រាជធានីភ្នំពេញ ៖ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានគូសបញ្ជាក់ថាការបើកច្រកអន្ដរជាតិម៉ឺនជ័យ ស្ថិតនៅស្រុកកំចាយមារ ខេត្តព្រៃវែង គោលដៅសំខាន់នោះ…
រាជធានីភ្នំពេញ ៖ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានគូសបញ្ជាក់ថាការបើកច្រកអន្ដរជាតិម៉ឺនជ័យ ស្ថិតនៅស្រុកកំចាយមារ ខេត្តព្រៃវែង គោលដៅសំខាន់នោះ ដើម្បីជំរុញការតភ្ជាប់សេដ្ឋកិច្ចកម្ពុជា-វៀតណាម ខណៈទំហំពាណិជ្ជកម្មរវាងប្រទេសទាំងពីរបានកើនឡើង១០ពាន់លានដុល្លារហើយ ។
ថ្លែងនាឱកាសអញ្ជើញជួបសំណេះសំណាលជាមួយ សិស្ស និស្សិត លោកគ្រូ អ្នកគ្រូ នៅមជ្ឈមណ្ឌលអប់រំ និងបណ្ដុះបណ្ដាល ជា ស៊ីម កំចាយមារ ខេត្តព្រៃវែង នៅថ្ងៃទី៣ ខែកក្កដា ឆ្នាំ២០២៥ សម្ដេចតេជោ ហ៊ុន សែន បានគូសបញ្ជាក់យ៉ាងដូច្នេះថា «ការបើកច្រកម៉ឺនជ័យគោលដៅសំខាន់ គឺជំរុញការតភ្ជាប់សេដ្ឋកិច្ច ដែលបញ្ហាពាណិជ្ជកម្ម ការផ្លាស់ប្ដូរទំនិញ ការទៅមករកគ្នា គឺជាគោលដៅធំរបស់យើង ។ អញ្ចឹងទេ សង្ឃឹមថា ក្នុងខេត្តព្រៃវែងនេះ នឹងមានការផ្លាស់ប្ដូរពាណិជ្ជកម្មកើនឡើង តាមរយៈបើកច្រកថ្មី អន្ដរជាតិម៉ឺនជ័យនេះ» ។
ជាមួយគ្នានោះដែរ សម្ដេចតេជោបានបន្ដថា នៅពេលបើកសម្ពោធជាផ្លូវការនូវច្រកទ្វារអន្ដរជាតិម៉ឺនជ័យហើយ កម្ពុជាអាចទាក់ទាញអ្នកវិនិយោគ ឬដឹកជញ្ជូនទៅវិញទៅមក រវាង កម្ពុជា-វៀតណាម ។ ខណៈដែលការដោះដូរទំនិញរវាងប្រទាំងពីរ(កម្ពុជា-វៀតណម) សម្ដេចតេជោប្រធាន ព្រឹទ្ធសភាបានលើកឡើងថា៖ «ទំហំពាណិជ្ជកម្មរវាង កម្ពុជា-វៀតណាម គឺបានឆ្លងផុត ហួសពីកម្រិត១០ពាន់លានដុល្លារហើយ» ។
លើសពីនេះ សម្ដេចប្រធានព្រឹទ្ធសភាបានឱ្យដឹងថា កាលពីថ្ងៃទី២៩ ខែមេសា កន្លងទៅ រដ្ឋមន្ដ្រីក្រសួងពាណិជ្ជកម្ម កម្ពុជាបានចុះហត្ថលេខាជាមួយរដ្ឋមន្ដ្រីពាណិជ្ជកម្ម វៀតណាម តំឡើងកម្រិតដាក់ចេញគោលដៅ២០ពាន់លានដុល្លារ។
សូមជម្រាបថា ខេត្តព្រៃវែងគ្រោងរៀបចំកិច្ចប្រជុំពិភាក្សាជាមួយអាជ្ញាធរខេត្តតៃនីញអំពីពិធីសម្ពោធដាក់ឱ្យប្រើប្រាស់ជាផ្លូវការនូវច្រកទ្វារព្រំដែនអន្តរជាតិម៉ឺនជ័យ-តឺនណា ក្រោមអធិបតីភាពពីថ្នាក់ដឹកនាំនៃប្រទេសទាំងពីរ ។ ច្រទ្វារនេះ មានទំហំផ្ទៃដីសរុបចំនួន ៨៩,៥៧៧ម៉ែត្រការ៉េ ដោយបានដោះស្រាយផលប៉ះពាល់ជូនអ្នកពាក់ព័ន្ធបានរួចរាល់នៅឆ្នាំ២០២០៕
ចែករំលែកព័តមាននេះ