រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានថ្លែងថា មានមនុស្សខ្លះមិនចង់ឃើញរូបថតចាស់ៗ ដោយសារមានបំណងចង់បិទបាំងការអភិវឌ្ឍប្រទេសជាតិនាពេលបច្ចុប្បន្ន តាមរយៈការប្រៀបធៀបរូបថតសម័យមុន និងសម័យបច្ចុប្បន្ន ។
សម្តេចតេជោ ហ៊ុន សែន បានថ្លែងក្នុងពិធីប្រគល់សញ្ញាបត្រដល់និស្សិតបញ្ចប់ការសិក្សានៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច(RULE) នាព្រឹកថ្ងៃទី២៦ខែធ្នូ ឆ្នាំ២០១៩ នៅវិទ្យាស្ថានជាតិអប់រំថា ស្នើរក្សាទុករូបថតចាស់ៗពីមុន ដើម្បីប្រៀបធៀបជាមួយការរីកចម្រើននាពេលបច្ចុប្បន្ន ។
សម្តេចតេជោបញ្ជាក់ថា ៖ «យើងត្រូវរក្សា រូបថតចាស់ៗនៃសាលារៀនរបស់យើងផង ដើម្បីធ្វើការប្រៀបធៀបឲ្យនឹកឃើញពីការចាប់ផ្តើមសាលាដំបូងយ៉ាងម៉េច ? អុីចឹងរក្សាទុក ទន្ទឹមនឹងយើងមានស្ថានភាពថ្មី ដូច្នេះត្រូវរក្សាទុករបស់ចាស់» ។
សម្តេចតេជោបានលើកឡើងថា រូបថតទី ក្រុងភ្នំពេញសម័យមុនក៏ត្រូវរក្សាទុកដែរ ដើម្បីឲ្យដឹងថា យើងបានចាប់ផ្តើមដំណើរការពីត្រង់ណា ហើយទីកន្លែងណា ។ អ្នកខ្លះខ្លាចការបង្ហោះរូបថតចាស់ៗណាស់ ដោយសារពួកគេខ្លាចយើងយកការប្រៀបធៀបនូវអ្វីដែលយើងចាប់ផ្តើមចេញដំណើរជាមួយស្ថានភាពបច្ចុប្បន្ន ។ គេនឹងឃើញថា ភ្នំពេញពីអត់មានមនុស្សនៅ ពីគំនរបាក់បែក ទៅជាភ្នំពេញដែលមានស្ថានភាពរស់រវើក ព្រោះគេចង់លាក់បាំងការពិតនៃការរីកចម្រើនរបស់យើង ។
សម្តេចតេជោថ្លែងទៀតថា ទោះបីជាមាន អ្នកចង់បិទបាំងការពិតយ៉ាងក្តី យើងត្រូវបង្ហាញដើម្បីឆ្លុះបញ្ចាំងនូវការពិត ព្រោះថារឿងនេះជារឿងប្រវត្តិសាស្ត្រមួយត្រូវចងចាំ ។ អ្នកណាក៏ដោយ បើគ្មានទស្សនៈប្រវត្តិសាស្ត្រទេ ច្បាស់ជាអ្នកនោះទេមិនដឹងពីខ្លួនថាចេញពីណា ហើយគោលទៅទីណាទេ ។សម្តេចតេជោបានលើកឡើងថា ការកសាងប្រទេសពីគំនរផេះផង់ ពិតជាមានការពិបាកណាស់ទម្រាំមកដល់បច្ចុប្បន្ននេះ ក្នុងនោះរាប់ទាំងការកសាងសាកលវិទ្យាល័យមួយចំនួន ក្នុងនោះទាំងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចផងដែរ ឥឡូវមានភាពល្អប្រសើរ
សម្តេចតេជោប្រមុខរាជរដ្ឋាភិបាល បានលើក ឡើងទៀតថា តាមគោលនយោបាយរបស់រាជរដ្ឋាភិបាល បានខិតខំក្នុងការធ្វើកំណែទម្រង់វិស័យអប់រំ ដោយនៅតាមសាកលវិទ្យាល័យមួយចំនួនមានរៀបបង់ថ្លៃ និងរៀនអាហារូបករណ៍របស់រាជរដ្ឋាភិបាលផងដែរ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ