ខេត្តរតនគិរី ៖ បើតាមសេចក្តីរាយការណ៍ព័ត៌មានពីអ្នកឆ្លើយឆ្លងព័ត៌មានកោះសន្តិភាព ប្រចាំខេត្តរតនគិរិ បានឱ្យដឹងថា ក្រុមឈ្មួញរកស៊ីឈើប្រណីតធំៗ ចំនួនពីបីនាក់បានទៅប្រមូលឈើប្រណីតពីស្រុកតាវែងដឹកតាមរថយន្តធុនត្រា ឆ្ពោះទៅកាន់ស្រុកអណ្តូងមាស ហើយកាត់តាមច្រករបៀងបាសៅ និងច្រករបៀងបាតាម
ខេត្តរតនគិរី ៖ បើតាមសេចក្តីរាយការណ៍ព័ត៌មានពីអ្នកឆ្លើយឆ្លងព័ត៌មានកោះសន្តិភាព ប្រចាំខេត្តរតនគិរី បានឱ្យដឹងថា ក្រុមឈ្មួញរកស៊ីឈើប្រណីតធំៗ ចំនួនពីបីនាក់បានទៅប្រមូលឈើប្រណីតពីស្រុកតាវែងដឹកតាមរថយន្តធុនត្រា ឆ្ពោះទៅកាន់ស្រុកអណ្តូងមាស ហើយកាត់តាមច្រករបៀងបាសៅ និងច្រករបៀងបាតាម ។
ជាក់ស្តែងនៅវេលាម៉ោង ៨និង៣០នាទីយប់ថ្ងៃទី ១កក្កដា ២០១៤នេះគេសង្កេតឃើញក្រុមឈ្មួញដ៍មានឥទ្ធិពលទាំងអស់នេះបានចេញរថយន្តធុនត្រាចំនួន៤គ្រឿងនិងគោយន្តចំនួន២គ្រឿង ដឹកឈើប្រណីតទៅកាន់ច្រករបៀងខាងលើដើម្បីឆ្លងទៅលក់នៅប្រទេសវៀតណាម ។ បើតាមប្រភពព័ត៌មានពីឈ្មួញរកស៊ីឈើតូចតាចនៅក្នុងស្រុកបានបង្ហើបឱ្យដឹងថាដើម្បីដឹកឈើប្រណីតទាំងអស់នោះបានទៅដល់ច្រករបៀងបាសៅ និងច្រករបៀងបាតាមខាងលើ គឺក្រុមឈ្មួញទាំងអស់នោះត្រូវចំណាយក្នុងមួយរថយន្តធុនត្រា ៣០០០ដុល្លារ។
ដោយឡែកនៅក្នុងស្រុកវឺនសៃ វិញសកម្មភាពដឹកឈើប្រណីតរបស់ឈ្មួញក៏មានសកម្មភាពមមាញឹកគួរឱ្យចាប់អារម្មណ៍ដែរដោយក្រុមឈ្មួញរកស៊ីឈើប្រណីតទាំងអស់នោះបានប្រើប្រាស់រថយន្តស៊េរីទំនើបៗដូចជារថយន្តធុនត្រា ឡង់គ្រីស័រ និងមានប្រភេទរថយន្តតាកូម៉ា ទួសរីសជាដើមដើម្បីដឹកជញ្ជូនឈើប្រណីតទាំងនោះទៅកាន់ច្រករបៀងលេខ១៩ ក្រោយកាស៊ីណូ និងច្រកទ្វារអន្តរជាតិអូរយ៉ាដាវ ឆ្ពោះទៅកាន់ប្រទេសវៀតណាម ។
គួរបញ្ជាក់ផងដែរថា រយៈពេល៣ទៅ៤ខែនេះនៅច្រករបៀងនៅក្នុងស្រុកអណ្តូងមាសជារៀងរាល់យប់ក្រុមឈ្មួញរកស៊ីឈើប្រណីតទាំងអស់នោះបានធ្វើសកម្មភាពដឹកឈើប្រណីតតាមរថយន្តធុនត្រា ឆ្ពោះទៅកាន់ប្រទេសវៀតណាមមានចំនួនពី១០ទៅ២០គ្រឿង ចំណែកឯចំណែកឯប្រភពឈើចេញពីស្រុកវឺុនសៃវិញក៏មានសកម្មភាពដឹកជញ្ជូនក្នុងមួយយប់ពី១០ទៅ១៥រថយន្តផងដែរ។
សេចក្តីរាយការណ៍ដដែលបានឱ្យដឹងថា បច្ចុប្បន្នក្រុមឈ្មួញធំៗទាំងអស់នេះគឺកំពុងសប្បាយដឹកឈើប្រណីតឆ្ពោះទៅកាន់ប្រទេសវៀតណាម ខណៈពេលដែលសមត្ថកិច្ចចំនួន៤២ស្ថាប័នកំពុងដេកលង់លក់និងរវល់រាប់លុយក្នុងមួយខែរាប់មឺុនដុល្លារ ។
ចែករំលែកព័តមាននេះ