រាជធានីភ្នំពេញ ៖ ស្រែសង្គមដែលលោកអភិបាលស្រុកបន្ទាយស្រី ឃឹម ហ្វីណង់ បានបង្កើតឡើង កាលពីដើមឆ្នាំនេះនៅពេលនេះបានប្រមូលផលហើយ ។ ហើយផលស្រូវសង្គមនេះ ក្រៅពីការយកទៅទូទាត់សងម្ចាស់ស្រែ ដែលជួលឲ្យអាជ្ញាធរហើយនោះ ស្រូវដែលនៅសេសសល់នឹងយកទៅចែកជូនពលរដ្ឋក្រីក្រីនៅក្នុងស្រុកដែលមានប្រមាណ២ពាន់គ្រួសារ ។
កាលពីថ្ងៃទី៣០ ខែសីហា ឆ្នាំ២០២០លោក ឃឹម ហ្វីណង់ និងអាជ្ញាធរស្រុកបានចាប់ផ្តើមចុះប្រមូលផលស្រូវពីស្រែសង្គមនៅជុំទី១ ។ ការប្រមូលផលថ្ងៃដំបូងនេះ លើផ្ទៃដីទំហំ១០ហិកតា ក្នុងចំណោមផ្ទៃដីធ្វើបានសរុបទំហំ៤០ហិកតា ដែលស្ថិតនៅក្នុងឃុំព្រះដាក់ ។
ទិន្និផលស្រូវសង្គមឲ្យផលបានពី២តោនកន្លះ ទៅ៣តោនក្នុងមួយហិកតា ។ ដូច្នេះបើសរុបផ្ទៃដីទាំង៤០ហិកតានោះ គឺទទួលបានផលស្រូវប្រមាណជា១០០តោន ហើយបើកិនទៅជាអង្ករ គឺបានប្រមាណជា៥០តោនដែរ ។ លោក ឃឹម ហ្វីណង់ បានឱ្យដឹងថា«សម្រាប់ផលស្រូវដែលយើងទទួលបានជាលើកដំបូងនេះ គឺត្រូវទូទាត់ជូនទៅម្ចាស់ស្រែដែលបានផ្តល់ស្រែឱ្យអាជ្ញាធរធ្វើ តាមកិច្ចសន្យារវាងរដ្ឋបាលស្រុក និងម្ចាស់ស្រែ ហើយបន្ទាប់មកអាជ្ញាធរ នឹងកិនទៅជាអង្ករសម្រាប់យកទៅចែកជូនដល់ប្រជាពលរដ្ឋមានជីវភាពខ្វះខាតនៅក្នុងស្រុកបន្ទាយស្រី ដែលមានប្រមាណជា២ពាន់គ្រួសារ » ។
លោកអភិបាលស្រុកបានបញ្ជាក់បន្ថែមថា ដោយសារតែស្រែសង្គមជុំទី១នេះទទួលបានទិន្នផលល្អ ដូច្នេះអាជ្ញាធរស្រុកនឹងបន្តធ្វើនៅជុំទី២ ទៀតដែលគ្រោងនឹងចាប់ផ្តើមនៅខែមករា ឆ្នាំ២០២១ ដើម្បីធ្វើយ៉ាងណាគៀងគរឱ្យបានជាស្រូវ និងជាអង្ករឱ្យបានច្រើនសម្រាប់ជួយដល់ប្រជាពលរដ្ឋ ក្រ១ ក្រ២ នៅក្នុងស្រុកបន្ទាយស្រីនេះ ៕
ចែករំលែកព័តមាននេះ