Rashford យកពេលទំនេរពីបាល់ទាត់ បន្តការងារមនុស្សធម៌របស់ខ្លួន
ប្រទេសអង់គ្លេស ៖ ខ្សែប្រយុទ្ធ Marcus Rashford របស់ក្រុម Man United បានចំណាយពេលទំនេរពីបាល់ទាត់របស់ខ្លួន បន្ទាប់ពីក្របខណ្ឌ…
ប្រទេសអង់គ្លេស ៖ ខ្សែប្រយុទ្ធ Marcus Rashford របស់ក្រុម Man United បានចំណាយពេលទំនេរពីបាល់ទាត់របស់ខ្លួន បន្ទាប់ពីក្របខណ្ឌ Premier League បានបញ្ចប់ ដោយបន្តការងារមនុស្សធម៌ ដើម្បីផ្តល់អាហារក្មេងក្រីក្រក្នុងប្រទេសអង់គ្លេស។
ក្រោយពីរួមចំណែកជួយក្រុម Man United បញ្ចប់ទៅនៅចំណាត់ថ្នាក់លេខ៣ និងទទួលបានកៅអី Champions League រដូវកាលក្រោយ។ ខ្សែប្រយុទ្ធជម្រើសជាតិអង់គ្លេសវ័យ ២២ឆ្នាំរូបនេះ បានបន្តសកម្មភាពការងារមនុស្សធម៌របស់ខ្លួន ដោយបានកៀរគរជំនួយពីសប្បុរសជន ដើម្បីផ្តល់ជូនក្មេងៗក្រីក្រកំពុងខ្វះខាតចំណីអាហារ។
រូបគេបានបង្ហោះរូបភាពទៅក្នុងបណ្តាញសង្គម Instagram ដោយបង្ហាញពីសកម្មភាពរូបគេជាមួយកម្មករផ្សេងទៀត បានជួយនៅឯរោងចក្រមួយកន្លែងដែលផ្ទុកទំនិញ និងស្បៀងអាហារតាមរយៈមូលនិធិ Fare Share UK ។
សូមរំលឹកថា កាលពីពេលកន្លងទៅ Rashford ទទួលបានជោគជ័យក្នុងការបញ្ចុះបញ្ចូលរដ្ឋាភិបាលអង់គ្លេស ដើម្បីបន្ថែមប័ណ្ណអាហារដោយឥតគិតថ្លៃសម្រាប់ប្រជាជន រហូតដល់ថ្ងៃឈប់សម្រាករដូវក្តៅ ខណៈដែលគេក៏បានជួយរៃអង្គាសប្រាក់បានចំនួន ២០លានផោន ដើម្បីជួយក្មេងៗ ដែលងាយរងគ្រោះខ្លាំងបំផុត អំឡុងពេលការរីករាលដាលនៃវីរុសកូវីដ១៩។
សកម្មភាពទាំងនេះ ទទួលបានការកោតសរសើរយ៉ាងខ្លាំងពីសំណាក់ប្រជាជនអង់គ្លេស និងជាពិសេសពីនាយករដ្ឋមន្ត្រីអង់គ្លេស Boris Johnson ចំពោះទឹកចិត្តមនុស្សធម៌របស់កីឡាករវ័យក្មេងរូបនេះ៕ (ដកស្រង់ចេញពី The Sun)
ចែករំលែកព័តមាននេះ