រាជធានីភ្នំពេញ ៖ ប្រជាពលរដ្ឋ និងសិស្សនិស្សិតកម្ពុជា ដែលកំពុងសិក្សា និងស្នាក់រស់នៅប្រទេសជប៉ុន បានបង្ហាញអារម្មណ៍សប្បាយរីករាយ ដោយបានផ្សព្វផ្សាយលើបណ្ដាញសង្គម យ៉ាងផុសផុល ក្រោយពីពួកគេបានជួប…
រាជធានីភ្នំពេញ ៖ ប្រជាពលរដ្ឋ និងសិស្សនិស្សិតកម្ពុជា ដែលកំពុងសិក្សា និងស្នាក់រស់នៅប្រទេសជប៉ុន បានបង្ហាញអារម្មណ៍សប្បាយរីករាយ ដោយបានផ្សព្វផ្សាយលើបណ្ដាញសង្គម យ៉ាងផុសផុល ក្រោយពីពួកគេបានជួប សម្ដេចមហាបវរធិបតី ហ៊ុន ម៉ាណែត ក្នុងឱកាសដែលសម្ដេចសំណេះសំណាល ជាមួយបងប្អូនប្រជាពលរដ្ឋខ្មែរ នៅទីក្រុងតូក្យូ នាថ្ងៃទី ៣១ ខែឧសភាឆ្នាំ២០២៥ ។
លោក ហែម សេដ្ឋថៃ ជានិស្សិតកំពុងសិក្សានៅប្រទេសជប៉ុន ដែលបានចូលរួមក្នុងកម្មវិធីសំណេះសំណាល បានថ្លែងថា៖ «ខ្ញុំបាទបានចូលរួមក្នុងពិធីសំណេះសំណាល ជាមួយបងប្អូនសហគមន៍ខ្មែរ រស់នៅក្នុងប្រទេសជប៉ុន ។ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា» ។
និស្សិតរូបនេះបានប្ដេជ្ញាចិត្ត ក្នុងការធ្វើជាទូតសុឆន្ទៈរបស់កម្ពុជា នៅលើទឹកដីបរទេស ដើម្បីចូលរួមជាមួយរាជរដ្ឋាភិបាល ក្នុងការផ្សព្វផ្សាយពីសក្តានុពលរបស់ប្រទេសជាតិ តាមរយៈការណែនាំអ្នកជំនួញជប៉ុន មកដាក់ទុនវិនិយោគនៅកម្ពុជា ក៏ដូចជាបង្ហាញពីតំបន់ទេសចរណ៍ ដ៏សំបូរបែបដែលមានការយកចិត្តទុកដាក់ ពីរាជរដ្ឋាភិបាល ។
លោក ហ៊ុន សម ជានិស្សិតខ្មែរកំពុងសិក្សានៅប្រទេសជប៉ុន បាននិយាយថា ការទន្ទឹងរង់ចាំទទួលបដិសណ្ឋារកិច្ច សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត គឺជាក្ដីប្រាថ្នាធំរបស់លោកជាយូមកហើយ ។
លោកបញ្ជាក់ថា៖ «ក្នុងនាមជាប្រជាពលរដ្ឋខ្មែរនៅជប៉ុន ខ្ញុំសូមជូនពរសម្ដេច ឱ្យមានសុខភាពល្អ រាងកាយមាំមួន និងសម្រេចបានជោគជ័យគ្រប់ភារកិច្ច ដើម្បីបន្ដដឹកនាំនាវាកម្ពុជា ឆ្ពោះទៅរកការអភិវឌ្ឍប្រកបដោយចីរភាព និងបរិយាបន្ន ពិសេសសម្រេចបាននៅគោលដៅរបស់កម្ពុជា ក្នុងការប្រែក្លាយកម្ពុជា ឱ្យទៅជាប្រទេសដែលមានប្រាក់ចំណូលមធ្យមកម្រិតខ្ពស់ នៅឆ្នាំ២០៣០ និងប្រទេស ដែលមានប្រាក់ចំណូលកម្រិតខ្ពស់ នៅឆ្នាំ២០៥០» ។
លើសពីនេះ មានក្រុមសមាគមនិស្សិតខ្មែរ ដែលកំពុងសិក្សានៅសកលវិទ្យាល័យ ហ៊ីរ៉ីស៊ីម៉ា បានបង្ហាញពីក្ដីរំភើបរីករាយ នៅក្នុងឱកាសជួបសម្តេចបវរធិបតី ហ៊ុន ម៉ាណែត និងលោកជំទាវ ក្នុងពិធីជួបសំណេះសំណាល ជាមួយបងប្អូនប្រជាពលរដ្ឋខ្មែរ នៅក្នុងប្រទេសជប៉ុន ។
ពួកគេបានលើកឡើងថា៖ «អនុសាសន៍គន្លឹះ ក្នុងនាមជាថ្នាក់ដឹកនាំកំពូលរបស់កម្ពុជា អំពីសំណាក់សម្តេចបវរធិបតី ហ៊ុន ម៉ាណែត និងលោកជំទាវ គឺជាអ្វីដែលយើងខ្ញុំអាចទទួលបានជាបញ្ញាបន្ថែមយ៉ាងប្រសើរបំផុត ។ ក្នុងនោះ យើងខ្ញុំក៏សូមអរគុណឯកឧត្ដមប្រធាន តំបន់ហ៊ីរ៉ូស៊ីម៉ា សម្រាប់ការជួយជ្រែងយ៉ាងខ្លាំង ដល់យើងខ្ញុំជានិស្សិតនៅទីនោះ» ។
គួររំឭកថា សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី នៅថ្ងៃទី៣១ ខែឧសភា ឆ្នាំ២០២៥ បានដឹកនាំគណៈប្រតិភូអញ្ជើញនិវត្តន៍មកដល់កម្ពុជា ដោយសុវត្ថិភាព ក្រោយពីបញ្ចប់ដំណើរទស្សនកិច្ចផ្លូវការ និងការងារនៅប្រទេសជប៉ុន ប្រកបដោយភាពមមាញឹក ជាមួយផ្លែផ្កាជាឧត្តមប្រយោជន៍ខ្ពស់ សម្រាប់ជាតិ និងប្រជាជន ។
សម្តេចមហាបវរធិបតី បានអញ្ជើញចាកចេញពីកម្ពុជា កាលពីថ្ងៃទី២៥ ខែឧសភា ឆ្នាំ២០២៥ ដោយផ្តើមដំណើរទៅកាន់ប្រទេសម៉ាឡេស៊ី ដើម្បីចូលរួមកិច្ចប្រជុំកំពូលអាស៊ានលើកទី៤៦ និងកិច្ចប្រជុំកំពូលពាក់ព័ន្ធ ។
នៅថ្ងៃទី២៨ ខែឧសភា ក្រោយបញ្ចប់ការងារនៅប្រទេសម៉ាឡេស៊ី សម្តេចមហាបវរធិបតី ហ៊ុន ម៉ាណែត ក៏បន្តដឹកនាំគណៈប្រតិភូ ទៅកាន់ប្រទេសជប៉ុន ដើម្បីបំពេញទស្សនកិច្ចផ្លូវការ និងចូលរួមសន្និសីទអន្តរជាតិ លើកទី៣០ ស្តីពី «អនាគតរបស់អាស៊ី ក្នុងពេលដែលពិភពលោក ប្រឈមបញ្ហាច្របូកច្របល់» ៕ អត្ថបទសហការ
ចែករំលែកព័តមាននេះ