កាលពីឆ្នាំ២០១៧ កន្លងមកលោក ធីម ឃុក (Tim Cook) ដែលជានាយកប្រតិបត្តិរបស់ក្រុមហ៊ុន Apple បានចែករំលែកនូវដំបូន្មានដ៏មានតម្លៃមួយថា មនុស្សគួរតែវាស់ភាពជោគជ័យរបស់ខ្លួនដោយអាស្រ័យលើឥទ្ធិពលរបស់ខ្លួនលើមនុស្សដទៃមិនមែនលើចំនួនមនុស្សដែលចូលចិត្តខ្លួនទេ និងលើចំនួនមនុស្សដែលខ្លួនបានជួយ មិនមែនលើប្រជាប្រិយភាពរបស់ខ្លួនឡើយ ។
ប្រជាប្រិយភាព និងចំនួនមនុស្សដែលចូលចិត្តស្រលាញ់អ្នកគឺគ្រាន់តែជាកត្តាខាងក្រៅខ្លួនប៉ុណ្ណោះ ហើយវាមិនអាចផ្តល់អារម្មណ៍សប្បាយរីករាយដល់អ្នកក្នុងរយៈពេលវែងឡើយ ។ សម្រាប់លោកឃុក លោកមកដល់ថ្ងៃនេះគឺព្រោះតែនិយមន័យនៃភាពជោគជ័យរបស់លោក ។ ហើយអ្នកក៏អាចផ្តល់និយមន័យឲ្យវាដើម្បីផ្លាស់ប្តូរជីវិតអ្នកបានដែរដោយគ្រាន់តែធ្វើតាមវិធីខាងក្រោមនេះ៖
១. សួរខ្លួនឯងពីសំណួរពិបាកៗ៖
លោក ឃុក ធ្លាប់បកស្រាយថា ខណៈដែលអ្នកចាកចេញពីការធ្វើអ្វីមួយទៅធ្វើអ្វីមួយទៀត អ្នកអាចនឹងសួរខ្លួនថា «តើខ្ញុំកំពុងតែដើរទៅណា? តើខ្ញុំមានគោលដៅអ្វី?» អ្នកមិនចាំបាច់មានចម្លើយទេ តែអ្នកចាំបាច់ត្រូវតែមានសំណួរទាំងនេះដើម្បីសួរខ្លួនឯងព្រោះវាជំរុញឲ្យអ្នកវិភាគគោលដៅអ្នកច្បាស់លាស់ និងអនុញ្ញាតឲ្យអ្នកដើរលើផ្លូវត្រឹមត្រូវដើម្បីទៅដល់គោលដៅ ។
២. រក្សាភាពអត់ធ្មត់ និងបន្តការរក៖
អ្នកមិនអាចគិតឃើញចម្លើយសម្រាប់សំណួរសំខាន់ៗខាងលើក្នុងរយៈពេលប៉ុន្មានថ្ងៃទេ ។ លោកឃុក បាននិយាយថាលោកសួរសំណួរទាំងនោះជិត ១៥ឆ្នាំទើបអាចឆ្លើយវាបាន ។ ហើយទោះជាអ្នកអាចរកឃើញចម្លើយពិតមែនក៏មិនប្រាកដថាចម្លើយនោះនឹងមិនផ្លាស់ប្តូរដែរ ។ ប៉ុន្តែអ្នកត្រូវតែបន្តរកវា ។
៣. ចេញពីកន្លែងដែលអ្នកធ្លាប់តែនៅ៖
ការសាកល្បងធ្វើអ្វីដែលថ្មីៗ ទោះវាមានលក្ខណៈប្លែកពីអ្វីដែលអ្នកធ្លាប់តែធ្វើក៏ពិតមែនក្តី ។ លោកឃុកជាមនុស្សដែលសាកល្បងធ្វើអ្វីជាច្រើនមិនថាជាការតាំងសមាធិ ចូលសាសនាថ្មី ឬអានពីទស្សនៈរបស់អ្នកប្រាជ្ញល្បីៗទេ ។ ការធ្វើដូច្នេះនឹងជួយឲ្យអ្នកយល់ដឹងកាន់តែច្បាស់ពីខ្លួនឯង និងជួយអ្នកក្នុងការរកចម្លើយសម្រាប់សំណួរខាងលើដែរ ។ ពេលដែលអ្នកបោះបង់គំនិតចង់បានការទទួលស្គាល់ពីអ្នកដតៃ អ្នកនឹងអនុញ្ញាតឲ្យខ្លួនដើរឆ្ពោះទៅរកអ្វីដែលធ្វើឲ្យអ្នកសប្បាយចិត្តពិតប្រាកដវិញ ៕ កែសម្រួលដោយ ៖ សុឃាក់
ចែករំលែកព័តមាននេះ