រាជធានីភ្នំពេញ ៖ នៅលើសង្វៀនទូរទស្សន៍ ស៊ីអិនស៊ី នាថ្ងៃសៅរ៍ ទី៤ មករា ស្អែកនេះ កីឡាករជើងខ្លាំងវ័យក្មេងទើបឡើងកូដ២រូបដល់ថ្ងៃឡើងប្រកួតដណ្ដើមប្រាក់លានជាមួយកីឡាករថៃ ។…
រាជធានីភ្នំពេញ ៖ នៅលើសង្វៀនទូរទស្សន៍ ស៊ីអិនស៊ី នាថ្ងៃសៅរ៍ ទី៤ មករា ស្អែកនេះ កីឡាករជើងខ្លាំងវ័យក្មេងទើបឡើងកូដ២រូបដល់ថ្ងៃឡើងប្រកួតដណ្ដើមប្រាក់លានជាមួយកីឡាករថៃ ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករកម្ពុជា ទាំងពីររូបនេះអាចសម្រេចគោលដៅរបស់ខ្លួនឬយ៉ាងណា ខណៈកីឡាករថៃដែលពួកគេត្រូវជួបនាពេលនេះហាក់មានសមត្ថភាពខ្លាំងពិបាកផ្ដួលបែបនេះនោះ។
គូដណ្ដើមប្រាក់លានទី១ កីឡាករ ខាំ ខ្លានាង មកពីក្លិបរ៉ាហាប់ស្វាយប៉ាក ត្រូវប្រកួតជាមួយកីឡាករថៃ Kao Leanthorng ក្នុងប្រភេទទម្ងន់៥១គីឡូក្រាម ។ ខាំ ខ្លានាង មួយរយៈចុងក្រោយនេះត្រូវបានគេទទួលស្គាល់ថាជាជើងខ្លាំងវ័យក្មេងទម្ងន់ស្រាលមួយរូប ដែលពិបាករកដៃគូប្រកួតបំផុតសម្រាប់កីឡាករក្នុងស្រុកដូចគ្នា ។ ដូច្នេះហើយបានជាគេឧស្សាហ៍ឃើញកីឡាកររូបនេះមានមុខប្រកួតជាលក្ខណៈអន្តរជាតិញឹកញាប់ និងទទួលបាន ជ័យជម្នះច្រើនជាងបរាជ័យទៀតផង ។
សម្រាប់ ការប្រកួតលើកនេះ គេមិនហ៊ានទាយទុកមុនថាយ៉ាងណានោះទេ ដោយសារតែកីឡាករទាំងពីរមិនធ្លាប់ជួបគ្នាពីមុនមក ។ ទោះបីយ៉ាងណា សម្រាប់អ្នកគាំទ្រកីឡាករកម្ពុជាភាគច្រើននៅតែមានជំនឿចិត្តលើ ខាំ ខ្លានាង ថាប្រាកដជាអាចយកឈ្នះកីឡាករថៃក្លាយជាម្ចាស់ប្រាក់លាននៅក្នុងសប្ដាហ៍នេះ។
គូដណ្ដើមប្រាក់លានទី២ កីឡាករ ម៉ឺន មេឃា មកពីក្លិបក្រសួងសេដ្ឋកិច្ចនិងហិរញ្ញវត្ថុ ត្រូវប្រកួត
ជាមួយកីឡាករថៃ Khun Phun Noyក្នុងប្រភេទទម្ងន់៦០គីឡូក្រាម ។ ម៉ឺន មេឃា ក៏ជាអ្នកប្រដាល់វ័យក្មេងកំពុងតែឡើងកូដខ្លាំង ជាក់ ស្ដែងថ្មីៗនេះគេទើបដណ្ដើមបានតំណែងជាម្ចាស់
ខ្សែក្រវាត់កម្ពុជាគុនខ្មែរឆ្នាំ២០១៩ទៀតផង។
លើកនេះ ម៉ឺន មេឃា ប្រហែលជាមិនធ្វើឱ្យអ្នក គាំទ្ររបស់ខ្លួនអស់សង្ឃឹមទេ ។ មួយរយៈមក នេះម៉ឺន មេឃា បានធ្វើឱ្យអ្នកគាំទ្រចាប់អារម្មណ៍យ៉ាងខ្លាំងជាមួយនឹងការប្រើស្នៀតពិសេសៗផ្ដួលគូប្រកួតមិនឱ្យលើសពីទឹកទី៤ ។ ចាំមើល ម៉ឺន មេឃា មានសំណាងក្លាយជាម្ចាស់ប្រាក់លានឬអត់?
ចំណែកគូប្រកួតមិត្តភាពវិញមាន កីឡាករ ធី ម៉ានិត មកពីក្លិបអេភូថងកីឡា ប្រកួតជាមួយកីឡាករ ជ័យ គឹមហុង មកពីក្លិបឃ្លាំងមឿងកីឡា ។ កីឡាករ ឡុង សុវណ្ណ មកពីក្លិបសាលវ័ន្តកីឡា ប្រកួតជាមួយកីឡាករ លីន និមុល មកពីក្លិបបុរីរាជសីហ៍មានរិទ្ធ និងគូចុងក្រោយ កីឡាករ ធន់ ស៊ីណា មកពីក្លិបមជ្ឈមណ្ឌលកីឡា ខ ភ ម ប្រកួតជាមួយកីឡាករ ពុទ្ធ សម្ផស្ស មកពីក្លិបពុទ្ធសេរីវង្សពោធិសែនជ័យ៕ (កែសម្រួលដោយ ៖ បុប្ផា)
ចែករំលែកព័តមាននេះ