ប្រទេសអេស្ប៉ាញ ៖ អតីតប្រធានក្រុមជម្រើសជាតិអេស្ប៉ាញ ដែលឈ្នះពានរង្វាន់ពិភពលោកគឺអ្នកចាំទី Iker Casillas បានប្រកាសកាលពីថ្ងៃច័ន្ទ ទី១៥ ខែមិថុនាថា លោកបានសម្រេចដកបេក្ខភាពរបស់ខ្លួន…
ប្រទេសអេស្ប៉ាញ ៖ អតីតប្រធានក្រុមជម្រើសជាតិអេស្ប៉ាញ ដែលឈ្នះពានរង្វាន់ពិភពលោកគឺអ្នកចាំទី Iker Casillas បានប្រកាសកាលពីថ្ងៃច័ន្ទ ទី១៥ ខែមិថុនាថា លោកបានសម្រេចដកបេក្ខភាពរបស់ខ្លួន ដើម្បីឈរឈ្មោះបោះឆ្នោតជាប្រធានសហព័ន្ធបាល់ទាត់អេស្ប៉ាញ (RFEF) ដោយសារវិបត្តិដែលបណ្តាលមកពីវីរុសកូវីដ-១៩។
អតីតអ្នកចាំទីក្រុម Porto បានសរសេរនៅលើបណ្តាញទំនាក់ទំនងសង្គមថា «ខ្ញុំសូមជូនដំណឹងដល់អ្នករាល់គ្នាថា ខ្ញុំបានសម្រេចចិត្តមិនឈរឈ្មោះសម្រាប់ការបោះឆ្នោតតំណែងប្រធាន RFEF នាពេលខាងមុខនេះទេ»។
បុរសវ័យ៣៩ឆ្នាំរូបនេះបានបញ្ជាក់ថា មូលហេតុដែលខ្លួនសម្រេចចិត្តបែបនេះ គឺដោយសារតែស្ថានភាពបច្ចុប្បន្នរបស់សង្គម និងសេដ្ឋកិច្ច ជាពិសេសវិបត្តិសុខភាព ដែលប្រទេសអេស្ប៉ាញកំពុងរងទុក្ខ។ ទាំងអស់នេះវាសំខាន់ជាងអ្វីៗទាំងអស់ក្នុងពេលឥឡូវនេះ ។
ការប្រកាសដកបេក្ខភាពរបស់ Iker Casillas ត្រូវបានគេមើលឃើញយ៉ាងច្បាស់ពីលទ្ធភាពខ្ពស់សម្រាប់លោក Luis Rubiales (ប្រធាន RFEF បច្ចុប្បន្ន) ដើម្បីការឈ្នះការបោះឆ្នោត ដែលគ្រោងនឹងធ្វើឡើងនៅថ្ងៃទី១៧ ខែសីហា ឆ្នាំ២០២០ ដើម្បីបន្តការដឹកនាំសម្រាប់អាណត្តិទី២ ។
សូមបញ្ជាក់ជូនថា Iker Casillas បានប្រកាសចូលនិវត្តន៍ពីពិភពបាល់ទាត់កាលពីខែកុម្ភះកន្លងទៅថ្មីៗនេះ បន្ទាប់ពីជាសះស្បើយពីការព្យាបាលជំងឺគាំងបេះដូង អំឡុងពេលហ្វឹកហាត់របស់ខ្លួន។ បើទោះបីជាចូលនិវត្តន៍ ប៉ុន្តែរូបគេបានទទួលតំណែងជាទីប្រឹក្សាបច្ចេកទេសពីក្លិបចុងក្រោយរបស់ខ្លួន FC Porto។
សូមរំលឹកជូនថា វីរៈបុរសបាល់ទាត់អេស្ប៉ាញខាងលើ បានបង្ហាញខ្លួនចំនួន ១០៥២ប្រកួតទាំងក្រុមជម្រើសជាតិ និងក្លិបអាជីព។ ហើយរូបគេជោគជ័យខ្លាំងបំផុតជាមួយក្រុម Real Madrid ដោយឈ្នះពានរង្វាន់ធំជាច្រើនជាពិសេស La Liga ៥ដង និង Champions League ៣ដង ។ ដោយឡែកក្នុងក្រុមជម្រើសជាតិអេស្ប៉ាញ Casillas បានជួយប្រទេសខ្លួនឈ្នះ World Cup ឆ្នាំ ២០១០ និង Euro នៅឆ្នាំ ២០០៨ និង ២០១២ ផងដែរ ៕ (ដកស្រង់ចេញពី Reuters)
ចែករំលែកព័តមាននេះ