រាជធានីភ្នំពេញ ៖ ថ្លែងពីទឹកដីខេត្តព្រៃវែង ដោយផ្តាំទៅក្រុមប្រឆាំងសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានថ្លែងឱ្យដឹងថា សភានឹងកោះប្រជុំវិសាមញ្ញ នៅថ្ងៃទី១១…
រាជធានីភ្នំពេញ ៖ ថ្លែងពីទឹកដីខេត្តព្រៃវែង ដោយផ្តាំទៅក្រុមប្រឆាំងសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានថ្លែងឱ្យដឹងថា សភានឹងកោះប្រជុំវិសាមញ្ញ នៅថ្ងៃទី១១ ខែកក្កដា ឆ្នាំ២០២៥ខាងមុខនេះ ដើម្បីធ្វើវិសោធនកម្មរដ្ឋធម្មនុញ្ញដកសញ្ជាតិ ចំពោះបុគ្គលណាឃុបឃិតជា មួយបរទេស ដើម្បីបំផ្លាញផលប្រយោជន៍ជាតិខ្មែរ។
ថ្លែងនាឱកាសអញ្ជើញជួបសំណេះសំណាលជាមួយ សិស្ស និស្សិត លោកគ្រូ អ្នកគ្រូ នៅមជ្ឈ មណ្ឌលអប់រំ និងបណ្ដុះបណ្ដាល ជា ស៊ីម កំចាយមារ ខេត្តព្រៃវែង នៅថ្ងៃទី៣ ខែកក្កដា ឆ្នាំ២០២៥ សម្ដេចតេជោលើកឡើងថា វិសោធនកម្មរដ្ឋធម្មនុញ្ញ ដើម្បីដកសញ្ជាតិ គឺអាចធ្វើទៅរួច ដោយក្រុមប្រឹក្សាធម្មនុញ្ញបានពិនិត្យរួចរាល់ហើយដែល។
សម្ដេចតេជោ ហ៊ុន សែន បានគូសបញ្ជាក់យ៉ាងដូច្នេះថា ៖«សភា នឹងកោះប្រជុំវិសាមញ្ញ នៅថ្ងៃទី១១ ខែកក្កដា នេះហើយ។ រដ្ឋធម្មនុញ្ញនឹងត្រូវបានកែ ដើម្បីផ្ដល់ឱកាសសម្រាប់ការដកសញ្ជាតិ។ អ្នកឯងឃុបឃិតជាមួយបរទេសប្រឆាំងខ្មែរ»។
សម្ដេចតេជោបានបន្ដថា ព្រោះថា លើកនេះ សំណើរួមគ្នារវាង រដ្ឋសភាទាំង ១២៥រូប នឹងរាជ រដ្ឋាភិបាល ស្នើសុំ ព្រះមហាក្សត្រ និងត្រូវបានព្រះអង្គសួរទៅក្រុម ប្រឹក្សាធម្មនុញ្ញរួចរាល់ផងដែរ។ ក្រុមប្រឹក្សាធម្មនុញ្ញកាលពីថ្ងៃទី២ ខែកក្កដា បានបើកកិច្ចប្រជុំ ពេញអង្គក្រាបបង្គំទូលថ្វាយអង្គព្រះមហាក្សត្រ ពាក់ព័ន្ធនឹងការធ្វើវិសោធនកម្មមាត្រា៣៣នៃរដ្ឋធម្មនុញ្ញ ដោយបានបង្គំទូលថ្វាយថា ការធ្វើវិសោធនកម្មមាត្រា ៣៣នៃរដ្ឋធម្មនុញ្ញប្រទេសកម្ពុជា «អាចធ្វើទៅបាន»។
សូមរំលឹកថា កាលពីថ្ងៃទី២៧ ខែមិថុនា ឆ្នាំ២០២៥កន្លងមក សម្តេចតេជោ ហ៊ុន សែន ប្រធានព្រឹទ្ធ សភាកម្ពុជា ស្នើឯកឧត្តម កើត រិទ្ធ ឧបនាយករដ្ឋមន្ដ្រី រដ្ឋមន្ត្រីក្រសួងយុត្តិធម៌ ពិចារណាធ្វើវិសោធ នកម្មច្បាប់ដកសញ្ជាតិខ្មែរ ជនទាំងឡាយណាឃុបឃិត ជាមួយបរទេស បំផ្លាញខ្មែរ។ ការស្នើរបស់ សម្ដេចតេជោ ហ៊ុន សែន ប្រធានព្រឹទ្ធសភា បានកើតឡើងចំពេលក្រុមប្រឆាំង ជ្រុលនិយម ជាជនជាតិខ្មែរមួយក្តាប់តូចរស់នៅបរទេស បាននិងកំពុងវាយប្រហារជាតិឯង ក្នុងចេតនាបំបាក់ទឹកចិត្ត និងធ្វើឱ្យប៉ះពាល់ដល់កិត្តិយសជាតិ ក្នុងកាលៈទេសៈ កម្ពុជាកំពុង កើតមានជម្លោះព្រំដែនជាមួយថៃ។
ជាការកត់សម្គាល់ គេសង្កេតឃើញថា ក្រុមប្រឆាំងនៅក្រៅប្រទេសមួយចំនួនដែលមានសញ្ជាតិខ្មែរ បានធ្វើការវាយប្រហារខុសពីការពិតមកលើថ្នាក់ដឹកនាំ៕
ចែករំលែកព័តមាននេះ