រាជធានីភ្នំពេញ ៖ ថ្មីៗនេះមានក្រុមហ៊ុនមួយហៅកាត់ថា CFOCN បានស្ថាបនាបំពង់បណ្តាញខ្សែកាប្លិ៍អុបទិចទូរគមនាគមន៍កប់ក្រោមដី និងបន្ទប់ស្ថានីយមា៉សីុននៅភូមិ៨ សង្កាត់បឹងត្របែក ខណ្ឌចំការមន ហើយក៏មានការប្រឆាំងតវា៉ខ្លះពីសំណាក់ពលរដ្ឋដែលរស់នៅក្បែរទីនោះ ។ ហេតុផលគឺដោយសារមានការព្រួយបារម្ភពីសុខភាព និងសុវត្ថិភាព ហេតុដូច្នេះហើយក៏មានការរារាំងការដ្ឋានសាងសង់ ។
ឆ្លងតាមរយៈការសិក្សាយា៉ងសីុជម្រៅ និងពិនិត្យផ្ទៀងផ្ទាត់រួចមក អ្នកសារព័ត៌មានសង្កេតឃើញថា ករណីខាងលើគឺជាការយល់ច្រឡំដែលកើតឡើងដោយសារការមិនបានយល់ដឹងពីវិទ្យាសាស្ត្រទូទៅ និងកង្វះទំនាក់ទំនងល្អជាមួយប្រជាពលរដ្ឋ ។ យើងត្រូវយល់ឱ្យច្បាស់ពីស្ថានភាពខ្សែកាប្លិ៍ពណ៌ខ្មៅ ចងជាបាច់ៗ ដែលត្រូវបានព្យួរលើបង្គោលអគ្គិសនីយា៉ងរញ៉េរញ៉ៃតាមសងខាងផ្លូវ ឬដងវិថីនានានៅរាជធានីភ្នំពេញ ។ ខ្សែកាប្លិ៍ដែលព្យួរទាំងនោះបានធ្វើឱ្យខូចសោភ័ណភាពក្រុង មិនមានសណ្តាប់ធ្នាប់ទេ ពេលខ្លះអាចមានខ្យល់វាយបោកផ្តាច់ ហើយមានពេលខ្លះត្រូវបានយានយន្តបើកទាក់ដាច់ក៏មាន ។ល។ ហើយក្រុមការងារជួសជុលបន្ទាន់បានប្រើប្រាស់ដីផ្លូវធ្វើការជួសជុល បង្កឱ្យរាំងស្ទះចរាចរណ៍ ។
សួរថាខ្សែកាប្លិ៍ទាំងនោះត្រូវបានប្រើប្រាស់ដើម្បីអ្វី? ការពិតទៅ ខ្សែកាប្លិ៍ទាំងនោះជាខ្សែកាប្លិ៍បញ្ជូនសេវា ដែលប្រជាពលរដ្ឋប្រើប្រាស់ដើម្បីមើលទូរទស្សន៍ ភ្ជាប់អីុនធើរណេត ទូរស័ព្ទ ។ ប៉ុន្តែវាពិតជារឿងពិបាកស្រមៃណាស់នៅក្នុងប្រទេសជឿនលឿនក្នុងពិភពលោកដែលមានសភាពខ្សែកាប្លិ៍ដូចនេះ!ច្បាប់ស្តីពីការសាងសង់ និងរៀបចំក្រុងក្នុងប្រទេសរីកចម្រើនលើសកលលោក មិនអនុញ្ញាតឱ្យមានការព្យួរខ្សែកាប្លិ៍បែបនេះនៅទីក្រុងទេ ។ ផ្ទុយទៅវិញ ខ្សែកាប្លិ៍ទាំងនេះត្រូវបានកប់ក្នុងបំពង់ក្រោមដីយា៉ងត្រឹមត្រូវ និងស្អាតបាត ។ ខ្សែកាប្លិ៍អុបទិចដែលត្រូវបានដាក់ក្នុងបំពង់ជ័រហើយកប់ក្រោមដី វាមិនត្រឹមតែមានសុវត្ថិភាពនោះទេ ថែមទាំងមិនប៉ះពាល់ដល់សោភ័ណភាព និងចរាចរណ៍ទៀតផង ។
ជាងនេះទៅទៀត សមត្ថភាពបញ្ជូនរលកសញ្ញាទូរគមនាគមន៍គឺខ្សែកាប្លិ៍អគ្គិសនីបែបបុរាណមិនអាចប្រៀបធៀបបានឡើយ ។ វាចាំបាច់ណាស់ដើម្បីធ្វើការណែនាំខ្លះអំពីខ្សែកាប្លិ៍អុបទិច និងខ្សែកាប្លិ៍អុបទិចទូរគមនាគមន៍ ។ ខ្សែកាប្លិ៍អុបទិចគឺជាខ្សែសរសៃឆ្មារកញ្ចក់ដែលអាចដឹកនាំ និងបញ្ជូនទិន្នន័យពន្លឺ ។ សរសៃឆ្មារកញ្ចក់អាចងាយនឹងខូច ហើយខ្សែសរសៃឆ្មារទាំងនោះត្រូវបានរុំខ្ចប់ និងការពារក្នុងទុយ៉ូជ័ររុំ និងបិទជិតចងផ្តុំចូលគ្នាបានក្លាយជាខ្សែកាប្លិ៍អុបទិច ។ ខ្សែកាប្លិ៍អុបទិចទូរគមនាគមន៍គឺជាខ្សែកាបអុបទិចដែលត្រូវបានប្រើប្រាស់ដើម្បីបញ្ជូនទិន្នន័យតាមរយៈខ្សែសរសៃឆ្មារទាំងនោះ ។ ការបង្កើតសរសៃខ្សែកាប្លិ៍អុបទិច គឺមិនចាញ់ការធ្វើបដិវត្តឧស្សាហកម្មម្តងនៅក្នុងប្រវត្តិសាស្ត្រមនុស្សជាតិឡើយ ។
ខ្សែកាប្លិ៍អុបទិចទាំងនោះបានធ្វើឱ្យពិភពលោកកែប្រែយា៉ងឆាប់រហ័ស និងបានជំរុញឱ្យមានសម័យកាលព័ត៌មានវិទ្យានីយកម្មរបស់មនុស្សលោក ។ ដោយសាររលកសញ្ញាតាមខ្សែកាប្លិ៍អុបទិចមានកំហាតតិចជាងការបញ្ជូនតាមខ្សែកាប្លិ៍អគ្គិសនី ខ្សែកាប្លិ៍អុបទិចមានគុណសម្បត្តិច្រើនណាស់ ។ ទីមួយ-ការបញ្ជូនទិន្នន័យទូរគមនាគមន៍មានល្បឿនលឿន សមត្ថភាពទំហំផ្ទុកធំ (Bandwidth with large capacity of communication) ។ ទីពីរ-កំហាតតិចតួច ការបញ្ជូនទិន្នន័យមានរយៈចម្ងាយវែង ។ ទីបី-ប្រឆាំងនឹងដែនមា៉ញេទិច ។ វាផ្ទុកសារធាតុអីុសូឡង់ ដែលមិនឆ្លងភ្លើងឬមិនមានស្រទាប់អីុយ៉ុង និងមិនរងកំដៅថ្ងៃទេ ។ ជាងនេះទៅទៀត វាមិនរងផលប៉ះពាល់នឹងចរន្តអគ្គិសនី ដែលប្រើប្រាស់តាមលំនៅឋាន និងរោងចក្រឧស្សាហកម្ម ឡើយ ។
ឥឡូវសូមត្រឡប់មកនិយាយពីអ្វីដែលក្រុមហុ៊ន CFOCN ដែលបានលើកពីការដ្ឋានសាងសង់បំពង់ខ្សែកាប្លិ៍អុបទិចទូរគមនាគមន៍ក្រោមដី និងបន្ទប់ស្ថានីយ៍មា៉សីុននៅភូមិ៨ សង្កាត់បឹងត្របែក ខណ្ឌចំការមន គឺជាការងារមួយដែលត្រៀមលក្ខណៈដើម្បីទម្លាក់ខ្សែកាប្លិ៍មកកប់ក្រោមដីក្នុងរាជធានីភ្នំពេញ តភ្ជាប់ខ្សែកាប្លិ៍អុបទិចឱ្យចូលដល់គេហដ្ឋានរាប់ពាន់គ្រួសារ កែលម្អបរិស្ថានរស់នៅ និងកម្រិតជីវភាពរបស់ប្រជាពលរដ្ឋ លើកកម្ពស់បទដ្ឋាន (ស្តង់ដា)វិស័យព័ត៌មានវិទ្យារបស់សង្គមជាតិទាំងមូល ។ មិនខ្វល់ថាខ្សែកាប្លិ៍អុបទិចទូរគមនាគមន៍ក្រោមដីឬមួយក៏បន្ទប់ខ្សែកាប្លិ៍ដែលនៅជិតគេហដ្ឋានប្រជាពលរដ្ឋនោះទេ វាមិនអាចបង្កអគ្គិភ័យអ្វីឡើយ ហើយក៏មិនមានសារធាតុវិទ្យុសកម្មអ្វីដែរ ផ្ទុយទៅវិញវាមានសុវត្ថិភាព និងការពារបរិស្ថានទៀតផង ។
ត្រង់ចំណុចនេះក៏ត្រូវបានចេញសេចក្តីបញ្ជាក់ពីអ្នកជំនាញរបស់បញ្ញត្តិករទូរគមនាគមន៍កម្ពុជាផងដែរ ។ សារព័ត៌មានបានធ្វើការស្រាវជ្រាវ និងពិនិត្យផ្ទៀងផ្ទាត់រកការពិតពីក្រុមហ៊ុន CFOCN ។ ក្រុមហ៊ុននេះមានឈ្មោះពេញហៅថា (Cambodia) Fiber Optic Communication Network Co.Ltd ហើយត្រូវទទួលសិទ្ធិប្រទានដើម្បីវិនិយោគស្ថាបនា និងផ្គត់ផ្គង់បណ្តាញខ្សែកាប្លិ៍អុបទិចទូទាំងព្រះរាជាណាចក្រកម្ពុជា កាលពីខែមេសា ឆ្នាំ២០០៧ តាមរយៈការចុះហត្ថលេខាដោយផ្ទាល់ពីសម្តេចអគ្គមហាសេនាបតីតេជោ ហ៊ុន សែន ក្រុមប្រឹក្សាអភិវឌ្ឍន៍កម្ពុជា ក្រសួងប្រៃសនីយ៍ និងទូរគមនាគមន៍ ក្រសួងសេដ្ឋកិច្ច និងក្រសួងពាណិជ្ជកម្ម ដែលបានចុះហត្ថលេខាជាមួយក្រុមហ៊ុន CFOCN ស្តីពីកិច្ចព្រមព្រៀង «កិច្ចព្រមព្រៀងវិនិយោគលើគម្រោងទូរគមនាគមន៍អុបទិចផ្លូវថ្នល់ល្បឿនខ្ពស់ព័ត៌មានវិទ្យាកម្ពុជា ផ្តល់សិទ្ធិឱ្យក្រុមហ៊ុន CFOCN វិនិយោគ ស្ថាបនា និងប្រតិបត្តិការអាជីវកម្មលើបណ្តាញទូរគមនាគមន៍អុបទិចទូទាំងប្រទេសកម្ពុជា» ។
ការស្ថាបនាបណ្តាញខ្សែកាប្លិ៍អុបទិច និងកែលម្អជាប្រចាំខាងផ្នែកនេះ និងលើកកម្ពស់ការអភិវឌ្ឍវិស័យព័ត៌មានវិទ្យាយា៉ងខ្លាំងរបស់ព្រះរាជាណាចក្រកម្ពុជា ព្រមទាំងដោះស្រាយក្តីលំបាកទាំងបួនពោលគឺ លំបាកក្នុងការទូរស័ព្ទ លំបាកក្នុងការមើលទូរទស្សន៍៍ លំបាកក្នុងការភ្ជាប់អីុនធើរណេត និងលំបាកក្នុងការទទួលសេវាព័ត៌មានរបស់ប្រជាពលរដ្ឋខ្មែរដែលមានតាំងពីយូរណាស់មកហើយ ក៏ដូចជាជួយជំរុញ និងពន្លឿនការអភិវឌ្ឍវិស័យសេដ្ឋកិច្ច និងកែលម្អជីវភាពប្រជាពលរដ្ឋផងដែរ ។ មតិមហាជនបានយល់ឃើញថា គម្រោងមួយដែលមានសុវត្ថិភាព គម្រោងមួយដែលការពារបរិស្ថាន និងគម្រោងមួយដែលផ្តល់ប្រយោជន៍ជូនពលរដ្ឋ ប៉ុន្តែបែរជាត្រូវបានរារាំង និងប្រឆាំងតវា៉ពីសំណាក់ប្រជាពលរដ្ឋ, ត្រង់ចំណុចនេះគឺជាបញ្ហាអប់រំចំណេះដឹងផ្នែកវិទ្យាសាស្ត្រទូទៅ ហើយក៏ជាបញ្ហាចោទឡើងដោយមានការខ្វះខាតក្នុងការផ្សព្វផ្សាយឱ្យបានគ្រប់ជ្រុងជ្រោយពីសំណាក់ម្ចាស់ការដ្ឋានសំណង់ និងរដ្ឋាភិបាល ក៏ដូចជាកង្វះខាតក្នុងទំនាក់ទំនងជាមួយប្រជាពលរដ្ឋផងដែរ ៕
ចែករំលែកព័តមាននេះ