រាជធានីភ្នំពេញ ៖ សហភាពពលកម្មជាតិកម្ពុជា (NLC) នៅព្រឹកថ្ងៃទី ៣០ ខែមិថុនានេះ បានដាក់ញាត្តិស្នើសុំទៅស្ថានទូតអាមេរិក ប្រចាំប្រទេសកម្ពុជា ពិនិត្យពិចារណាលើ…
រាជធានីភ្នំពេញ ៖ សហភាពពលកម្មជាតិកម្ពុជា (NLC) នៅព្រឹកថ្ងៃទី ៣០ ខែមិថុនានេះ បានដាក់ញាត្តិស្នើសុំទៅស្ថានទូតអាមេរិក ប្រចាំប្រទេសកម្ពុជា ពិនិត្យពិចារណាលើ របាយការណ៍ញុះញ៉ុងរបស់អង្គការសង់ត្រាល់ដែលធ្វើឱ្យមានការរើសអើង លាបពណ៌នាំឱ្យមានការបែកបាក់ធ្ងន់ធ្ងរ និងនាំឱ្យមានការខូចខាតប្រយោជន៍កម្មករនិយោជិតខ្មែរក្នុងវិស័យកាត់ដេរជិត ១ លាននាក់ ។
លោក តែប តុន អនុប្រធានសហភាពពលកម្មជាតិកម្ពុជា បានឱ្យដឹងថា គោលបំណងនៃរបាយការណ៍របស់ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ បានបង្កឱ្យមានអស្ថេរភាព និងនាំឱ្យខាតប្រយោជន៍បងប្អូនកម្មករ និយោជិត និងសង្គមជាតិទាំងមូល ។ លោកបញ្ជាក់ថា ៖ «ខ្លឹមសារទាំងនោះពាក់ព័ន្ធ និងរបាយការណ៍របស់អង្គការ ILO-BFC និងបញ្ហាដែលកើត ឡើងរវាងសហជីព និងសហជីពក្នុងក្រុមហ៊ុនមួយតែប៉ុណ្ណោះ» ។ លោកថា ខ្លឹមសារនេះមិនស៊ីគ្នា និងចំណងជើង នៃរបាយការណ៍ទាល់តែសោះ ហើយពុំអាចចាត់ទុកថាជាឧបសគ្គរារាំងភាពជា តំណាង សេរីភាពសហជីពទាំងអស់នៅកម្ពុជាឡើយ អាចនិយាយបានថា ជារបាយការណ៍ចោទប្រកាន់ ឬបំប៉ោង បញ្ហាបំភ្លៃការពិតក្នុងហេតុផលកេងចំណេញផ្នែកនយោបាយ ។
តំណាង NLC លោក តែប តុន សង្កេតឃើញថា មានសហព័ន្ធសហជីព និងអង្គការមួយចំនួន ស្ថិតនៅក្រោមការបង្គាប់បញ្ជារបស់អង្គការសង្គមស៊ីវិល ដែលទទួលជំនួយពីបរទេស និងបម្រើនយោបាយឱ្យជនបរទេស ខិលខូចមួយចំនួននៅពីក្រោយខ្នងទៀតផងដែរ ។ ពួកគេតែងញុះញង់ឱ្យសហព័ន្ធសហជីពទាំងនោះ បង្កើតនូវរូបភាព ឬបញ្ហាផ្សេងៗ ដែលពួកគេចង់បានដើម្បីបង្កាច់បង្អួចបំផ្លាញមុខមាត់ប្រទេសជាតិ ខ្លួនឯង លើឆាកអន្តរជាតិ បំផ្លាញសេដ្ឋកិច្ចជាតិ បំផ្លាញសេដ្ឋកិច្ចគ្រួសារ និងធ្វើឱ្យបងប្អូនកម្មករនិយោជិតជួបនូវហានិភ័យ បាត់បង់ការងារ ខាតបង់លុយកាក់ ។
លោកបញ្ជាក់ថា ៖ «សហព័ន្ធសហជីព និងអង្គការ បែបនេះទើបគេឱ្យឈ្មោះថា សហព័ន្ធសហជីព និងអង្គការឯករាជ្យដែលទទួលស្គាល់ដោយក្រុមគេមួយក្ដាប់តូចប៉ុណ្ណោះ ។ សហព័ន្ធ និងអង្គការប្រភេទនេះ តែងតែទទួលបាននូវជំនួយពីបរទេស ធ្វើការឱ្យបរទេស ដើម្បីបំផ្លាញផលប្រយោជន៍រួមរបស់ជនរួមជាតិ និងបំផ្លាញមុខមាត់ប្រទេសជាតិខ្លួនឯង ។» ជាមួយគ្នានោះ សហភាពពលកម្មជាតិកម្ពុជា (NLC) ចង់ឱ្យសង់ត្រាល់ ពិនិត្យមើលចំណងជើងរបាយការណ៍របស់ខ្លួនឡើងវិញ ជៀសវាងជៈឥទ្ធិពលអាក្រក់ ខ្លាំងដល់អារម្មណ៍របស់អ្នកវិនិយោគទុន ដែលមានស្រាប់ និងប៉ះពាល់ដល់អារម្មណ៍ អ្នកវិនិយោគទុនមកថ្មីដែលមានបំណងចង់មកវិនិយោគទុននៅប្រទេសកម្ពុជា ៕ អត្ថបទសហការ
ចែករំលែកព័តមាននេះ