ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា គ្រាប់យុទ្ធភ័ណ្ឌមិនទាន់ផ្ទុះចំនួន១៥គ្រាប់ ត្រូវបានប្រជាពលរដ្ឋប្រទះឃើញ ខណៈពេលកំពុងភ្ជួរដីធ្វើចំការរបស់ខ្លួន ហេតុការណ៍នេះបង្កឱ្យមានការភ្ញាក់ផ្អើលកាលពីម៉ោង៨និង៤០នាទីព្រឹក ថ្ងៃទី១១ ខែឧសភា ឆ្នាំ២០២០ នៅចំណុចចម្ងាយពីបង្គោលសីម៉ាលេខ៣២ ប្រហែល១៧០ម៉ែត (ព្រំដែន-កម្ពុជា ) ស្ថិតក្នុងភូមិអូរកំបុត ឃុំគោករមៀត ស្រុកថ្មពួក ។
បើតាមលោកវរសេនីយ៍ឯក ឡុង សំណាង មេបញ្ជាការវរសេនាតូចនគរបាលការពារព្រំដែនលេខ៨០៧ បានឲ្យដឹងថា នៅម៉ោង៨និង៤០នាទីព្រឹក ថ្ងៃទី១១ ខែឧសភា ឆ្នាំ២០២០ មានប្រជាពលរដ្ឋឈ្មោះ ជុំ រស្មី អាយុ៥៣ឆ្នាំ រស់នៅភូមិអូរកំបុត ឃុំគោករមៀត ស្រុកថ្មពួក បានភ្ជួរដីធ្វើចំការ ស្រាប់តែជួបប្រទះឃើញគ្រាប់មីនចំនួន១៥គ្រាប់ ចំងាយពីបង្គោលសីមាលេខ៣២ ប្រហែល១៧០ម៉ែត្រ ហើយក៏បានរាយការណ៍មកកម្លាំងនគរបាលការពារព្រំដែនប៉ុស្តិ៍អូរកំបុតតែម្តង។
លោកមេបញ្ជាការបានបញ្ជាក់ថា ក្រោយពីទទួលបានព័ត៌មានភ្លាម កម្លាំងនគរបាលការពារព្រំដែនប៉ុស្តិ៍អូរកំបុត បានសហការជាមួយកម្លាំងសំអាតមីនអង្គភាពហេឡូត្រាសដ៍ បានចុះទៅពិនិត្យជាក់ស្តែង ហើយក៏បានធ្វើការប្រគល់គ្រាប់មីនទាំងនោះទៅកម្លាំងសំអាតមីនអង្គភាពហេឡូត្រាសដ៍ ដើម្បីយកទៅធ្វើការបំផ្លាញចោលផង បញ្ចៀសការគ្រោះថ្នាក់ដល់ប្រជាពលរដ្ឋ ៕ (កែសម្រួលដោយ ៖ បុប្ផា)
ចែករំលែកព័តមាននេះ