ខេត្តពោធិ៍សាត់, ថ្ងៃទី ២១ ខែមិថុនា ឆ្នាំ ២០២៤ ៖ អង្គភាពជំនាញនៃអគ្គិសនីកម្ពុជា រួមមាន លោកគ្រូជំនួយការ ន.អ.ច ប្រធានអង្គភាពរោងជាងជួសជុល ប្រធានអង្គភាពបរិធាន ប្រធានការិ.បច្ចេកទេសសម្ភារ-បរិក្ខារអគ្គិសនី ប្រធានផ្នែកការិ.បច្ចេកទេសសម្ភារ-បរិក្ខារអគ្គិសនី ប្រធានផ្នែកជួសជុលត្រង់ស្វូរ ប្រធានផ្នែកប្រព័ន្ធរ៊ឺឡេ ប្រធានក្រុមការិ.បច្ចេកទេសចែកចាយ និយោជិតអង្គភាពបណ្តាញ និងនិយោជិតការិ.ផែនការផ្គត់ផ្គង់សម្ភារ នៃអគ្គិសនីកម្ពុជា បានធ្វើដំណើរទស្សនកិច្ចរោងចក្រផលិតត្រង់ស្វូរសម្រាប់ឧបករណ៍វាស់ស្ទង់ (CT VT) ដំបូងគេបង្អស់ក្នុងព្រះរាជាណាច្រកម្ពុជា របស់ក្រុមហ៊ុនព្រីសាយស៍ អេឡិកទ្រីក មេនូហ្វេកឆឺរីង (ខេមបូឌា) ឯ.ក ។
ថ្នាក់ដឹកនាំនៃក្រុមហ៊ុនព្រីសាយស៍ បានធ្វើបទបង្ហាញអំពីប្រវត្តិនៃក្រុមហ៊ុន ក៏ដូចជាបានដឹកនាំក្នុងការទសន្សកិច្ចខ្សែសង្វាក់ផលិតកម្ម ថែមទាំងបានផ្តល់នូវព័ត៌មានយ៉ាងក្បោះក្បាយទាក់ទងនឹងការដំណើរការនៃការផលិតត្រង់ស្វូរសម្រាប់ឧបករណ៍វាស់ស្ទង់ (CT VT) ផងដែរ ។
ក្រុមហ៊ុនព្រីសាយស៍ អេឡិកទ្រីក មេនូហ្វេកឆឺរីង (ខេមបូឌា) ឯ.ក (PEMC) ជាក្រុមហ៊ុនបុត្រសម្ព័ន្ធរបស់ក្រុមហ៊ុន Precise Cooperation Co.,Ltd. (Public) នៃព្រះរាជាណាចក្រថៃឡង់ដ៏ ដែលមានអាសយដ្ឋាននៅស្រុកក្រគរ ខេត្តពោធិ៍សាត់ ព្រះរាជាណាចក្រកម្ពុជា ។ ក្រុមហ៊ុនព្រីសាយស៍ បានចាប់ផ្តើមដំណើរការចាប់តាំងពីថ្ងៃទី ២៦ ខែកុម្ភៈ ឆ្នាំ ២០២៣ ដោយប្រកបអាជីវកម្មក្នុងការផលិត និងផ្គត់ផ្គង់ត្រង់ស្វូរចែកចាយ ត្រង់ស្វូរសម្រាប់ឧបករណ៍វាស់ស្ទង់ និងផ្គុំដំឡើង Switchboard ដែលសុទ្ធសឹងតែមានគុណភាពកម្រិតស្តង់ដារអន្តរជាតិ ។
អស់រយៈពេលជាងមួយឆ្នាំ PEMC បានដំណើរការផលិតត្រង់ស្វូរអគ្គិសនី (Transformer) ដែលមានម៉ាក “PRECISE” និងបានផ្គត់ផ្គង់នៅលើទីផ្សារនៃព្រះរាជាណាចក្រកម្ពុជា ដោយទទួលបានការបញ្ជាទិញជាង ២ លានដុល្លារអាមេរិក ព្រមទាំងបានធ្វើការអភិវឌ្ឍនូវខ្សែសង្វាក់ផលិតកម្ម អភិវឌ្ឍចំណេះ និងជំនាញរបស់កម្មករនិយោជិតឱ្យកាន់តែមានភាពច្បាស់លាស់ និងល្អប្រសើរឡើងជារឿយៗ ថែមទាំងទទួលបានភាពជោគជ័យក្នុងការដំណើរការទៅលើការចុះបញ្ជីក្នុង Brand Name List ជាមួយនឹងអគ្គិសនីកម្ពុជាផងដែរ ។
ជាលទ្ធផលនៃការអភិវឌ្ឍជាបន្តបន្ទាប់ នាពេលបច្ចុប្បន្ននេះ PEMC បានត្រៀមខ្លួនរួចជាស្រេចក្នុងការផលិត និងផ្គត់ផ្គង់ផលិតផល “ត្រង់ស្វូរសម្រាប់ឧបករណ៍វាស់ស្ទង់” ដែលព្រីសាយស៍ជារោងចក្រផលិត CT VT ដំបូងគបង្អស់ក្នុងព្រះរាជាណាចក្រកម្ពុជា។ ទាំងនេះហើយដែលជាឱកាសធ្វើឱ្យព្រីសាយស៍អាចពង្រីកខ្លួននៅលើទីផ្សារ ថែមទាំងអាចឆក់យកឱកាសដើម្បីក្លាយជារោងចក្រដែលឈានមុខគេក្នុងការផលិត និងផ្គត់ផ្គង់ត្រង់ស្វូរសម្រាប់ឧបករណ៍វាស់ស្ទង់ ។
យ៉ាងណាមិញ PEMC បេ្តជ្ញាក្នុងការអភិវឌ្ឍផលិតផល និងសេវាកម្មឱ្យបានស្របទៅនឹងតម្រូវការរបស់ទីផ្សារ នៅក្នុងព្រះរាជាណាចក្រកម្ពុជា ដោយសង្ឃឹមយ៉ាងមុតមាំថានឹងអាចទទួលបានចំណូលច្រើនជាងមុន ២ ដង និងអាចក្លាយជាក្រុមហ៊ុនដែលឈានមុខគេក្នុងទីផ្សារឧស្សាហកម្មអគ្គិសនីនៃព្រះរាជាណាចក្រកម្ពុជា ព្រមទាំងការបង្កើតការងារ និងប្រាក់ចំណូលដល់ប្រជាជន ក្នុងខេត្តពោធិ៍សាត់ផងដែរ ៕ អត្ថបទសហការ
ចែករំលែកព័តមាននេះ