រាជធានីភ្នំពេញ ៖ ចាប់ពីថ្ងៃទី២០ ឧសភា នេះតទៅមជ្ឈមណ្ឌលវប្បធម៌បារាំងនឹងរៀបចំពិព័រណ៍សិល្បៈចម្លាក់ធ្វើអំពីផ្ដៅ ដែលជាស្នាដៃដ៏ចំណានរបស់លោកពេជ្រ សុភាពវិចិត្រករខ្មែរដែលទទួលបានសញាប្រ័តផ្នែកវិចិត្រកម្មនៅសាកលវិទ្យាល័យម៉ាសាឈូសេត និងនៅវិទ្យាស្ថានសិល្បៈនៃទីក្រុងឈីកាហ្គោ សហរដ្ឋអារេមិក ។ ការតាំងពិព័រណ៍នេះ គឺជាលើកទី២ នៃស្នាដៃសិល្បៈរបស់លោកពេជ្រ សុភាព ដែលលើកទី១ ធ្វើនៅឆ្នាំ២០០៤ គឺជាការតាំងពិព័រណ៍ស្ដីពីរូបចម្លាក់ ។
លោកពេជ្រ សុភាព បាននិយាយថា លោកបានចូលមកកម្ពុជាវិញនាឆ្នាំ២០០២ ហើយបានបង្ហាញស្នាដៃជាច្រើនតាមរយៈការតាំងពិព័រណ៍ចាប់ពីឆ្នាំ២០០៥។ បន្ទាប់ពីទទួលបានជោគជ័យនៃវិចិត្រកម្មរបស់ខ្លួន លោកបានសំរេចចិត្ដចាប់យកសិល្បៈធ្វើអំពីផ្ដៅមកបង្កើតជារូបភាព និងយកទៅតាំងពិព័រណ៍ម្ដង ។ គោលបំណងនៃការតាំងពិព័រណ៍លើកនេះ គឺលោកចង់បង្ហាញ និងផ្ដល់គំនិតទៅលើការវិវត្ដន៍នៃការងារតាំងពីរូបវិចិត្រកម្មដំបូងរបស់លោកកាលពី៦ឆ្នាំមុន និងចម្លាក់ដែលរូបលោកបានធ្វើនាពេលបច្ចុប្បន្ន ។ ពិព័រណ៍លើកនេះមានចំណងជើងថា Fragile (ផុយស្រួយ) ដែលចង់ផ្ដោតទៅលើសេចក្ដីប្រាថ្នារបស់លោកក្នុងនាមជាអ្នកចម្លាក់ និងឆ្លុះបញ្ចាំងអំពីលក្ខខណ្ឌនានានៅប្រទេសកម្ពុជា ពីលក្ខខណ្ឌមនុស្សដែលរស់នៅទីនេះ និងបង្កើតជារូបភាពធ្វើយ៉ាងណាឆ្លើយតបទៅនឹងតថភាព ។
លោកពេជ្រ សុភាព បញ្ជាក់ថា ការទស្សនារូបភាពនោះ គេប្រាកដជាវាយតំលៃថា ជារូបភាពពីអតីតកាល ។ ប៉ុន្ដែការវាយតំលៃបែបនេះមិនសមស្របទាំងស្រុងនឹង ការងាររបស់លោកទេ ហើយស្នាដៃនេះមានការគាំទ្រច្រើននៅក្រៅប្រទេស ។ ពិតណាស់ស្នាដៃរបស់លោកនៅក្រៅប្រទេសច្រើនតែបង្ហាញអំពីផ្លូវដែលលោកបានដើរក្នុងពេលស្រាវជ្រាវដំបូងៗស្ដីពីផ្ទះ ឬសំបុក ចាន ឆ្នាំង ជាដើម ។ ប៉ុន្ដែសម្រាប់ពិព័រណ៍លើកនេះលោកនឹងបង្ហាញនូវវិចិត្រកម្មប្លែកៗជាច្រើន ហើយនឹងធ្វើឱ្យអ្នកទស្សនាជក់ចិត្ដ ព្រមជាមួយនឹងការនឹកស្រណោះដល់សម្បត្ដិវប្បធម៌ខ្មែរដែលបានបាត់បង់ទៅតាមកាលសម័យ ។ ប្រជាពលរដ្ឋខ្មែរគួរតែអញ្ជើញមកចូលរួម ទស្សនាពិព័រណ៍ដ៏មានខ្លឹមសារ និងកម្រមាននៅកម្ពុជា ដូចជាស្នាដៃលោកពេជ្រ សុភាព ហើយតាមរយៈនោះទាំងអស់គ្នានឹងមានចិត្ដរំភើបស្ញប់ស្ញែងចំពោះស្នាដៃរបស់វិចិត្រករមិនខាន ហើយការចូលទស្សនាគឺមិនគិតកំរៃឡើយ ៕
ចែករំលែកព័តមាននេះ