រាជធានីភ្នំពេញ ៖ ឯកឧត្តមឧបនាយករដ្ឋមន្ត្រី ជា សុផារ៉ាជា រដ្ឋមន្ត្រីក្រសួងផែនដីនគរូបនីយកម្ម និងសំណង់បានបញ្ជាក់ថា ទីតាំងក្រសួងដែនដីថ្មីនឹងបង្ហាញពីអត្តសញ្ញាណខ្មែរ ហើយជួយដោះស្រាយការលំបាកនាពេលកន្លងមក ។…
រាជធានីភ្នំពេញ ៖ ឯកឧត្តមឧបនាយករដ្ឋមន្ត្រី ជា សុផារ៉ាជា រដ្ឋមន្ត្រីក្រសួងផែនដីនគរូបនីយកម្ម និងសំណង់បានបញ្ជាក់ថា ទីតាំងក្រសួងដែនដីថ្មីនឹងបង្ហាញពីអត្តសញ្ញាណខ្មែរ ហើយជួយដោះស្រាយការលំបាកនាពេលកន្លងមក ។
លោក ជា សុផារ៉ា បានសរសេរលើបណ្តាញសង្គមផ្ទាល់ខ្លួនយ៉ាងដូច្នេះថា នឹងថៃ្ងទី២៨ មករា ឆ្នាំ២០២០ អគារទីស្តីការក្រសួងរៀបចំដែនដីនគរូបនីយកម្ម និងសំណង់ថ្មីនឹងចាប់ផ្តើមសាងសង់មានទីតាំងស្ថិតនៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ មានកម្ពស់៥ជាន់ សាងសង់នៅលើផ្ទៃដីទំហំ៣ហិកតា មានផ្ទៃក្រឡាសំណង់សរុប៤៩ ៣៨៩ ម៉ែត្រក្រឡា និងក្រឡាផ្ទៃប្រើប្រាស់សរុបប្រមាណ២៦ ៥៦៧ ម៉ែត្រក្រឡា មានផលធៀបក្រឡាផ្ទៃបាតសំណង់៣២.៥៣% ។
លោកបន្តថា អគារនេះមានចំណតរថយន្តប្រមាណ៤៥០កន្លែង ដែលអគារក្រសួងដែនដីសព្វថៃ្ងខ្វះចំណតបង្កការលំបាកដល់ការធើ្វដំណើរ សាលាបដិសណ្ឋារកិច្ច អាហារដ្ឋាន សម្រាប់មន្ត្រីបុគ្គលិក និងលម្ហសួនកណ្តាលអគារ សាលប្រជុំតូចៗ មាន៣០០នាក់ ១៥០នាក់ និងសាលសន្និបាតចំណុះ១៥៨៤នាក់ កន្លែងតម្កល់ឯកសារសុរិយោដី និងរដ្ឋបាលសាលបច្ចេកវិទ្យា មន្ទីរពិសោធន៍ជាតិសំណង់ បន្ទប់សិក្សាបណ្តុះបណា្តលវិជា្ជជីវៈ បណ្ណាល័យកន្លែងកីឡា ។
លោកបញ្ជាក់ថា ៖«អគារទីស្តីការក្រសួងថ្មីនេះមានរចនាបថខ្មែរ រចនាលម្អដោយបុស្បុកប្រាំពីរថ្នាក់ ដំបូលហោជាងមុខដាច់ប្រកបដោយក្បូរក្បាច់ពិពិធវិចិត្ររចនាដែលក្រុមការងារប្រមូលផ្តុំសិក្សាចង់លើកស្ទួយនូវសា្នដៃ លម្អស្ថាបត្យកម្មបុរាណខ្មែរ ។ ដោយឡែកប្លង់បាតមានលម្ហសួនក្នុងអគារ» ។
លោកបានបន្ថែមថា សំណង់នេះជាផ្នែកមួយដ៏សំខាន់ក្នុងការបង្ហាញអត្តសញ្ញាណខ្មែរ និងទម្រង់ស្ថាបត្យកម្មខ្មែរ ក្នុងសម័យតេជោដែលបងា្ហញពីសន្តិភាពស្ថេរភាព ការវិវឌ្ឍ និងសង្គ្រោះសំណង់ប្រភេទនេះឲ្យរស់ឡើងវិញជាសំណង់របស់រដ្ឋទុកតជំនាន់ ! ទីស្តីការក្រសួងដែនដីសព្វថ្ងៃ (ចាស់)រាជរដ្ឋាភិបាលបានប្រគល់អោយមន្ទីរដែនដីរាជធានីភ្នំពេញ ។ សូមជម្រាបថា តាមការសង្កេតទីតាំងក្រសួងដែនដីសព្វថ្ងៃនេះមានភាពចង្អៀត ពិសេសនោះកន្លែងថតរថយន្តដែលពេលខ្លះមានការថតរថយន្តធ្វើឲ្យកកស្ទះចរាចរណ៍ក៏មានដែរ ៕
ចែករំលែកព័តមាននេះ