រាជធានីភ្នំពេញ ៖ អស់រយៈពេល១ខែនៃការរឹតបន្ដឹងច្បាប់ចរាចរណ៍មាននគរបាល៥រូប ត្រូវបានដកតំណែង និងព្យួរការងារ ក្រោយពួកគាត់ល្មើសទៅនឹងច្បាប់ចរាចរណ៍ ។ នេះបើតាមអគ្គស្នងការរងនគរបាលជាតិ នាយឧត្តមសេនីយ៍ ហ៊ឹម…
រាជធានីភ្នំពេញ ៖ អស់រយៈពេល១ខែនៃការរឹតបន្ដឹងច្បាប់ចរាចរណ៍មាននគរបាល៥រូប ត្រូវបានដកតំណែង និងព្យួរការងារ ក្រោយពួកគាត់ល្មើសទៅនឹងច្បាប់ចរាចរណ៍ ។ នេះបើតាមអគ្គស្នងការរងនគរបាលជាតិ នាយឧត្តមសេនីយ៍ ហ៊ឹម យ៉ាន ។
ថ្លែងក្នុងសន្និសីទសារព័ត៌មាន ស្តីពីលទ្ធនៃការអនុវត្តន៍ច្បាប់ចរាចរណ៍ នាព្រឹកថ្ងៃទី១ មិថុនា នៅអគ្គស្នងការនគរបាលជាតិលោក ហ៊ឹម យ៉ាន បានលើកថា ក្នុងរយៈពេល១ខែនៃការរឹតបន្តឹងការអនុវត្តច្បាប់ចរាចរណ៍ផ្លូវគោក គិតចាប់ពីថ្ងៃទី១ ដល់៣១ ខែឧសភា ឆ្នាំ២០២០ មានមន្ត្រីនគរបាលចំនួន៥នាក់ ត្រូវបានដកដំណែង និងព្យួរការងាររបស់ពួកគាត់ ដោយសារតែប្រព្រឹត្តល្មើសនឹងច្បាប់ចរាចរណ៍ ។
អគ្គស្នងការដ្ឋាននគរបាលជាតិ លោក ហ៊ឹម យ៉ាន សង្កេតឃើញថា រហូតមកដល់ពេលនេះមន្ត្រីនគរបាលនគរបាលមួយចំនួននៅតែមិនបានធ្វើជាគំរូល្អដល់ប្រជាពលរដ្ឋនោះទេ ទាក់ទងនឹងការអនុវត្តនូវច្បាប់ចរាចរណ៍នេះ ហើយមន្ត្រីនគរបាលខ្លះនៅតែបំពាននឹងច្បាប់ ប៉ុន្តែពួកគេទាំងនោះមិនត្រូវបានលើកលែងនោះឡើយ ដោយអគ្គស្នងការនគរបាលបានដកតំណែង និងព្យួការងារជាបន្តបន្ទាប់ ។
លោកបានគូសបញ្ជាក់យ៉ាងដូច្នេះថា ៖«មកទល់ពេលនេះក្នុងខែនេះ គឺយើងបានដាក់វិន័យ៥នាក់រួមមាន
ទី១ ប្រធានការិយាល័យ នាយការិយាល័យខេត្តកំពង់ធំ ត្រូវបានដកហួតមុខតំណែងព្យួរការងារ ទី២ ព្យួការងារ អធិការរងស្រុកចន្ទ្រា ខេត្តស្វាយរៀង ហើយទី៣- ព្យួរការងារ មន្ដ្រីនគរបាលចរាចរណ៍ផ្លូវគោក រាជធានីភ្នំពេញបីរូប» ។
ជាមួយគ្នានោះដែរ អគ្គស្នងការរងនគរបាលជាតិលើកឡើងថា ទោះបីជាមានការធ្លាក់ចុះនូវអត្រាគ្រោះថ្នាក់ចរាចរណ៍ ក្នុងរយៈពេល១ខែ នៃការរឹតបន្ដឹងច្បាប់ចរាចរណ៍ផ្លូវគោក ក៏រាជរដ្ឋាភិបាល នៅតែមានការព្រួយបារម្ភដដែល ដោយសារតែប្រជាពលរដ្ឋនៅតែបន្តមិនគោរពច្បាប់ ជាពិសេស គឺការមិនពាក់មួកសុវត្ថិភាពនេះតែម្តង ។
អគ្គស្នងការបន្ថែមថា យ៉ាងណាក៏ដោយការរឹតបន្តឹងនូវច្បាប់ចរាចរណ៍នេះនឹងបន្តទៅមុខ ជានិច្ច ដោយគ្មានការលើកឡើងនោះឡើយ ហើយការធ្វើនេះ គឺដើម្បីការពារអាយុជីវិត និងទ្រព្យសម្បត្តិរបស់ប្រជាពលរដ្ឋ តែប៉ុណ្ណោះមិនមែនធ្វើឡើង ដើម្បីគាបសង្កត់ប្រជាពលរដ្ឋ ដូចការលើកឡើងរបស់ជនអគតិមួយក្តាប់តូចឡើយ ។
សូមជម្រាបថា រយៈពេល១ខែ នៃការរឹតបន្តឹងការអនុវត្តច្បាប់ចរាចរណ៍ផ្លូវគោក នគរបាលធ្វើការផាកពិន័យយានយន្តល្មើសច្បាប់ ចំនួន៤៤.៧៦៥គ្រឿង និងផាកពិន័យបានថវិកាជាង៣ពាន់លានរៀល ៕
ចែករំលែកព័តមាននេះ