រាជធានីភ្នំពេញ៖ ថ្មីៗនេះប្រមុខរាជរដ្ឋាភិបាលកម្ពុជាបានអំពាវនាវទៅដល់ប្រជាកសិករនៅទូទាំងប្រទេសឱ្យផ្អាកធ្វើស្រែប្រាំងជាលើកទី ២ ព្រោះឆ្នាំនេះប្រឈមនឹងការខ្វះទឹកគ្រប់គ្រាន់ក្នុងការស្រោចស្រព ដោយឱ្យប្រជាកសិករងាកមករកការដាំដុះដំណាំទាំងឡាយណាប្រើប្រាស់ទឹកតិច ។ ដូច្នេះតើប្រជាកសិករគួរជ្រើសរើសដំណាំប្រភេទណាខ្លះប្រើប្រាស់ទឹកស្រោចស្រពតិចតួចតែទទួលបានផល ឬចំណូលដូចទៅនឹងការធ្វើស្រែប្រាំងលើកទី ២ ដែរ?
បើតាមកសិករគំរូ និងមានបទពិសោធន៍លើការដាំដុះដំណាំប្រើប្រាស់ទឹកតិចតួច ម្នាក់នៅខេត្តតាកែវ បានឱ្យដឹងថា ការដាំដុះដំណាំជាទូទៅប្រជាកសិករត្រូវចេះមើលតាមកាលៈទេសៈជាក់ស្តែងគួរជ្រើសរើសដំណាំណាដែលឆាប់ផ្តល់ផលក្នុងរយៈពេលតែជាង ១ ខែ តួយ៉ាងដូចជាត្រកួន កញ្ឆែត និងភ្លៅកង្កែបជាដើម ។
លោក រស់ ម៉ៅ កសិករគំរូនៅខេត្តតាកែវ មានប្រសាសន៍ឱ្យដឹងកាលពីថ្ងៃទី ១២ ខែធ្នូម្សិលមិញថាដំណាំបន្លែដែលអាចដាំនៅលើដីស្រែប្រាំងបាន ហើយប្រើប្រាស់ទឹកស្រោចស្រពតិចតួច មានដូចជាត្រគួន, កញ្ឆែត, ភ្លៅកង្កែប, ត្រសក់ស្រូវ, ល្ពៅ, ត្រឡាច,ននោងជ្រុង(ស្រែប្រាំ) ។ ដំណាំទាំងនេះ វាប្រើររយៈពេលតែជាងមួយខែប៉ុណ្ណោះ អ៊ីចឹងយើងបែរមកដាំដំណាំទាំងអស់នេះវិញ ។ លោកបញ្ជាក់ថា «បើកសិករផ្អាកធ្វើស្រែប្រាំង ងាកមកដាំដំណាំខាងលើនេះ អាចប្រមូលផលបានពីរដង ដោយមិនបារម្ភពីការខ្វះខាតទឹកសម្រាប់ស្រោចស្រពនោះទេ ។ ជាក់ស្តែងត្រឡាច គេមូបទឹកដាក់តែពីរដងប៉ុណ្ណោះ ដោយលើកទីមួយនៅពេលគេជ្រុំជើងដំណាំនិងម្តងទៀតនៅពេលដំណាំចេញក្តិប ឬផ្កា» ។
លោកបន្តថា សម្រាប់រូបខ្ញុំ ខ្ញុំបានរៀបចំ ឬត្រៀមខ្លួនរួចរាល់ យោងតាមសម្តេចលោកមានប្រសាសន៍កាលពីថ្មីៗនេះ យើងមានការខ្វះទឹកច្រើនមិនអាចដាំដំណាំអ្វីដែលប្រើប្រាស់ទឹកច្រើន អ៊ីចឹងត្រៀមដាំំដំណាំណាដែលប្រើទឹកតិច មិនដាំដំណាំណាប្រើទឹកច្រើនទេ» ។
បើតាមកសិករគំរូរូបនេះបានឱ្យដឹងទៀតថា «បច្ចុប្បន្ននេះបានដាំ ឬកំពុងត្រៀមដំណាំប្រើទឹកស្រោចស្រពតិចដែលមានដូចជា៖ សណ្តែកគួរ,ត្រសក់, ល្ពៅ, ត្រគួន, ភ្លៅកង្កែប និងតាំងឱជាដើម ។ សម្រាប់ខ្ញុំមិនមានការព្រួយបារម្ភនោះទេ ប៉ុន្តែសម្រាប់ប្រជាកសិករផ្សេងទៀត គឺគាត់ពិតជាមានការព្រួយបារម្ភហើយ ព្រោះខ្ញុំបានបញ្ជ្រៀបខ្លួនទៅនឹងការប្រែប្រួលអាកាសធាតុ នឹងបានត្រៀមខ្លួនតាំងពីយូរណាស់មកហើយ» ។
តាមកសិកររូបនេះឱ្យដឹងទៀតថា ការប្រមូលផល ឬការទទួលបានចំណូលពីការលក់ដំណាំ ឬបន្លែពេញមួយឆ្នាំៗគ្មានការអាក់ខានទេ ។ នៅរដូវវស្សាដាំដំណាំនៅដីទួល រដូវវប្រាំងដាំនៅតាមដីទាបៗដូចជានៅក្នុងប្រឡាយទឹកជាដើម ។
ទន្ទឹមនឹងប្រមុខរាជរដ្ឋាភិបាលអំពាវនាវដល់ប្រជាកសិករងាកមកដាំដុះដំណាំប្រើប្រាស់ទឹកតិច បើតាមការកត់សម្គាល់របស់លោក រស់ ម៉ៅ គឺតាមរយៈអង្គការ ដែលបានហៅទៅតាមតំបន់ផ្សេងចែករំលែកបទពិសោធន៍ការដាំដុះ គឺប្រជាពលរដ្ឋភាគច្រើនពួកគាត់ធ្វើអត់កើតទេ គាត់អត់យល់ទេ ។ តែបើគាត់បានឃើញ ឬមានអ្នកណែនាំប្រាប់ពីការដាំដុះ ឬការកែច្នៃគឺពួកគាត់អាចធ្វើបាន ។ ប៉ុន្តែបើឱ្យពួកគាត់រកនឹកដោយខ្លួនឯងគឺទៅមិនរួចទេ ។
ពាក់ព័ន្ធនឹងការដំដុះដំណាំ និងការប្រើប្រាស់ទឹកនៅពេលខាងមុខនេះ យោងតាមសម្តេចអគ្គមហាសេនាបតីតេជោ ហ៊ុន សែន មានប្រសាសន៍ថ្មីៗនេះគឺ ទឹកនៅតាមបឹងបួរ ត្រពាំងយើងត្រូវចេះសន្សំសំចៃ អ៊ីចឹងទេបានជាអំពាវនាវទៅដល់ប្រជាពលរដ្ឋធ្វើស្រែប្រាំងតែមួយដងបានហើយ ឯលើកទីពីរគួរដាំដំណាំអ្វីផ្សេងដែលប្រើប្រាស់ទឹកតិចជាង ។ សម្តេចតេជោលើកឡើងថា «ប្រជាពលរដ្ឋយើងគាត់ឧស្សាហ៍ណាស់ ធ្វើស្រែប្រាំងច្រូតកាត់រួចហើយ គាត់ធ្វើស្រែម្តងទៀត តែដល់លើកទីពីរនេះទើបជាបញ្ហា ត្រូវអន្តរាគមន៍ ចង់បានស្រូវមួយហិកតាត្រូវការទឹកយ៉ាងហោច ១,២ ម៉ឺនម៉ែត្រគូបទើបបានស្រូវមួយហិកតា ។
សម្តេចតេជោ ហ៊ុន សែន មានប្រសាសន៍ដូច្នេះថា «ដើម្បីធានាថាទឹកត្រូវបានប្រើប្រាស់យ៉ាងមានប្រសិទ្ធភាពបម្រើឱ្យជីវភាពរបស់ប្រជាជន និងកុំឱ្យមានការលំបាកក្នុងការអន្តរាគមន៍ដោយសារតែការធ្វើរបស់យើង ។ យើងអាចផ្ទេរពីការធ្វើស្រូវទៅដាំជាបន្លែបង្ការ ឬដំណាំដាំដុះដទៃទៀតដែលប្រើប្រាស់ទឹកតិចជាងការធ្វើស្រែសម្រាប់ប្រជាពលរដ្ឋយើង» ៕ កែសម្រួលដោយ ៖ សុឃាក់
ចែករំលែកព័តមាននេះ