ខេត្តកំពង់ឆ្នាំង ៖ «ប្រាសាទកំពង់ព្រះ» គឺជាប្រាសាទចំណាស់មួយដែលមានអាយុកាលដល់ទៅជាង១២០០ឆ្នាំ ប៉ុន្តែបច្ចុប្បន្ន នៅតែអាចតាំងជំហរឈរលើទីទួលបុរាណមួយនាតំបន់ខាងលិចបឹងទន្លេសាប ដើម្បីសម្ញែងសោភ័ណភាពបង្អួតស្នាដៃរបស់បុព្វបុរសខ្មែរនាសម័យដើម គ្រាដែលក្បូរក្បាច់រេចនាសិល្បៈ មាននៅលើប្រាសាទមានវ័យចំណាស់មួយនេះ ត្រូវបានមន្ត្រីជំនាញបុរាណវិទូចាត់ទុកជាគំរូ…
ខេត្តកំពង់ឆ្នាំង ៖ «ប្រាសាទកំពង់ព្រះ» គឺជាប្រាសាទចំណាស់មួយដែលមានអាយុកាលដល់ទៅជាង១២០០ឆ្នាំ ប៉ុន្តែបច្ចុប្បន្ន នៅតែអាចតាំងជំហរឈរលើទីទួលបុរាណមួយនាតំបន់ខាងលិចបឹងទន្លេសាប ដើម្បីសម្ញែងសោភ័ណភាពបង្អួតស្នាដៃរបស់បុព្វបុរសខ្មែរនាសម័យដើម គ្រាដែលក្បូរក្បាច់រេចនាសិល្បៈ មាននៅលើប្រាសាទមានវ័យចំណាស់មួយនេះ ត្រូវបានមន្ត្រីជំនាញបុរាណវិទូចាត់ទុកជាគំរូ «រចនាប័ទ្មកំពង់ព្រះ»។ ប្រាសាទនេះ មានទីតាំងស្ថិតក្នុងភូមិកំពង់ព្រះ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ។
ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង លោកសុខ ធួក មានប្រសាសន៍ថា ប្រាសាទកំពង់ព្រះ ត្រូវបានកសាងឡើងនៅចុងសតវត្សទី៧ និងដើមសតវត្ស៨ មុនសម័យអង្គរ ក្នុងរាជព្រះមហាក្សត្រិយ៍ ព្រះនាងជ័យទេវី ដែលបានឡើងសោយរាជ្យពីឆ្នាំ ៦៨១ ដល់ ៧១៣ នៃគ្រិស្តសករាជ្យបន្តវេនពីព្រះបីតារបស់ព្រះនាង គឺព្រះបាទជ័យវរ្ម័នទី១ (គ.ស ៦៥៧-៦៨១) តាមរចនាប័ទ្មកំពង់ព្រះមុនសម័យអង្គរ សម្រាប់ឩទ្ទិសដល់លទ្ធិព្រហ្មញ្ញសាសនា ។
លោកប្រធានមន្ទីរបានបន្តថា ប្រាសាទកំពង់ព្រះ ត្រូវបានសាងសង់ឡើងចំនួន២ទន្ទឹមគ្នា ដែលតួប្រាសាទមួយមានទំហំធំ ត្រូវបានមន្ត្រីជំនាញសន្មត់ជាប្រាសាទស្រី និងប្រាសាទតូចជាងត្រូវបានសន្មត់ជាប្រាសាទប្រុស ។ ប្រាសាទទាំង២បានសាងសង់អំពីថ្មភក់និងឥដ្ឋក្រហម បែរមុខទៅទិសខាងជើង សំដៅទៅបឹងទន្លេសាប ប្រមាណតែ១គីឡូម៉ែត្រប៉ុណ្ណោះ ។
ចំពោះតួប្រាសាទស្រីនៅរក្សារូបរាងបានល្អជាងប្រាសាទប្រុស មានទំហំ៦គុណនឹង៥ម៉ែត្រ មាន
កម្ពស់១០ម៉ែត្រ មានទ្វារបញ្ឆោតចំនួន៣ ដែលមានក្បាច់ផ្ដែរឆ្លាក់ជា ក្បាច់ផ្កាភ្ញីរាងអ័ក្សដងធ្នូ អមទៅដោយសសរពេជ្រឆ្វេងស្ដាំ និងក្បាច់ផ្សេងៗទៀតជាច្រើនទៀត ។ ចំណែកទ្វារពិតប្រាកដបែរមុខទៅទិសខាងជើង មានក្បាច់ផ្ដែរបានរបះធ្លាក់សឹករេចរឹលមួយផ្នែកធំ ។
ប្រាសាទប្រុស នៅចម្ងាយ៣ម៉ែត្រ ពីខាងលិច ប្រាសាទស្រី មានទំហំ ៤ម៉ែត្រ៤ជ្រុង មានកម្ពស់ប្រហែល៥ម៉ែត្រ មិនមានបន្សល់ទុកនៅក្បាច់ចម្លាក់អ្វីឡើយ ក្រៅពីស៊ុមទ្វារដែលប្រឹងទ្រទប់ដោយសសរពេជ្រមួយគូ និងស្លាកស្នាមទ្វារបញ្ឆោតនៅតាមទិសទាំងបី ដែលមានមានសភាពទ្រុឌទ្រោមខ្លាំង ។
ប្រាសាទកំពង់ព្រះបានកសាងលើដីទួលមួយ ក្នុងបរិវេណវត្តកំពង់ព្រះដែលពីបុរាណកាលមកគេហៅតៗគ្នាថា«វត្តទួលព្រះស្រីពិជ័យសូរវង្សកំពង់ព្រះ»។ សម្រាប់ភ្ញៀវទេសចរចង់ទៅលេងកម្សាន្តត្រូវធ្វើដំណើរតាមផ្លូវជាតិលេខ៥ ដល់មុខផ្សារពន្លៃ និងម្ខាងទៀតមុខសាលាស្រុកបរិបូរណ៌ ត្រូវបត់ចុះទៅមាត់កំពង់ទឹកឆ្នុកទ្រូ ដល់ផ្លូវបំបែកខាងស្តាំដៃបត់ចូលប្រមាណ១គីឡូម៉ែត្រនឹងដល់ទីទួលប្រាសាទកំពង់ព្រះនោះហើយ។
បច្ចុប្បន្ន ផ្លូវទៅកាន់ប្រាសាទកំពង់ព្រះ មិនស្ងាត់ជ្រងុំដូចមុនទៀតទេ ព្រោះចាប់តាំងពីអាជ្ញាធរខេត្តកំពង់ឆ្នាំង បន្លាសទីប្រជាពលរដ្ឋរស់នៅលើផ្ទះបណ្តែតទឹកឱ្យមករស់នៅលើគោក ពួកគាត់ត្រូវបានមកតាំងទីលំនៅតាមដងផ្លូវនោះអស់ហើយ ៕
ចែករំលែកព័តមាននេះ