រាជធានីភ្នំពេញ៖ ការនាំចេញអង្កររបស់កម្ពុជាទៅកាន់ទីផ្សារបរទេសគិតត្រឹមរយៈពេល ៣ឆ្នាំចុងក្រោយពីឆ្នាំ ២០១៧ ដល់ ២០១៩ កន្លងផុតទៅថ្មីៗនេះ គឺកម្ពុជារក្សាបានទំហំនៃការនាំចេញក្នុងមួយឆ្នាំៗបានជាង ៦០ម៉ឺនតោន ខណៈការនាំចេញសរុបកាលពីឆ្នាំ ២០១៥ និង២០១៦ បានតែជាង ៥០ម៉ឺនតោនប៉ុណ្ណោះ ។
ពាក់ព័ន្ធនឹងការនាំចេញអង្ករសរុបនៅ ៣ឆ្នាំចុងក្រោយរបស់កម្ពុជា នេះបើយោងតាម លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករបានគូសបញ្ជាក់ថា នៅឆ្នាំ ២០១៧កម្ពុជាសម្រេចបានការនាំចេញអង្ករទៅបរទេសចំនួន៦៣៥.៨៧៩តោន, ឆ្នាំ ២០១៨ មាន ៦២៦.២២៥តោ និងឆ្នាំ ២០១៩ មាន ៦២០.១០៦តោន ពោលធ្លាក់ចុះ ១៧% បើប្រៀបធៀបនឹងឆ្នាំ ២០១៨ ។ តែបរិមាណនាំចេញ ៣ឆ្នាំចុងក្រោយនេះ គឺមានបរិមាណច្រើនជាងការនាំចេញកាលពីឆ្នាំ ២០១៥ ដែលមានតែ ៥៣៨.៣៩៦តោន និងឆ្នាំ ២០១៦ មានតែ ៥៤២.១៤៤តោនប៉ុណ្ណោះ ។
ទន្ទឹមនឹងការនាំចេញអង្ករទៅទីផ្សារបរទេសក្នុងរយៈពេល ៣ឆ្នាំចុងក្រោយបន្តរក្សាបាននូវបរិមាណសរុបជាង ៦០ម៉ឺនតោនក្នុងមួយឆ្នាំៗកន្លងទៅនេះ សម្រាប់ក្នុងឆ្នាំ ២០១៩ គេសង្កេតឃើញថាមានក្រុមហ៊ុនក្នុងស្រុកដែលមានសមត្ថភាពធ្វើការនាំចេញអង្ករបានច្រើនជាង គឺមានចំនួន ១០ក្រុមហ៊ុន ។ ក្នុងនោះមាន៖ BAITANG មានចំនួន ៧,២ម៉ឺនតោន, CITY RICE មាន ៥,៦ម៉ឺនតោន, AMRU RICE បាន ៤,៩ម៉ឺនតោន, KHMER FOODs ៤,២ម៉ឺនតោន, ASARA RICE បាន ៤,២ម៉ឺនតោន, PRIMALIS CORPORATION បាន ៣,៤ម៉ឺនតោន, INTERNATIONAL RICE TRADING បាន ៣,១ម៉ឺនតោន, GOLDEN DAUNKEO RICE MILLបាន ៣,១ម៉ឺនតោន, GOLDEN RICE បាន ២,៩ម៉ឺនតោននិង ក្រុមហ៊ុនGOLDEN STAR RICEបាន ១,៨ម៉ឺនតោន ។
ដោយឡែកសម្រាប់ទិសដៅនៃការនាំចេញរបស់កម្ពុជាកាលពីឆ្នាំ ២០១៩ ប្រទេសមាជិកសហភាពអឺរ៉ុបដែលមានតម្រូវការច្រើនជាងគេ គឺប្រទេសបារាំងមានចំនួន ៨,១ម៉ឺនតោន, ប្រទេសហូឡង់ ២,១ម៉ឺនតោន, ចក្រភពអង់គ្លេស ១,៤ម៉ឺនតោន, អេស្ប៉ាញ ១,៣ម៉ឺនតោន និងប្រទេសប៊ែលហ្ស៊ិក ១,២ម៉ឺនតោន ។ ដោយឡែកទៅប្រទេសចិនមានចំនួនជាង ២៣,២ម៉ឺនតោន, ហុងកុង ១,៤ម៉ឺនតោន, តៃវ៉ាន់ ៤៨០តោន,ម៉ាកាវ ១៦៦តោន និងសៀងហៃ ៣២តោន ។ ប្រទេសសមាជិកអាស៊ានមានម៉ាឡេស៊ីមានចំនួន ៣,៦ម៉ឺនតោន, ប្រ៊ុយណេ ១,៩ម៉ឺនតោន, ថៃ ១,១ម៉ឺនតោន, វៀតណាម ១,១ម៉ឺនតោន, សិង្ហបុរី ៣,៦ពាន់តោន និងមីយ៉ាន់ម៉ា ៣០០តោន រួមទាំងការនាំចេញទៅប្រទេសផ្សេងមួយចំនួនទៀត ។
ទាក់ទងនឹងវិស័យស្រូវអង្ករនេះគួររំឭកថា ថ្មីៗកន្លងទៅនេះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍ថា «នៅក្នុងគោលនយោបាយរបស់យើង គឺជំរុញផលិតកម្មស្រូវនឹងការនាំចេញអង្ករឱ្យបាន ១លានតោន ។ នៅក្នុងគោលដៅទាំង ២របស់យើងសម្រេចបានតែ ១គោលដៅទេ គឺយើងធ្វើឱ្យសល់ស្រូវនៅក្នុងប្រទេសរបស់យើង គឺប្រមាណជិត ៦លានតោន ។ តែនិយាយដល់ការនាំចេញអង្ករយើងមិនដែលនាំចេញបាន ១លានតោនទេ» ។
សម្តេចតេជោ ហ៊ុន សែន មានប្រសាសន៍ទៀតថា «ស្ថិតនៅក្នុងស្ថានភាពជោគជ័យក្នុងគោលដៅមួយ គឺផលិតកម្មស្រូវលើសពីតម្រូវការ ។ កាលពីឆ្នាំ ២០០២យើងនៅខ្វះស្រូវនៅឡើយទេ ប៉ុន្តែក្រោយមកយើងខិតខំធ្វើឱ្យសល់ស្រូវ ១លានតោន, ២លានតោន, ៣លានតោន រហូតនៅសល់ជិត ៦លានតោន ។ ប៉ុន្តែការនាំចេញយើងមកដល់ឆ្នាំនេះ គឺមានកំណើនតិច គឺបានប្រហែល ៥៨ម៉ឺន ឬអាចដល់ ៦០ម៉ឺនតោនដល់ដំណាច់ឆ្នាំ ២០១៩ ប៉ុន្តែនៅមិនទាន់គ្រប់គោលដៅរបស់យើងកំណត់ ១លានតោននោះទេ» ៕ (កែសម្រួលដោយ ៖ បុប្ផា)
ចែករំលែកព័តមាននេះ