រាជធានីភ្នំពេញ ៖ រដ្ឋបាលទេសចរណ៍តៃវ៉ាន់ កំពុងតែពង្រីកខ្លួនទៅក្នុងទីផ្សារ ដែលកំពុងរីកចម្រើននៅក្នុងអាស៊ីអាគ្នេយ៍ ។ នេះជាលើកទីដំបូងបំផុតដែលគណៈប្រតិភូនឹងមកបំពេញសកម្មភាពផ្សព្វផ្សាយទេសចរណ៍តៃវ៉ាន់ នៅក្នុងប្រទេសកម្ពុជា និងប្រទេសឡាវ ដែលនឹងចាប់ផ្តើមពីថ្ងៃទី…
រាជធានីភ្នំពេញ ៖ រដ្ឋបាលទេសចរណ៍តៃវ៉ាន់ កំពុងតែពង្រីកខ្លួនទៅក្នុងទីផ្សារ ដែលកំពុងរីកចម្រើននៅក្នុងអាស៊ីអាគ្នេយ៍ ។ នេះជាលើកទីដំបូងបំផុតដែលគណៈប្រតិភូនឹងមកបំពេញសកម្មភាពផ្សព្វផ្សាយទេសចរណ៍តៃវ៉ាន់ នៅក្នុងប្រទេសកម្ពុជា និងប្រទេសឡាវ ដែលនឹងចាប់ផ្តើមពីថ្ងៃទី 30 ខែមិថុនា ដល់ថ្ងៃទី 05 ខែកក្កដា ឆ្នាំ 2024 ។ គណៈប្រតិភូដែលមានអ្នកតំណាងឧស្សាហកម្មតៃវ៉ាន់ 30 រូបមកពីអង្គការពាក់ព័ន្ធទេសចរណ៍ចំនួន 16 នឹងធ្វើកម្មវិធីផ្សព្វផ្សាយពីទេសចរណ៍ នៅក្នុងទីក្រុងភ្នំពេញ នៃប្រទេសកម្ពុជា នៅថ្ងៃចន្ទ ទី 01 ខែកក្កដា និងទីក្រុងវៀងច័ន្ទន៍នៃប្រទេសឡាវ នៅថ្ងៃពុធ ទី 03 ខែកក្កដា ឆ្នាំ 2024 ។
អ្នកតំណាងវិស័យទេសចរណ៍ និងអ្នកសារព័ត៌មានក្នុងស្រុកជាង 150 នាក់ ត្រូវបានអញ្ជើញឱ្យចូលរួមក្នុងកម្មវិធីនេះ ដែលពួកគេនឹងទទួលបាននូវបទពិសោធពីនិមិត្តសញ្ញាទេសចរណ៍តៃវ៉ាន់កំណែទម្រង់ 3.0 ដែលមានឈ្មោះថា “តៃវ៉ាន់ – រលកនៃភាពអច្ឆរិយ” តាមរយៈការសម្តែងដ៏អស្ចារ្យ និងសកម្មភាព DIY ។
របាយការណ៍ថ្មីពីក្រសួងទេសចរណ៍របស់ប្រទេសកម្ពុជា បានបង្ហាញថា ប្រជាជនកម្ពុជាចំនួន 1,819,504 នាក់ បានធ្វើដំណើរចេញទៅក្រៅប្រទេសនៅក្នុងឆ្នាំ 2023 ដែលមានកំណើន 87.5% ពីប្រជាជន 970,000 នាក់នៅក្នុងឆ្នាំ 2002 ។ ការចំណាយមធ្យមទៅលើការធ្វើដំណើររបស់មនុស្សម្នាក់ៗគឺលើសពី $300 ដែលគេរំពឹងថានឹងកើនឡើងជារៀងរាល់ឆ្នាំ ។ នៅប្រទេសឡាវ វិស័យទេសចរណ៍គឺជាឧស្សាហកម្មដែលធំជាងគេលំដាប់ទី 2 បន្ទាប់ពីឧស្សាហកម្មជីករ៉ែ ។ រដ្ឋាភិបាលឡាវបានបើកបង្ហាញផែនការសម្រាប់ស្តារវិស័យទេសចរណ៍នៅប្រទេសឡាវចាប់ពីឆ្នាំ 2021 ដល់2025 ដោយព្យាករណ៍ថាការចូលរួមចំណែករបស់វិស័យទេសចរណ៍នឹងធ្វើឱ្យ GDP កើនឡើងដល់ 41.3% នៅឆ្នាំ 2025 ។
ដោយមានការរីកចម្រើនសេដ្ឋកិច្ចខ្លាំង និងការគាំទ្រពីរដ្ឋាភិបាលសម្រាប់វិស័យទេសចរណ៍ក្នុងប្រទេសកម្ពុជា និងប្រទេសឡាវ ការធ្វើដំណើរទៅក្រៅប្រទេសបានកំណត់ឱ្យក្លាយទៅជានិន្នាការដ៏សំខាន់មួយ ។ តៃវ៉ាន់ត្រូវតែចាប់យកឱកាសនេះ ដើម្បីបង្កើតទីតាំងឈរជើង និងទទួលបានការប្រកួតប្រជែងក្នុងទីផ្សារដែលកំពុងរីកចម្រើនទាំងនេះ ។
សិក្ខាសិលាស្តីពីទេសចរណ៍តៃវ៉ាន់នឹងប្រព្រឹត្តទៅនៅក្នុងទីក្រុងភ្នំពេញ ប្រទេសកម្ពុជា និងទីក្រុងវៀងច័ន្ទន៍ ប្រទេសឡាវ ។ អ្នកជំនាញក្នុងឧស្សាហកម្ម និងអ្នកសារព័ត៌មានជាង 150 នាក់នឹងចូលរួមក្នុងសិក្ខាសិលានេះ ដោយផ្តោតសំខាន់ទៅលើរបៀបរស់នៅក្នុងទីក្រុង និងទេសចរណ៍ក្នុងតំបន់ ។
កម្មវិធីនេះនឹងមានបង្ហាញពីកន្លែងដំណើរកម្សាន្តដ៏ពេញនិយមរបស់តៃវ៉ាន់ និងកន្លែងទាក់ទាញភ្ញៀវទេសចរ ។ លើសពីនេះទៀត សិក្ខាសាលានេះនឹងផ្តោតលើកម្មវិធីផ្សេងៗដូចជា “ការពន្លឿន និងពង្រីកកម្មវិធីផ្សព្វផ្សាយទេសចរណ៍ក្នុងស្រុក” “កម្មវិធីតៃវ៉ាន់ ដែនដីនាំសំណាង” និង “កម្មវិធីសំបុត្រតៃវ៉ាន់” ដែលជាសំបុត្របញ្ចុះតម្លៃបែបអេឡិចត្រូនិចដែលរួមបញ្ចូលទាំងសេវាកម្មរថភ្លើងល្បឿនលឿន រថភ្លើងក្រោមដី (MRT) និងសេវាកម្មរថយន្តទេសចរណ៍តៃវ៉ាន់ ។
កម្មវិធីនេះនឹងមានបង្ហាញការសម្តែង ពីក្រុមរាំអន្តរជាតិដ៏ល្បីពីតៃវ៉ាន់ សិល្បៈសប្បាយៗដូចជាការសម្តែង “ពិធីបុណ្យតន្រី្តតៃវ៉ាន់ 2.0” និង ”កម្មវិធីបំភ្លឺភ្លើង Illuminating តៃវ៉ាន់” ដែលនឹងមានការប្រគំតន្រី្តបុរាណតៃវ៉ាន់ ដើម្បីរំលេចវប្បធម៌ទំនើបរបស់តៃវ៉ាន់។ អ្នកចូលរួមទាំងអស់អាចចូលរួមលេងការបោះពុម្ពបែប Eco-friendly និងសកម្មភាព DIY ជាច្រើន ដូចជាការបង្កើតភ្លើងណេអុងក្នុងទម្រង់ជាតែគុជ និងការ៉េមស្វាយ។ សកម្មភាពទាំងនេះធ្វើឡើងក្នុងគោលបំណងចាប់យកសោភណភាព និងភាពអស្ចារ្យរបស់តៃវ៉ាន់ដោយឆ្លុះបញ្ចាំងលើកំណែទម្រង់ 3.0 នៃនិមិត្តសញ្ញាទេសចរណ៍តៃវ៉ាន់ “តៃវ៉ាន់ – រលកនៃភាពអច្ឆរិយ” ៕ អត្ថបទសហការ
ចែករំលែកព័តមាននេះ