ប្រទេស​ម៉ា​ឡេ​ស៊ី ​៖ ទេសចរណ៍​ម៉ា​ឡេ​ស៊ី (Tourism Malaysia) បាន​ត្រឡប់​មក​វិញ​ម្តងទៀត ក្រោម​កម្មវិធី​ដែល​មានឈ្មោះ​ថា Mega Fam Iftar 2026 ជាមួយនឹង​បទ​ពិសោធន៍​ដ៏​អស្ចារ្យ នៃ​ដំណើរ​កម្សាន្ត​ក្នុង​ទីក្រុង​គូ​ឡា​ឡំ​ពួ និង​ទីក្រុង​ជាប់​ព្រ​លាន​យន្តហោះ គឺ​ពូ​ត្រា​ចា​យា ដែល​មាន​រយៈពេល​ ៥​ថ្ងៃ ​។

កម្មវិធី Mega Fam Iftar 2026 មាន​គោលបំណងពង្រឹង​កិច្ច​ប្រតិបត្តិការ​ជាមួយអ្នក​អនុវត្ត​ប្រព័ន្ធ​ផ្សព្វផ្សាយ និង​ដៃគូ​ពាណិជ្ជកម្ម​ទេសចរណ៍ នៅ​ទូ​ទាំង​អាស៊ាន​ ។ ប្រទេស​ម៉ា​ឡេ​ស៊ី​បាន​ដាក់​គោល​ទៅ ទេសចរណ៍វប្បធម៌ រមណីយដ្ឋាន​ប្រវត្តិសាស្ត្រ ម្ហូបអាហារ​ដ៏​សម្បូរ​បែប និង​ដំណើរ​កម្សាន្ត​នានា នៅ​ក្នុង​ទីក្រុង​តូច​ធំ ​។

តាម​រយៈ​កម្មវិធី​នេះ ក្រសួងទេសចរណ៍ សិល្បៈ និង​វប្បធម៌ ម៉ា​ឡេ​ស៊ី (MOTAC) បាន​ប្រមូលផ្តុំ តំណាង​ប្រព័ន្ធ​ផ្សព្វផ្សាយ និង​ភ្នាក់ងារទេសចរណ៍​ចំនួន ២៤​ស្ថាប័ន មក​ពី​ប្រទេស​អាស៊ាន​ចំនួន​ប្រាំពីរ គឺ​ប្រទេស​កម្ពុជា​, សិង្ហ​បុរី​, ប្រ៊ុ​យ​ណេ​, ឥណ្ឌូ​នេ​ស៊ី​, ថៃ​, ហ្វី​លី​ពី​ន​, និង​ឡាវ ដើម្បី​ទទួល​បាន​បទ​ពិសោធន៍ នៃ​ការ​ប្រារព្ធ​ពិធីបុណ្យ Iftar និង Ramadan ដ៏​រស់​រវើក ក្នុង​ទីក្រុង​គូ​ឡា​ឡំ​ពួ និង​ទីក្រុង​ពូ​ត្រា​ចា​យ៉ា ​។

យោង​តាម​សេចក្តីថ្លែងការណ៍ លោក Mohd. Amirul Rizal Abdul Rahim អគ្គនាយក​ទេសចរណ៍​ម៉ា​ឡេ​ស៊ី នៃ​ក្រសួងទេសចរណ៍ សិល្បៈ និង​វប្បធម៌ ​(MOTAC) បានឱ្យ​ដឹង​ថា ​៖ «​ដើម្បី​ធានា​បាន​នូវ​ភាព​ជោគជ័យ នៃ​ព្រឹត្តិការណ៍​ពិធីបុណ្យ Iftar និង Ramadan ទេសចរណ៍​ម៉ា​ឡេ​ស៊ី​បាន​រៀបចំ Mega Fam Iftar 2026 សម្រាប់​ប្រព័ន្ធ​ផ្សព្វផ្សាយ និង​ភ្នាក់ងារទេសចរណ៍​អាស៊ាន ដោយ​ផ្តល់​ជូន​នូវ​បទ​ពិសោធន៍​ដ៏​គួរ​ឱ្យ​ចាប់អារម្មណ៍ ខណៈ​ពេល​ដែល​ពង្រីក​ការ​ផ្សព្វផ្សាយ អំពី​វប្បធម៌ ម្ហូបអាហារ និង​គោលដៅ​ទេសចរណ៍ ដ៏​ល្បីល្បាញ​របស់​ប្រទេស​ម៉ា​ឡេ​ស៊ី ។ គំនិត​ផ្តួចផ្តើម​នេះ​ស្រប​នឹង​គោលបំណង​នៃ​យុទ្ធនាការ VM2026 ដើម្បី​ដាក់​ប្រទេស​ម៉ា​ឡេ​ស៊ី ជា​គោលដៅ​ទេសចរណ៍វប្បធម៌ និង​ម្ហូបអាហារ លំដាប់​ពិភពលោក​» ។

អំឡុង​ពេល ៥​ថ្ងៃ នៃ​ដំណើរ​ទស្សនកិច្ច របស់​ស្ថាប័ន​ផ្សព្វផ្សាយ ទេសចរណ៍​ម៉ា​ឡេ​ស៊ី បាន​ដឹកនាំ​អ្នក​ផ្សព្វផ្សាយ​ទាំងអស់ ទៅ​កាន់​ទីកន្លែង​ល្បី​ៗ, រមណីយដ្ឋាន​ប្រវត្តិសាស្ត្រ​, ផ្សារ​ទំនើប​ដ៏​មាន​ប្រជាប្រិយភាព​, ហាង​ម្ហូបអាហារ​នានា ដែល​សុទ្ធ​សឹង​ជា​កន្លែង​ដែល​ភ្ញៀវ​ទេសចរ អាច​ងាយស្រួល​រកបាន ​។
ខាងក្រោម​នេះ គឺជា​ទីតាំង​មួយ​ចំនួន ដែល​ភ្ញៀវ​ទេសចរ​ជាតិ​និង​អន្តរជាតិ មិន​បាន​មើល ឬ​ត្រូវ​តែ​មក​អគារ​នេះ ដើម្បី​បង្ហាញ​ពិភពលោក​ថា លោក​អ្នក​បាន​មក​កម្សាន្ត ក្នុង​ទីក្រុង​គូ​ឡា​ឡំ​ពួ ​៖

ជាមួយ​និង​ការ​ស្នាក់​នៅ​សណ្ឋាគារ លំដាប់​ពី​ភព​លោក Perdana Hotel Kuala Lumpur City Centre៖ គឺជា​សណ្ឋាគារ​លំដាប់​ផ្កាយ​ ៥ ដែល​ស្ថិត​នៅ​ចំ​កណ្តាល​ទីក្រុង​គូ​ឡា​ឡំ​ពួ សណ្ឋាគារ​នេះ​ពិសេស​ដោយសារ វា​ធ្វើ​ឱ្យ​មាន​ភាព​ងាយស្រួល​ខ្លាំង សម្រាប់​អ្នក​ធ្វើ​ដំណើរ​ថ្មើ​ជើង ទៅ​កាន់​ទីតាំង​ល្បី​ៗ ក្នុង​ទីក្រុង​ ។

Seri Negara ៖ គឺជា​លំនៅ​ឋាន​ដែល​កែប្រែ​វាសនា និង​អនាគត​ប្រជាជាតិ​ម៉ា​ឡេ​ស៊ី ​។ ប្រទេស​ម៉ា​ឡេ​ស៊ី បាន​រក្សា​ទុក​នូវ​ទី​ស្ថាន​ប្រវត្តិសាស្ត្រ​ជា​ច្រើន តួយ៉ាង​លំនៅ​ដ្ឋា​ន Seri Negara គឺ​សម្រាប់​រក្សា​ទុក​ឱ្យ​ប្រជាជន​ជំនាន់​ក្រោយ​ពួក​គេ បាន​សិក្សា​ស្រាវជ្រាវ ស្ថានីយ​ប្រវត្តិសាស្ត្រ ជា​ពិសេស ប្រវត្តិសាស្ត្រ​ដែល​មាន​ភាព​ចម្រូងចម្រាស់​ខ្លាំង ​។

ទីក្រុង Putrajaya ៖ មិនមែន​គ្រាន់តែ​ជា​រដ្ឋធានី​រដ្ឋបាល​របស់​ប្រទេស​ម៉ា​ឡេ​ស៊ី​នោះ​ទេ វា​គឺជា​ទីក្រុង​ដែល​មាន​ចក្ខុវិស័យ និង​មានការ​រចនា​ដ៏​ល្បីល្បាញ និង​សម្រាប់​ស្វាគមន៍​ព្រឹត្តិការណ៍​លំដាប់​ៗ​ពិភពលោក​ផង​ដែរ ​។
Oriental Kopi, Alamanda Putrajaya ៖ ជា​ហាង​តែ​, កាហ្វេ​, និង​អាហារ ដែល​មាន​លក្ខណៈ​ជា​ប្រពៃណី និង​ផ្ទាល់ខ្លួន (Unique) ​។

ផ្សារ​ទំនើប The Exchange TRX ៖ ជាទី​កន្លែង​កម្សាន្ត​ដ៏​សម្បូរ​បែប និង​ចម្រុះ ដោយ​ធម្មជាតិ ដែល​មាន​លក់​ទាំង​អាហារ​ឆ្ងាញ់​ៗ សម្រាប់​ភ្ញៀវ​ជាតិ​និង​អន្តរជាតិ ​។ នៅ​មិន​ឆ្ងាយ​ពី​ផ្សារ​ទំនើប The Exchange TRX ក៏​មាន​អគារ​ដែល​មាន​កម្ពស់ 421​ម៉ែត្រ ដែល​គ្រប់​គ្នា​ស្គាល់ និង​មិន​អាច​ដើរ​ហួស​ទីនោះ​បាន គឺ The Kuala Lumpur Tower (KL Tower)​ ។

និង The Kuala Lumpur Tower៖ ជា​ការ​ពិត ភ្ញៀវ​ជាតិ​និង​អន្តរជាតិ មិន​ដែល​មើល​រំលង​អគារ KL Tower នេះ​ទេ ព្រោះថា​ប្រ​សិន​លោក​អ្នក​ចង់​មើលឃើញ អគារ​ខ្ពស់​ៗ​ដទៃ​ទៀត​និង​ទេសភាព ទីក្រុង​គូ​ឡា​ឡំ​ពួ​ទាំងមូល ប្រាកដ​ណាស់ គឺ​ត្រូវ​ឡើង​លើ​កំពូល​អគារ​នេះ​។ វា​មាន​កម្ពស់ 421 ម៉ែត្រ វា​ជា​ប៉ម​ដែល​ខ្ពស់​បំផុត​ទី 7 របស់​ពិភពលោក​។ វា​មាន​អង់​តែ​ន​មួយ ដែល​ធ្វើ​ឱ្យ​កម្ពស់​របស់​វា​ខ្ពស់​ដល់ 421 ម៉ែត្រ ហើយ​ដំបូល​នៃ​ប៉ម​មាន​កម្ពស់ 335 ម៉ែត្រ ​។

សូម​ជម្រាប​ផង​ដែរ​ថា ដើម្បី​គាំទ្រ​ដល់​កម្មវិធី Visit Malaysia 2026 (VM2026) ប្រទេស​ម៉ា​ឡេ​ស៊ី បាន​ដឹកនាំ​ដំណើរ​កម្សាន្ត របស់​អ្នក​សារព័ត៌មាន មក​ពី​បណ្តា​ប្រទេស​ក្នុង​អាស៊ាន មាន​រយៈពេល​៥​ថ្ងៃ ចាប់ពី​ថ្ងៃ​ទី 27 ខែកុម្ភៈ ដល់​ថ្ងៃ​ទី ​3 ខែមីនា ឆ្នាំ​ 2026 កន្លង​ទៅ​នេះ​ ។

ក្រុមប្រឹក្សា​ផ្សព្វផ្សាយ​ទេសចរណ៍​ម៉ា​ឡេ​ស៊ី (Tourism Malaysia Promotion Board) គឺជា​ទីភ្នាក់ងារ​មួយ ក្រោម​ក្រសួងទេសចរណ៍ សិល្បៈ និង​វប្បធម៌​ម៉ា​ឡេ​ស៊ី (MOTAC) ផ្តោត​លើ​ការ​ផ្សព្វផ្សាយ​ប្រទេស​ម៉ា​ឡេ​ស៊ី ឱ្យ​ក្លាយជា​គោលដៅ​ទេសចរណ៍ ដ៏​ពេញ​និយម​។ ចាប់តាំងពី​ការ​បង្កើត​ស្ថាប័ន​នេះ​ឡើង​មក វា​បាន​ដើរតួ​នាទី​យ៉ាង​សំខាន់ ក្នុង​ការ​ពង្រឹង​វត្តមាន និង​ភាព​ប្រកួតប្រជែង​វិស័យ​ទេសចរណ៍ នៅ​ក្នុង​ពិភពលោក ​។ យុទ្ធនាការ «​ទស្សនា​ម៉ា​ឡេ​ស៊ី​ឆ្នាំ ២០២៦» ឬ Visit Malaysia 2026 (VM2026) បាន​ប្តេជ្ញា​ចិត្ត​របស់​ប្រទេស​ម៉ា​ឡេ​ស៊ី ចំពោះ​ការ​អភិវឌ្ឍ​ទេសចរណ៍ ប្រកបដោយ​ចីរភាព ស្រប​តាម​គោលដៅ​អភិវឌ្ឍន៍ របស់​អង្គការសហប្រជាជាតិ (UNSDGs)​។ យុទ្ធនាការ​នេះ​មាន​គោលបំណង​បង្ហាញ ពី​ភាព​ទាក់ទាញ​ធម្មជាតិ​ចម្រុះ​របស់​ប្រទេស បេតិកភណ្ឌ​វប្បធម៌​ដ៏​សម្បូរ​បែប និង​ការ​ផ្តល់​ជូន​ទេសចរណ៍​ដ៏​រស់​រវើក ខណៈ​ពេល​ដែល​ជំរុញ​កំណើន​ប្រកបដោយ​បរិ​យា​ប័ន្ន និង​តម្លៃ​រយៈពេល​វែង សម្រាប់​សហគមន៍​ក្នុងស្រុក និង​អ្នក​ពាក់ព័ន្ធ​ក្នុង​ឧស្សាហកម្ម​៕