រាជធានីភ្នំពេញ ៖ តារាសម្តែងកញ្ញាដួង ម៉ានិច បានធ្វើឲ្យមហាជនចាប់អារម្មណ៍យ៉ាងខ្លាំងទៅលើការតុបតែងខ្លួន និងគ្រងឈុតនាងនាគយ៉ាងស្រស់ស្អាតនៅក្នុងពិធីបុណ្យកតញ្ញូដែលបានធ្វើឡើងកាលពីថ្ងៃទី១០ ធ្នូ ឆ្នាំ២០១៩នៅវត្តព្រះធាតុ សង្កាត់រលួស ខណ្ឌដង្កោ…
រាជធានីភ្នំពេញ ៖ តារាសម្តែងកញ្ញាដួង ម៉ានិច បានធ្វើឲ្យមហាជនចាប់អារម្មណ៍យ៉ាងខ្លាំងទៅលើការតុបតែងខ្លួន និងគ្រងឈុតនាងនាគយ៉ាងស្រស់ស្អាតនៅក្នុងពិធីបុណ្យកតញ្ញូដែលបានធ្វើឡើងកាលពីថ្ងៃទី១០ ធ្នូ ឆ្នាំ២០១៩នៅវត្តព្រះធាតុ សង្កាត់រលួស ខណ្ឌដង្កោ រាជធានីភ្នំពេញ ។ ពិធីនេះប្រារព្ធធ្វើឡើងជារៀងរាល់ឆ្នាំដើម្បីរំលឹកដល់គុណូបការៈដល់ដួងព្រលឹងបារមីដូនតាបុព្វបុរសខ្មែរគ្រប់ជំនាន់ ។
តារាសម្តែងដួង ម៉ានិច ជាសិល្បករម្នាក់ដែលបានស្ម័គ្រចិត្ត និងទឹកចិត្តជ្រះថ្លាចូលរួមក្នុងពិធីបុណ្យនេះ រំលេចដោយការរៀបចំស្លៀកពាក់តុបតែក្នុងឈុតសម័យបុរាណដើម្បីបង្ហាញពីសិល្បៈវប្បធម៌ អរិយធម៌ខ្មែរ ។
នេះគឺជាឆ្នាំទី៣ហើយដែលដួង ម៉ានិច ចូលរួម ហើយដូចបណ្តាឆ្នាំកន្លងទៅដែរ តារារូបនេះបានគ្រងឈុតបុរាណប្រកបដោយភាពទាក់ទាញ ។
អ្នកច្នៃប្រឌិតសម្រាប់ដួង ម៉ានិច បានលើកឡើងថា ឈុតនាងនាគដែលតារារូបនេះបានគ្រងនេះគឺត្រូវធ្វើឡើងយ៉ាងផ្ចិតផ្ចង់បំផុត ហើយបានត្រៀមប្រមាណជា៦ខែមកហើយ ។ ទាំងសំពត់ ស្បៃនាងនាគ ត្រូវបានរចនា ប៉ាក់ឌិនដោយដៃកូនខ្មែរ ពិតៗ ពិសេសគ្រឿងអលង្ការដែលលម្អដោយក្បាច់ និងម៉ូដដកស្រង់ចេញពីប្រាសាទបុរាណខ្មែរ ។
រូបភាពគ្រងឈុតដ៏ប្រណីតមួយនេះដែលបានបង្ហោះតាមហ្វេសប៊ុក ដួង ម៉ានិច បញ្ជាក់ថា នាងពិតជារំភើបរីករាយ ដែលបានចូលរួមក្នុងកម្មវិធីដ៏ធំមួយនេះ៣ឆ្នាំ ជាប់ៗគ្នា ក៏ជាការបង្ហាញពីការជឿជាក់ និងដឹងគុណដល់បុព្វបុរសខ្មែរដែលបានបូជាគ្រប់បែបយ៉ាងដើម្បីប្រជាជន។ ជាការចូលរួមចំណែកជួយដល់ការថែរក្សានូវទំនៀមទម្លាប់ប្រពៃណី អត្តសញ្ញាណជាតិ តាមរយៈការគោរព ការស្លៀកពាក់ និងពិធីសាសនាសំខាន់របស់ខ្មែរ ។ ការចូលរួមកម្មវិធីនេះបានជំរុញចិត្តរបស់នាងកាន់តែជ្រះថ្លា ស្ងប់ស្ងាត់ ចូលរួមសាងកុសល អំពើល្អក្នុងសង្គម ។
ដួង ម៉ានិច អរគុណសម្រាប់ការច្នៃម៉ូដយ៉ាងពិសេសពីក្រុមអ្នកជំនាញក្នុងឈុតជានាងនាគសម្រាប់ការចូលរួមបង្ហាញវត្តមានទាំង២ថ្ងៃទាំងថ្ងៃសែនក្រុងពលី និងថ្ងៃរៀបពិធីទី១០ ខែធ្នូ ៕
