រាជធានីភ្នំពេញ ៖ ថ្មីៗនេះរូបភាពជាច្រើនសន្លឹកបង្ហោះនៅលើបណ្តាញសង្គមបានបង្ហាញឲ្យច្បាស់ពីភាពខុសគ្នារវាងការសិក្សារបស់ក្មេងៗនៅរាជធានីភ្នំពេញ និងក្មេងតូចៗនៅជនបទ ។ ក្នុងនោះរូបភាពខ្លះ គឺសិស្សៗរៀនជាមួយគ្រូ ក្រោមម្លប់ដើមឈើ ខ្លះក៏ជុំគ្នារៀននៅបរិវេណវត្តអារាមជាដើម ។…
រាជធានីភ្នំពេញ ៖ ថ្មីៗនេះរូបភាពជាច្រើនសន្លឹកបង្ហោះនៅលើបណ្តាញសង្គមបានបង្ហាញឲ្យច្បាស់ពីភាពខុសគ្នារវាងការសិក្សារបស់ក្មេងៗនៅរាជធានីភ្នំពេញ និងក្មេងតូចៗនៅជនបទ ។ ក្នុងនោះរូបភាពខ្លះ គឺសិស្សៗរៀនជាមួយគ្រូ ក្រោមម្លប់ដើមឈើ ខ្លះក៏ជុំគ្នារៀននៅបរិវេណវត្តអារាមជាដើម ។
ការសិក្សានៅសម័យកូវីដ១៩ របស់សិស្សានុសិស្សនៅជនបទ គឺជួបឧបសគ្គច្រើនពាក់ព័ន្ធនឹងសម្ភារៈប្រើប្រាស់នៃការសិក្សាតាមអនឡាញ ដោយសារកត្តាជីវភាពក្រីក្រខ្វះមធ្យោបាយប្រើប្រាស់ប្រព័ន្ធសង្គម ហើយក្មេងៗនៅគ្រួសារក្រីក្រខ្លះ គឺពុំមានលទ្ធភាពសូម្បីតែរៀនតាមកម្មវិធីសិក្សាចាក់បញ្ចាំងលើកញ្ចក់ទូរទស្សន៍ ។ ខណៈកុមារមួយចំនួនធំនៅថ្នាក់បឋមសិក្សារហូតដល់វិទ្យាល័យនៅក្រុងភ្នំពេញ ហាក់ទទួលបានការសិក្សាតាមអនឡាញយ៉ាងរលូន ។
ងាកទៅការបង្រៀនពីចម្ងាយនៅតាមជនបទវិញ លោកគ្រូ អ្នកគ្រូមួយចំនួន ដោយសារកូនសិស្សមួយចំនួនធំខ្វះខាតសម្ភារៈសិក្សាតាមអនឡាញបានចុះណែនាំ និងដាក់កិច្ចការឲ្យកូនសិស្សតាមរយៈការជួបជុំ មួយសប្តាហ៍ម្តងតាមភូមិគោលដៅ ដោយការសម្រេចយកទីធ្លាវត្តអារាម្យ ឬសាលាភូមិសម្រាប់ធ្វើការបង្រៀនបានខ្លះៗក្នុងរយៈពេលត្រឹមតែ ១ ម៉ោង តែប៉ុណ្ណោះ ។
បើតាមការឲ្យដឹងរបស់អ្នកគ្រូ កេត ចិន្តា បង្រៀនគណិតវិទ្យាថ្នាក់ទី ៧ និង ៨ នៅវិទ្យាល័យហេង សំរិន ចក នៅស្រុកអូរាំងឪ ខេត្តត្បូងឃ្មុំ បានឲ្យដឹងថា ក្នុងការជួយសម្រួលដល់សិស្សានុសិស្ស សម្រាប់ការរៀនពីចម្ងាយក្នុងអំឡុងពេលកូវីដ-១៩ ដែលសាលារៀនគ្រប់កម្រិតទូទាំងប្រទេសត្រូវបិទនោះ ថ្នាក់ដឹកនាំសាលាបានរៀបចំគ្រួៗចុះជួយពង្រឹងការបង្រៀននៅមូលដ្ឋាន ។
ជាក់ស្តែងសម្រាប់អ្នកគ្រូ កេត ចិន្តា ដែលមានសិស្សប្រមាណ ២០០ នាក់បានចុះតាមភូមិ សម្រាប់ការបង្រៀន និងការដាក់មេរៀនដល់សិស្សរបស់ខ្លួនមួយភូមិម្តងៗ ជាក្រុមៗ ពី ៥ ទៅ ១០ នាក់ ដោយជ្រើសរើសទីធ្លាវត្តអារាមក្រោមដើមឈើ ឬក៏ក្រោមរោងនៅវត្តជាដើម សម្រាប់តាមដានណែនាំកម្មវិធីបង្រៀនតាមទូរទស្សន៍ជាតិកម្ពុជាជាដើម។
អ្នកគ្រូបានបញ្ជាក់ថា «យ៉ាងណាមិញ ការបង្រៀនបែបនេះ គឺមានការពិបាកច្រើន ដោយសារតែសិស្សខ្លះគាត់អត់មានលទ្ធភាពរៀនតាមអនឡាញ ។ ត្រង់នេះគឺថា សិស្សដែលខ្ញុំបង្រៀនសម្រាប់មុខវិជ្ជាគណិតវិទ្យាប្រមាណ២០០នាក់ គឺមាន ៥០%អត់អាចរៀនតាមអនឡាញ ហើយ៥០%ផ្សេងទៀតខ្លះក៏មានលទ្ធភាពរៀនតាមការចាក់តាមទូរទស្សន៍ជាតិ តែខ្លះគាត់មានការរៀនចុះខ្សោយខ្លាំង ព្រោះគ្រួសារគាត់គឺអត់ទាំងមានទូរទស្សន៍មើលការបង្រៀននោះទេ» ។ អ្នកគ្រូបញ្ជាក់ថា អ្នកគ្រូចុះតាមភូមិជាទៀងទាត់ ដើម្បីណែនាំ និងដាក់មេរៀនឲ្យសិស្សយកទៅធ្វើនៅផ្ទះ» ។
តោះមកមើលរូបភាពផ្សេងៗដែលអ្នកគ្រូ និងលោកគ្រូវចុះបង្រៀនតាមភូមិ ក្នុងអំឡុងពេលបិទសាលារៀនដោយសារតែកូវីដ១៩ ៖
ចែករំលែកព័តមាននេះ