ខេត្តស្ទឹងត្រែង ៖ ក្រោយពីទទួលការវះកាត់ប្រកបដោយជោគជ័យក្រោមការយកចិត្តទុកដាក់ពីសំណាក់លោកវេជ្ជបណ្ឌិត អ៊ុង សូវៀត ប្រធានមន្ទីរពេទ្យបង្អែកខេត្ត និងលោកវេជ្ជបណ្ឌិត អ៊ុយ គីណា ទទួលបន្ទុកផ្នែកវះកាត់ និងសម្ភព រួមជាមួយសហការីជាច្រើននាក់ទៀតនោះ ពេលនេះស្ថានភាពនៃអាការជំងឺរបស់អ្នកស្រី ភឹម នួនស៊ី មានការធូរស្បើយច្រើនហើយ តែក៏កំពុងស្ថិតក្រោមការយកចិត្តទុកដាក់តាមដានពីលោកវេជ្ជបណ្ឌិត និងសហការីក្នុងមន្ទីរពេទ្យនៅឡើយ ។
បន្ទាប់ពីមានការឧបត្ថម្ភថវិកានៅព្រឹកថ្ងៃទី១៦ កញ្ញារបស់លោកជំទាវបណ្ឌិត ប៊ុន រ៉ានី ហ៊ុន សែន ចំនួន៥លានរៀល តាមរយៈលោកសេង ទៀង ជំនួយការផ្ទាល់របស់សម្តេចអគ្គមហាសេនាបតីតេជោ ហ៊ុន សែន ផ្តល់មកលោកម៉ៅ ធរនិន អភិបាលរងខេត្ត ថវិកានោះត្រូវបានប្រគល់ជូនអ្នកស្រីភឹម នួនស៊ី ដោយផ្ទាល់ដៃនៅក្នុងមន្ទីរពេទ្យ ។ ក្នុងថ្ងៃជាមួយគ្នានេះដែរ អំណោយឧបត្ថម្ភរបស់លោកជំទាវ ង៉ែត ម៉ាលី ភរិយារបស់លោកម៉ៅ ច័ន្ទតារា ក៏ត្រូវបានប្រគល់ជូនតាមរយៈលោកស្រី វណ្ណា ស្នងការរងនគរបាលខេត្ត ។
ពេលនេះអំណោយឧបត្ថម្ភរបស់សប្បុរសជនដែលផ្តល់តាមរយៈកោះសន្តិភាព ក៏ត្រូវបានប្រគល់ដល់ដៃអ្នកស្រីភឹម នួនស៊ី និងស្វាមីនៅក្នុងមន្ទីរពេទ្យនៅថ្ងៃទី១៨ កញ្ញា ឆ្នាំ២០១០ ដោយមានការចូលរួមពីគិលានុប្បដ្ឋាកយិការច្រើនរូបផងដែរ ។ ទឹកប្រាក់ដែលជាអំណោយទាននេះ គឺកោះសន្តិភាពបានទទួលពីសប្បុរសជនគ្រប់ទិសទី ដូចមានរាយនាមដូចខាងក្រោមនេះ ៖ ១-លោកលីម ង៉ូវ, ២-លោកលី ងួន និង៣-លោកឧកញ៉ាក្រុមហ៊ុន LM ជួយឧបត្ថម្ភ៦០ដុល្លារ, ៤-លោកវ៉ាន សឿន អនុប្រធានក្រុមការងារស្រុកសំរោង ខេត្តតាកែវ ឧបត្ថម្ភ១០ម៉ឺនរៀល, ៥-លោកស្រី សុខ សណ្តាប់ នៅសង្កាត់ផ្សារថ្មីទី២ ឧបត្ថម្ភ១០ដុល្លារ, ៦-លោកអ៊ុក កាម៉ាច ២ម៉ឺនរៀល, ៧-លោកសាន សុផា ២ម៉ឺនរៀល, ៨-កញ្ញា រឿន ស៊ីរ៉ាណេ ២ម៉ឺនរៀល, ៩-មន្ត្រីសាលារាជធានីភ្នំពេញ ការិយាល័យអន្តរវិស័យ ឧបត្ថម្ភ៨ម៉ឺនរៀល, ១០-អ្នកស្រី នុត សម្ផស្ស ព្រមទាំងក្រុមគ្រួសារនៅភ្នំពេញ ឧបត្ថម្ភ១០ដុល្លារ, ១១-លោកហេង ឆាយ និងភរិយា ម្ចាស់ហាងស៊ុបគោតាម៉ាប់ ផ្លូវលេខ១៣៦ ខាងកើតផ្សារតាប៉ាង ទល់មុខសាលា E.L.T ថ្មី ឧបត្ថម្ភ៥ម៉ឺនរៀល, ១២-សេង សុខុម ម្ចាស់ហាងពេជ្រម្កុជពេជ្រ ឧបត្ថម្ភ២០ដុល្លារ, ១៣-លោកសាន់ មានិត ១៤-កញ្ញា ហ៊ាង លីណា រួមគ្នាឧបត្ថម្ភ៣០ម៉ឺនរៀល, ១៥-លោកសេង គី ផ្ទះលក់ទាខ្វៃច្បារអំពៅ១ ផ្លូវជាតិលេខ១ ផ្ទះលេខ៤០Eo ខណ្ឌមានជ័យ រាជធានីភ្នំពេញឧបត្ថម្ភ២ម៉ឺនរៀល, ១៦-លោកលាវ សុខ និងភរិយា ឧបត្ថម្ភ២ម៉ឺនរៀល, ១៧-លោកពត សារិន និងភរិយា ព្រមទាំងបុត្រី សារិន សុក្រិតសោត្តា រស់នៅសង្កាត់បឹងកក់ទី២ ខណ្ឌទួលគោក ឧបត្ថម្ភ២០០ដុល្លារ, ១៨-លោកជំទាវ ប៉ាន់ ចំណាន និងលោកគជ ចន្ថា ជាស្វាមី ព្រមទាំងក្រុមគ្រួសារ រស់នៅសហរដ្ឋអាមេរិក ឧបត្ថម្ភ៥០ដុល្លារ និង១៩-លោកហេង ផេង ផ្ទះលេខ៣២ អូឡាំពិក វេរប្រាក់តាមបណ្តាខេត្ត ឧបត្ថម្ភ១០ម៉ឺនរៀល ។
បន្ទាប់ពីទទួលបាននូវកញ្ចប់ថវិកាដ៏មហាថ្លៃ ថ្លាមិនអាចកាត់ថ្លៃបានរបស់លោកជំទាវបណ្ឌិត ប៊ុន រ៉ានី ហ៊ុន សែន និងលោកជំទាវ ង៉ែត ម៉ាលី ព្រមទាំងសប្បុរសជន ដែលជានិច្ចកាលតែងតែឧបត្ថម្ភថវិកាផ្ទាល់ខ្លួន ដើម្បីជួយរំលែកទុក្ខលំបាកដល់ក្រុមគ្រួសារទុរគតជនអ្នកទីទ័លក្រ អ្នកស្រី ភឹម នួនស៊ី និងស្វាមី ព្រមទាំងក្រុមគ្រួសារបានថ្លែងអំណរគុណយ៉ាងជ្រាលជ្រៅជាទីបំផុតរំភើបរហូតស្រក់ទឹកភ្នែកសំពះជូនពរជ័យជូនដល់លោកជំទាវបណ្ឌិត ប៊ុន រ៉ានី ហ៊ុន សែន និងសប្បុរសជនទាំងអស់ដែលបានយកចិត្តទុកដាក់ជួយសង្គ្រោះជីវិតអ្នកស្រី ។ អ្នកស្រីព្រមទាំងក្រុមគ្រួសារថ្លែងថា គ្មានអ្វីតបស្នងសងគុណវិញទេ មានតែម្រាមដៃដប់សំពះគោរពជូនពរជ័យ ដល់លោកជំទាវ និងសប្បុរសជនទាំងអស់ជួបតែពុទ្ធពរទាំង៤ប្រការ កុំបីឃ្លៀងឃ្លាតឡើយ ។
លោកវេជ្ជបណ្ឌិត អ៊ុង សូវៀត ប្រធានមន្ទីរពេទ្យបង្អែកខេត្តស្ទឹងត្រែងបានឱ្យដឹងថា ក្រោយពីធ្វើការវះកាត់រយៈពេលប៉ុន្មានថ្ងៃកន្លងមកនេះ សភាពអ្នកជំងឺបានធូរស្បើយច្រើន ហើយក៏ កំពុងស្ថិតនៅក្នុងការតាមដាន ព្រោះជំងឺនេះទៅថ្ងៃក្រោយក៏ត្រូវស្ថិតក្នុងការតាមដានជាបន្តទៀតដែរ ។ ឯលោកវេជ្ជបណ្ឌិត អ៊ុយ គីណា ទទួលបន្ទុកផ្នែកវះកាត់ និងសម្ភពវិញ បានបង្ហើបឱ្យដឹងក្រោយពីធ្វើការវះកាត់ថា នេះជាជំងឺធម្មតា តែវាជាជំងឺពិសេសផងដែរ ដែលជំងឺនេះអាចបង្កើតជាល្អាងទឹកមួយ ដែលរក្សាទុកជាច្រើនឆ្នាំនៅក្នុងដៃស្បូន ទើបបណ្តាលឱ្យរីកធំឆាប់បែបនេះ ។
សូមបញ្ជាក់ថា នៅថ្ងៃទី១៩ កញ្ញា កោះសន្តិភាពបានទទួលទឹកប្រាក់ជាអំណោយដ៏ថ្លៃថ្លាមួយឈុតទៀតពីលោកឧកញ៉ា លីហួរ ចំនួន៥លានរៀល ដើម្បីឧបត្ថម្ភក្នុងការទិញថ្នាំសង្កូវ ឬចំណាយសំរាប់ការថែទាំសុខភាព ។ លោកឧកញ៉ា ធ្លាប់បានអះអាងប្រាប់កោះសន្តិភាពថា លោកនឹងជួួយស្រោចស្រង់ជីវិតស្ត្រីរូបនេះ ព្រោះលោកយល់ថា ការជួយជីវិតមនុស្ស គឺមានតំលៃខ្លាំងណាស់ ។ កោះសន្តិភាព នឹងបញ្ជូនប្រាក់អំណោយដែលបានទទួលនៅថ្ងៃដដែល ហើយទឹកប្រាក់នេះនឹងត្រូវបានប្រគល់នៅថ្ងៃទី២០ កញ្ញា រួមជាមួយប្រាក់ពីសប្បុរសជនច្រើននាក់ទៀត ។
ជាមួយគ្នានេះ កោះសន្តិភាពសូមសំដែងនូវមោទនភាពជាតិមួយ ជូនចំពោះជនរួមជាតិជាសប្បុរសជនទាំងអស់ដែលបាននាំគ្នាជួយដោយការបរិច្ចាគធនធានរបស់ខ្លួន ដើម្បីស្រោចស្រង់ជីវិតជនរួមជាតិដែលប្រឈមមុខនឹងការអស់សង្ឃឹមថានឹងបានរស់ ឱ្យបានជួបនូវទឹកសន្សើមជាថ្មី បានរស់ឃើញមុខកូនទាំង៦នាក់បន្តទៀត ។ សន្តានចិត្តដ៏ល្អរបស់ជនរួមជាតិខ្មែរនេះ ពិតជាមិនអាចកាត់ថ្លៃបានឡើយ ៕
ចែករំលែកព័តមាននេះ