រាជធានីភ្នំពេញ ៖ ស្ត្រីជាម្តាយនិងកូនស្រីអាយុ៧ឆ្នាំម្នាក់បានជិះម៉ូតូមួយគ្រឿងដេញតាមម៉ូតូចោរឆក់ បណ្តាលឲ្យម៉ូតូទាំង២គ្រឿងជ្រុលទៅបុកចូលក្រោមរថយន្តសណ្តោងមួយគ្រឿងនៅចំណុចផ្លូវកែង បណ្តាលឲ្យស្ត្រីជាម្តាយនិងកូនស្រីរងរបួសបាក់ជើងទាំងពីរនាក់ ។ ហេតុការណ៍ខាងលើនេះបានកើតឡើងកាលពីវេលាម៉ោង៩យប់ថ្ងៃទី៥ ខែមករា ឆ្នាំ២០២០ នៅចំណុចផ្លូវ១៣៥កែងនឹងផ្លូវ…
រាជធានីភ្នំពេញ ៖ ស្ត្រីជាម្តាយនិងកូនស្រីអាយុ៧ឆ្នាំម្នាក់បានជិះម៉ូតូមួយគ្រឿងដេញតាមម៉ូតូចោរឆក់ បណ្តាលឲ្យម៉ូតូទាំង២គ្រឿងជ្រុលទៅបុកចូលក្រោមរថយន្តសណ្តោងមួយគ្រឿងនៅចំណុចផ្លូវកែង បណ្តាលឲ្យស្ត្រីជាម្តាយនិងកូនស្រីរងរបួសបាក់ជើងទាំងពីរនាក់ ។
ហេតុការណ៍ខាងលើនេះបានកើតឡើងកាលពីវេលាម៉ោង៩យប់ថ្ងៃទី៥ ខែមករា ឆ្នាំ២០២០ នៅចំណុចផ្លូវ១៣៥កែងនឹងផ្លូវ ម៉ៅសេទុង ជិតវត្តទួលទំពូង ស្ថិតក្នុងសង្កាត់ទួលទំពូង១ ខណ្ឌចំការមន ។
តាមប្រភពពីសមត្ថកិច្ចបានអោយដឹងថា ស្ត្រីជាម្តាយឈ្មោះអឿន ដាណេ អាយុ២៩ឆ្នាំ និងកូនស្រីមិនស្គាល់ឈ្មោះ អាយុ៧ឆ្នាំ ។ ជនរងគ្រោះទាំង២នាក់រស់នៅផ្ទះគ្មានលេខ ក្នុងភូមិជាព្រហ្ម សង្កាត់វាលស្បូវ ខណ្ឌច្បារអំពៅ ។ ជនរងគ្រោះជិះម៉ូតូមួយគ្រឿងម៉ាកហ្សូ៊មមើអិច ពណ៌សលាយទឹកក្រូច ពាក់ស្លាកលេខ ភ្នំពេញ ១GC-៥៣៣៥ ។
ចំណែជនសង្ស័យ២នាក់មិនស្គាល់អត្តសញ្ញាណបានរត់គេចខ្លួនបាត់ ដោយបន្សល់ទុកម៉ូតូ១គ្រឿង ម៉ាកហុងដាឌ្រីម ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ ភ្នំពេញ ១HO-៦២៨០ ត្រូវសមត្ថកិច្ចយកទៅរក្សាទុក ។ ដោយឡែករថយន្តសណ្តោងមួយគ្រឿងម៉ាក FUSU ពណ៌បៃតងខ្ចី បើកបរដោយបុរសមិនស្គាល់អត្តសញ្ញាណ ត្រូវសមត្ថកិច្ចឃាត់ខ្លួន ។
តាមប្រភពពីសាក្សីម្នាក់នៅកន្លែងកើតហេតុបានអោយដឹងថា មុនពេលកើតហេតុ គេ ឃើញស្ត្រីជាម្តាយ និងកូនស្រីអាយុ៧ឆ្នាំបានជិះម៉ូតូមួយគ្រឿងម៉ាកហ្សូ៊មមើអិច ដេញតាមម៉ូតូមួយគ្រឿងទៀតដែលជិះដោយបុរសជាជនសង្ស័យចំនួន២នាក់ តាមបណ្ដោយផ្លូវ១៣៥ ក្នុងទិសដៅពីលិចទៅកើត ក្នុងល្បឿនលឿន ។
តាមប្រភពដដែលបានបន្តថា ពេលនោះស្ត្រីជាម្តាយបានជិះម៉ូតូដេញតាមពីក្រោយ និងស្រែកថា «ចោរៗ» រហូតមកដល់ ចំណុចផ្លូវម៉ៅសេទុង មិនដឹងថាយ៉ាងម៉េចនោះទេ ស្រាប់តែម៉ូតូទាំង២គ្រឿងរបស់ជនសង្ស័យនិងជនរងគ្រោះ ជ្រុលទៅបុករថយន្តសណ្តោងដឹកទំនិញ ដែលកំពុងធ្វើដំណើរតាមបណ្ដោយផ្លូវ ម៉ៅសេទុងក្នុងទិសដៅ ពីជើងទៅត្បូង ចំពាក់កណ្ដាលកង់រថយន្តយ៉ាងពេញទំហឹង បណ្តាលឲ្យម៉ូតូទាំង២គ្រឿងដួលចូលក្រោមរថយន្ត ក៏ត្រូវរថយន្តកិនអូសម៉ូតូពីក្រោមបាន១០០ម៉ែត្រ ទើបអ្នកបើកបររថយន្តចាប់ហ្វ្រាំងជាប់ ព្រមទាំងធ្វើឲ្យស្ត្រីជាម្តាយនិងកូនស្រី រងរបួសបាក់ជើងទាំងពីរនាក់ ចំណែក ជនសង្ស័យទាំងពីរនាក់រងរបួសតិចតួច និងបានរត់គេចខ្លួនបាត់ ដោយបន្សល់ទុកម៉ូតូ១គ្រឿងនៅកន្លែងកើតហេតុ ។
បន្ទាប់ពីកើតហេតុ គេឃើញកម្លាំងសមត្ថកិច្ចមូលដ្ឋានបានចុះទៅកន្លែងកើតហេតុ ហើយ បានទំនាក់ទំនងហៅរថយន្តសង្គ្រោះអោយមកដឹកជនរងគ្រោះម្តាយនិងកូនស្រីយកទៅសង្គ្រោះនៅមន្ទីរពេទ្យ មិត្តភាពខ្មែរសូវៀត ។
ក្រោយពេលកើតហេតុ នៅសល់តែរថយន្តនិងម៉ូតូ២គ្រឿង ព្រមទាំងអ្នកបើកបរ ត្រូវបានសមត្ថកិច្ច ជំនាញនាំយកទៅកាន់អធិការខណ្ឌចំការមន រង់ចាំខាងជំនាញធ្វើការស្រាវជ្រាវនៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ