ខេត្តកំពង់ស្ពឺ ៖ មិនដឹងជាភរិយាស្អាតពេកក៏មិនដឹង ទើបសុភមង្គលត្រូវបានអ្នកទី៣បំផ្លាញនោះទេ ប៉ុន្តែជាការពិតតណ្ហារបស់មនុស្សពិតជាមិនអាចវាស់បានទ្បើយ ។ រឿងរ៉ាវសេ្នហារបស់អតីតជំទប់ទី១ សង្កាត់រកាធំ ក្រុងច្បារមន ខេត្តកំពង់ស្ពឺ គឺជាបញ្ហាឈឺចាប់មួយរបស់បុរសជាប្តីដែលភរិយាទៅលួចសហាយស្មន់ជាមួយមន្ត្រីប៉ូលិសម្នាក់ ។ ប្រឈមនឹងការរលត់ភ្លើងសេ្នហ៍នេះ ប្រពន្ធជាទីស្រទ្បាញ់ក៏បានវេចបង្វេច និងយកទ្រព្យសម្បត្តិមួយចំនួនចុះចេញពីផ្ទះជាច្រើនខែមកហើយ ដោយបន្សល់ទុកកូនប្រុសអាយុ២១ខែ ឱ្យលោកអតីតជំទប់ទី១ មើលថែរក្សាយ៉ាងកណ្តោចកណ្តែង២នាក់នឹងកូនថែមទៀត ។
ជួបជាមួយអ្នកយកព័ត៌មានកោះសន្តិភាពនៅក្នុងបរិវេណសាលាសង្កាត់រកាធំ លោក វ៉ាន់ ស៊ីធឿន អាយុ៤២ឆ្នាំ សព្វថ្ងៃរស់នៅភូមិត្រពាំងលើក សង្កាត់រកាធំ ក្រុងច្បារមន បានរៀបរាប់ដំណើររឿងដោយបីកូនប្រុសនៅនឹងដៃ ព្រោះម្តាយរត់ចោលថា កាលពីដើមឆ្នាំ២០០៨ កាលនោះលោកជាជំទប់ទី១ បានរៀបចំសែនព្រេនជាមួយស្ត្រីឈ្មោះ មូល ស្រីមុំ អាយុ៣៤ឆ្នាំ ចាប់ដៃគ្នាដោយស្មោះស័្មគ្រប្តូរផ្តាច់ជាប្តីប្រពន្ធ ។ ចំណងស្នេហាដ៏ផ្អែមត្រជាក់បានផ្តល់កូនប្រុសម្នាក់ជាចំណងដៃ ពេលនេះកូនមានអាយុ២១ខែហើយ ។ លោកក៏បានសង់ផ្ទះ និងបើកហាងកាហ្វេមួយនៅមុខសាលាសង្កាត់ និងប៉ុស្តិ៍ប៉ូលិសសង្កាត់រកាធំ ។ ការចេញលក់កាហ្វេរបស់ភរិយាលោកនោះ មិនដឹងថា មានទាក់ទងបែបណាជាមួយមន្ត្រីប៉ូលិសម្នាក់នេះទេ ស្រាប់តែភរិយាជាទីស្រទ្បាញ់ បានលួចសហាយស្មន់ជាមួយមន្ត្រីប៉ូលិសដែលមានទីលំនៅក្នុងសង្កាត់រកាធំ ក្រុងច្បារមន ។
ការផិតក្បត់នោះ លោក វ៉ាន់ ស៊ីធឿន និយាយថា ភរិយាលោកបានលួចដើរលេង និងចូលច្រៀងខារ៉ាអូខេកៀកកើយគ្នា ហើយលោកជាប្តីបានតាមទាន់ជាច្រើនដងថែមទៀតផង ។ ទោះបីជាបែបនេះក្តី លោកមិនរករឿងប្រពន្ធទេនិងមានការអនុគ្រោះអត់ធ្មត់ មិនទ្បូទ្បានៅហាងខារ៉ាអូខេនោះទេ ដើម្បីផ្តល់កិត្តិយសដល់ភរិយាណាមួយមិនចង់ឱ្យមានរឿងអាស្រូវនាំខ្មាសញាតិមិត្តជិតឆ្ងាយ។
លោកអតីតជំទប់ទី១ រូបនេះបានរៀបរាប់ថា លោកព្យាយាមរំលត់ភ្លើងខុសតម្រារបស់ភរិយា ព្រោះខ្មាសអ្នកជិតខាង ដោយសារតែគេចេះតែលួចប្រាប់ ប៉ុន្តែប្រពន្ធលោកនៅតែរឹងទទឹងមិនស្តាប់ ទោះបីលោកមានការលើកលែងម្តងជា២ដងក្តី ។
លោកអតីតជំទប់ទី១បន្តទៀតថា ប្រពន្ធរបស់លោកមិនមែនជាស្ត្រីក្រមុំនោះទេ គឺធ្លាប់មានប្តី ហើយមានជាមួយប្តីមុនកូនស្រី២នាក់ កូនច្បងមានអាយុ១៦ឆ្នាំទៅហើយ និងបច្ចុប្បន្នកំពុងរស់នៅជាមួយលោកផងដែរ ។ ស្រាប់តែនៅថ្ងៃទី៨ មករា ឆ្នាំ២០១៤ ប្រពន្ធដែលមានចិត្តផិតក្បត់ បានចុះចេញពីផ្ទះ និងប្រមូលសម្ភារក្នុងផ្ទះអស់ រួមទាំងកូន២នាក់របស់គេជាមួយប្តីមុនទៅបាត់ទៀត ដោយបន្សល់ទុកតែកូនប្រុសអាយុ២១ខែឱ្យលោកចិញ្ចឹមបីបាច់តែម្នាក់ឯង ខណៈដែលកូនអាយុក្មេងខ្ចីបែបនេះ ត្រូវការអ្នកម្តាយជាទីកក់ក្តៅក្តី ។
ជាមួយនឹងការចុះចេញពីផ្ទះនោះ លោក វ៉ាន់ ស៊ីធឿន និយាយថា ប្រពន្ធក៏បានដាក់ពាក្យបណ្តឹងសុំលែងលះទៅសាលាដំបូងខេត្តថែមទៀតផង ដែលលោកចោទថាព្រោះតែមានគំនិតចង់បានទ្រព្យសម្បត្តិថែមទៀត ។ លោកបានបញ្ជាក់ទៀតថា នៅថ្ងៃទី១៤ មិថុនា ឆ្នាំ២០១៤ លោកបានដាក់ពាក្យសុំដីកាសម្រេចរក្សាការពារដើម្បីហាមឃាត់ប្រពន្ធឈ្មោះ មូល ស្រីមុំ មិនឱ្យលក់ដូរ ជួលបញ្ចាំ ផ្ទេរសិទ្ធិ ធ្វើអំណោយដល់អ្នកដទៃ នូវផ្ទះលក់កាហ្វេខាងលើ រួមទាំងសម្ភារសម្អាងការមានតម្លៃ៣៥០០ដុល្លារ និងរថយន្តសាំយ៉ុង១គ្រឿង ។
តាមការអះអាងរបស់លោកអតីតជំទប់ទី១ថា នៅថ្ងៃទី៣០ មិថុនា កន្លងមកនេះ លោក ឈឹម ឫទ្ធី ចៅក្រមសាលាដំបូងខេត្ត បានចេញដីកាសម្រេចរក្សាការពារដោយហាមឃាត់មិនឱ្យមានការលក់ដូរ ផ្ទេរសិទ្ធិ ឬបញ្ចាំដូចការស្នើសុំរបស់លោក ។
កោះសន្តិភាពបានព្យាយាមទាក់ទងទៅស្ត្រីឈ្មោះ មូល ស្រីមុំ ជាប្រពន្ធលោក វ៉ាន់ ស៊ីធឿន ដែលរងការចោទប្រកាន់ពីករណីសហាយស្មន់នេះ តែមិនអាចសុំការបំភ្លឺបានទេ ។ ប៉ុន្តែសម្រាប់មន្ត្រីប៉ូលិសដែលត្រូវបានអតីតលោកជំទប់ទី១ ចោទប្រកាន់នោះ បានច្រានចោលការចោទប្រកាន់របស់លោក វ៉ាន់ ស៊ីធឿន ទាំងស្រុងដោយអះអាងថា លោកគ្រាន់តែជាភ្ញៀវទៅផឹកកាហ្វេ ដែលមានទីតាំងនៅមុខប៉ុស្តិ៍ជាធម្មតា ដោយមិនបានទាក់ទងស្នេហាជាមួយប្រពន្ធលោក វ៉ាន់ ស៊ីធឿន នោះទេ ពីព្រោះលោកក៏មានប្រពន្ធ និងកូន២នាក់ដែរ ។
ចំពោះលោក វ៉ាន់ ស៊ីធឿន ក៏បានបង្ហើបពីជីវិតផ្ទាល់ខ្លួនរបស់លោកថា មុនរៀបសែនព្រេនជាមួយប្រពន្ធឈ្មោះ មូល ស្រីមុំ នេះលោកក៏ធ្លាប់មានប្រពន្ធមុន និងកូនប្រុស៥នាក់ដែរ ។ ចំណែកប្រពន្ធក្រោយឈ្មោះ មូល ស្រីមុំ ក៏បានទៅសុំប្រពន្ធដើមរបស់គាត់ធ្វើជាប្រពន្ធចុង ហើយប្រពន្ធដើមរបស់គាត់ក៏បានយល់ព្រមដែរ គឺដូចជាធ្លាប់ឆ្លងកាត់ជាមួយប្តីគេ ក្លាយជាបទពិសោធន៍ទៅហើយ ៕
ចែករំលែកព័តមាននេះ