លាយនូវគម្រោងលុបស្រះទឹកទាំង២ខាងលើនេះភ្លាម ប្រជាពលរដ្ឋរាប់រយគ្រួសារដែលរស់ជុំវិញផ្សារត្រាំខ្នារ ក្នុងភូមិត្រាំខ្នារខាងកើត ភូមិត្រាំខ្នារខាងលិច និងភូមិក្របីត្រាំ ទាំង៣ភូមិ នាំគ្នាប្រតិកម្ម និងមិនទទួលយកការអភិវឌ្ឍន៍របស់ក្រុមហ៊ុន «ឈ្នះ ឈ្នះ» ខាងលើនេះឡើយ ក៏ស្នើសុំការអន្តរាគមន៍អំពីសំណាក់សម្តេច ហ៊ុន សែន នាយករដ្ឋមន្ត្រី និងថ្នាក់ដឹកនាំគ្រប់ជាន់ថ្នាក់ផ្សេងៗទៀតផងដែរ។
តាមប្រភពពីតំណាងម្នាក់បានប្រាប់ឱ្យដឹងថា ក្រោយពេលដែលពួកគាត់បានដឹងថា មានក្រុមហ៊ុនសំណង់មួយឈ្មោះថា «ក្រុមហ៊ុន ឈ្នះ ឈ្នះ» របស់ឈ្មោះ ស៊ុន ស៊ាន ជាអគ្គនាយកកំពុងតែធ្វើសំណើរមួយទៅសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី នៃព្រះរាជាណាចក្រកម្ពុជា ដើម្បីសុំចាក់ដីលុបស្រះទឹកចំនួន២ គឺ ស្រះទី១-ត្រពាំងខ្នារ នៅខាងមុខផ្សារត្រាំខ្នា និងស្រះទី២ -ឈ្មោះថា ស្រះយុវជន ខាងមុខសាលាបឋមសិក្សាត្រាំខ្នារ និងសាលាវិទ្យាល័យ សុខ អាន ត្រាំខ្នារ ដើម្បីធ្វើជាផ្សារ ធ្វើស្តង់ ផ្សាររាត្រី ចំណតរថយន្ត និងហេដ្ឋារចនាសម្ព័ន្ធផ្សេងៗទៀតនោះ។
ក្នុងនាមពួកគាត់ទាំងអស់គ្នាជាប្រជាពលរដ្ឋរស់នៅក្នុងភូមិត្រាំខ្នារខាងកើត ស្ថិតនៅខាងកើតផ្លូវជាតិលេខ៣ ស្ថិតនៅក្នុងឃុំសូភី ស្រុកបាទី ខេត្តតាកែវ និងភូមិត្រាំខ្នារខាងលិច ស្ថិតនៅឃុំស្នំក្រពើ ភូមិក្របីត្រាំ ស្ថិតនៅឃុំជង្រុក ខាងលិចផ្លូវជាតិលេខ៣ ក្នុងស្រុកគងពិសី ខេត្តកំពង់ស្ពឺ សុំមិនទទួលយកគម្រោងអភិវឌ្ឍន៍របស់ក្រុមហ៊ុន «ឈ្នះ ឈ្នះ» ដោយចាក់ដីលុបស្រះទាំង២ខាងលើនោះឡើយ។
ព្រោះថា ស្រះទាំង២នេះ គឺវាមានគុណបំណាច់យ៉ាងធំធេងដល់ការរស់នៅប្រចាំថ្ងៃរបស់ ពួកយើងខ្ញុំទាំង៣ភូមិ ដែលនៅជុំវិញផ្សារត្រាំខ្នារនេះ ដោយពូកយើងបាននាំគ្នាទៅដួសទឹកយកមកផឹក ងូត និងយកទៅប្រើប្រាស់ផ្សេងៗតាំងពីឆ្នាំ១៩៧៩ មកទល់នឹងពេល បច្ចុប្បន្ននេះ។
ម្យ៉ាងទៀតស្រះទឹកទាំង២នេះ ក៏មានជាប់ទាក់ទិនទៅរឿងប្រវត្តិសាស្ត្រផងដែរ ដូចជាស្រះ «ត្រពាំងខ្នារ» មានអាយុកាលរាប់រយរាប់ពាន់ឆ្នាំមកហើយ ដែលមានឫទ្ធិបារមីស័ក្ដិសិទ្ធិជាទីបំផុត ដោយចាស់និយាយតៗគ្នាថា «ក្នុងត្រពាំងខ្នារនេះ មានគងធំមួយនៅកប់ក្នុងដីបាតស្រះ និងតែងតែឭសំឡេង គងបន្លឺឡើង រៀងរាល់ថ្ងៃសីល ហើយប្រជាពលរដ្ឋតែងតែបានប្រារព្ធធ្វើបុណ្យឡើងជាប្រចាំឆ្នាំរហូតមកទល់នឹងសព្វថ្ងៃនេះ ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ