រាជធានីភ្នំពេញ ៖ តារាកំប្លែងនាយ ក្រិន ត្រូវបានក្រុមគ្រួសារនាំមកពិនិត្យ និងព្យាបាលនៅក្នុងមន្ទីរពេទ្យ បន្ទាប់ពីលោកបានធ្លាក់ខ្លួនឈឺដោយសាររលាកត្រចៀក ហើយរាលដាលប៉ះពាល់ដល់ប្រព័ន្ធប្រសាទ ជាហេតុធ្វើអោយរូបលោកវង្វេងលែងដឹងខ្លួនតែម្តង ។…
រាជធានីភ្នំពេញ ៖ តារាកំប្លែងនាយ ក្រិន ត្រូវបានក្រុមគ្រួសារនាំមកពិនិត្យ និងព្យាបាលនៅក្នុងមន្ទីរពេទ្យ បន្ទាប់ពីលោកបានធ្លាក់ខ្លួនឈឺដោយសាររលាកត្រចៀក ហើយរាលដាលប៉ះពាល់ដល់ប្រព័ន្ធប្រសាទ ជាហេតុធ្វើអោយរូបលោកវង្វេងលែងដឹងខ្លួនតែម្តង ។
ដំណឹងនេះ ត្រូវបានចែករំលែក និងផ្តល់ដំណឹងឲ្យដឹងពីតារាសម្តែងលោក សាវីន ហ្វីលីព ដែលបានបង្ហោះលើបណ្តាញសង្គម កាលពីថ្ងៃទី១០ ខែមីនា ឆ្នាំ២០២៦ ខណៈពេលដែលដំណឹងនេះ បានក្លាយជាក្តីបារម្ភចំពោះប្រិយមិត្តគាំទ្រ ជាពិសេស បណ្តាអ្នកសិល្បៈដែលធ្លាប់រាប់អានតារាកំប្លែងនាយក្រិន ។
លោក សាវីន ហ្វីលីព បានបង្ហោះរូបភាព នាយ ក្រិន កំពុងដេកសម្រាកព្យាបាលនៅក្នុងមន្ទីរពេទ្យមួយកន្លែង ដោយលោកបានភ្ជាប់ជាមួយសំណេរថា នាយក្រិន ធ្លាក់ខ្លួនឈឺធ្ងន់ដោយសាររលាកត្រចៀក ហើយបណ្ដាលអោយប៉ះពាល់ប្រព័ន្ធប្រសាទវង្វេងលែងដឹងខ្លួនហើយ ពេលនេះកំពុងស្ថិតក្នុងគ្លីនីកមួយក្នុងក្រុងបាត់ដំបង ។
បន្ថែមពីលើអ្វីដែលបានបង្ហោះខាងលើនេះ លោក សាវីន ហ្វីលីព បានអះអាងប្រាប់កោះសន្តិភាពថា តាមការបញ្ជាក់ពីកូនរបស់នាយ ក្រិន ស្ថានភាពរបស់នាយនាពេលនេះកំពុងមានលក្ខណៈធ្ងន់ ដោយសារជំងឺត្រចៀករបស់នាយ បានរាលដាលទៅដល់ប្រព័ន្ធប្រសាទធ្វើឲ្យវង្វេងវង្វាន់មិនដឹងអ្វី ។
លោកបន្តថា មុនឈឺធ្ងន់នេះ២ថ្ងៃ លោកបានទំនាក់ទំនងជាមួយនាយ ក្រិន ជាធម្មតា ដោយពេលនោះនាយ ក្រិន បានចូលសម្រាកព្យាបាលនៅក្នុងមន្ទីរពេទ្យមួយនៅម្តុំភ្នំឧដុង្គ ដោយសារលោកមានសភាពក្តៅខ្លួនធម្មតា ។ លុះក្រោយមក ស្ថានភាពរៀងធូរស្បើយ នាយ ក្រិន ក៏បានប្រាប់លោកដោយលាលោកទៅខេត្តបាត់ដំបងវិញ ប៉ុន្តែក្រោយមកក៏ទទួលដំណឹងថា នាយ ក្រិន បានធ្លាក់ខ្លួនឈឺធ្ងន់នាពេលនេះ ។
លោកបញ្ជាក់ថា ក្រោយបានសាកសួរពីក្រុមគ្រូពេទ្យអាការៈរបស់នាយ ក្រិន នាពេលនេះគឺមានលក្ខណៈធ្ងន់ធ្ងរ ដោយវង្វេងលែងស្គាល់អ្នកណាទាំងអស់ ហើយមេរោគបានឡើងពេញឈាម ដោយសារនាយរលាកប្រអប់ត្រចៀកខាងឆ្វេង ធ្វើឲ្យមេរោគឡើងពេញខួរក្បាល ។
លោកបន្តថា ដោយសារស្ថានភាពនេះ នាយ ក្រិន គឺត្រូវតម្រូវឲ្យប្រើថ្នាំដែលធ្ងន់ និងថ្លៃដែលអាចមួយថ្ងៃចំណាយប្រមាណជាង១០០ដុល្លារ ហើយទុកបណ្តោយទៅទៀតនាយអាចនឹងគ្រោះថ្នាក់ដល់ជីវិត ហេតុនេះរូបលោក និងក្រុមគ្រួសារនឹងបញ្ចូននាយមកព្យាបាលនៅក្នុងមន្ទីរពេទ្យអង្គឌួងតែម្តង ។
លោក សាវីន ហ្វីលីព បានអះអាងបន្ថែមថា តាមពិតទៅ លោក និងនាយ ក្រិន មិនមានជាប់ពាក់ព័ន្ធអ្វីគ្នាឡើយ ប៉ុន្តែដោយសារលោកមើលឃើញពីភាពលំបាក និងការតស៊ូរបស់លោកនៅក្នុងការបីបាច់ថែរក្សាកូនចំនួន៣នាក់ ទើបលោកចេះតែជួយតាមលទ្ធភាពខណៈពេលដែលនាយក៏ជាមនុស្សដែលចេះដឹងគុណគេដែលជួយផងដែរ ។
លោកបញ្ជាក់ថា លោកបានបង្រៀនអោយនាយ ក្រិន ចេះរកលុយតាមយូធូប ដើម្បីបានលុយមួយចំនួនសម្រាប់ទៅដោះបំណុលគេ ដែលនាយជំពាក់ប្រមាណ១០ម៉ឺនដុល្លារ ។ លោកបន្ថែមថា ដោយសារការខិតខំប្រឹងប្រែងរកប្រាក់ពីយូធូប និងការចិញ្ចឹមមាន់ទា និងដាំបន្លែបង្ការនៅឯផ្ទះនាស្រុកកំណើតនោះ បច្ចុប្បន្ននាយ ក្រិន អាចដោះបំណុលគេនៅសល់តែប្រមាណជា២ម៉ឺនដុល្លារទៀតប៉ុណ្ណោះ ៕
ចែករំលែកព័តមាននេះ