រាជធានីភ្នំពេញ ៖ កីឡាករកីឡាការិនីជម្រើសជាតិកម្ពុជា បានត្រៀមខ្លួនរួចជាស្រេចហើយ ដើម្បីស្វាគមន៍ប្រតិភូកីឡាវ៉ូវីណាមមកពី ២៣ប្រទេស ចូលរួមក្នុងព្រឹត្តិការណ៍កីឡាវ៉ូវីណាម ជើងឯកពិភពលោកលើកទី៦(The 6th WVVF…
រាជធានីភ្នំពេញ ៖ កីឡាករកីឡាការិនីជម្រើសជាតិកម្ពុជា បានត្រៀមខ្លួនរួចជាស្រេចហើយ ដើម្បីស្វាគមន៍ប្រតិភូកីឡាវ៉ូវីណាមមកពី ២៣ប្រទេស ចូលរួមក្នុងព្រឹត្តិការណ៍កីឡាវ៉ូវីណាម ជើងឯកពិភពលោកលើកទី៦(The 6th WVVF World Vovinam Championship 2019) ដែលនឹងប្រព្រឹត្តទៅចាប់ពីថ្ងៃទី១៦ដល់២២ ខែ ធ្នូ ឆ្នាំ២០១៩ ។
លោក អ៊ូ រតនា អនុប្រធានសហព័ន្ធកីឡាវ៉ូវីណាមកម្ពុជា បានឱ្យដឹងថា ពេលនេះកម្ពុជាបានត្រៀមខ្លួនរួចរាល់អស់ហើយ ក្នុងនាមជាម្ចាស់ ផ្ទះដើម្បីប្រកួតដណ្ដើមយកមេដាយជូនប្រទេសជាតិ ។ យើងធ្លាប់មានបទពិសោធន៍រួចមកហើយ កាលពីប្រទេសឥណ្ឌាធ្វើជាម្ចាស់ផ្ទះ កម្ពុជាយើងទទួលបានលទ្ធផលល្អ ហើយពេលនេះយើងនៅតែមានសង្ឃឹមថានឹងធ្វើបានល្អដូចកាលពីនៅប្រទេសឥណ្ឌាដែរ ។
ម្យ៉ាងវិញទៀត អ្វីដែលជាសក្ដានុពលសម្រាប់កម្ពុជាយើង គឺដោយសារតែយើងធ្លាប់ធ្វើជាម្ចាស់ផ្ទះជើងឯកអាស៊ីអាគ្នេយ៍ចំនួន២លើករួច មកហើយ ។ មិនតែប៉ុណ្ណោះ ក្នុងចំណោមបណ្ដាប្រទេសជាសមាជិកពេញសិទ្ធិជាង៤០នៅលើពិភពលោក គេមានបំណងចង់មកប្រទេសកម្ពុជា ដែលមានភាពល្បីល្បាញពីសម្បត្តិបេតិកភ័ណ្ឌវប្បធម៍ដ៏សម្បូរបែប ជាពិសេសប្រាសាទ អង្គរវត្តតែម្ដង ដោយបណ្ដាប្រទេសនានាដែលមកចូលរួមប្រកួត គេសន្យាថាពេលប្រកួតចប់នឹងធ្វើដំណើរទៅកម្សាន្តមុនពេលត្រឡប់ទៅវិញ ។
លោក អ៊ូ រតនា បានបន្តទៀតថា ការប្រកួតនេះគឺជាឱកាសដ៏ល្អសម្រាប់កម្ពុជាយើង ក្នុងការកសាងសមត្ថភាពនិងអភិវឌ្ឍន៍វិស័យកីឡាវ៉ូវីណាមឱ្យកាន់តែមានការរីកចម្រើន ។ អ្វីដែល
សំខាន់ជាងនេះទៀតនោះ គឺយើងចង់ឱ្យសហព័ន្ធកីឡាវ៉ូវីណាមពិភពលោក បានឃើញពីសមត្ថ
ភាពអាជ្ញាកណ្ដាល ចៅក្រមកម្ពុជា គឺជាមន្ត្រីដែលមានសមត្ថភាពកម្រិតអន្តរជាតិថែមទៀត។
បច្ចុប្បន្ននេះ យើងកំពុងរួមគ្នាក៏សាងបន្ថែមនូវកិត្តិយស កិត្យានុភាពរបស់ជាតិលើឆាកអន្តរ
ជាតិ តាមរយៈការរៀបចំឱ្យមានព្រឹត្តិការណ៍ប្រកួតជាលក្ខណៈអន្តរជាតិនេះឡើង ហើយក៏ដើម្បីរួមចំណែកក្នុងការផ្សព្វផ្សាយនូវប្រពៃណី វប្បធម៌ ទេសចរណ៍ជូនមិត្តអន្តរជាតិបានស្គាល់ទៀតផង ។
លើសពីនេះទៀត រាជរដ្ឋាភិបាលកម្ពុជា គណៈកម្មាធិការជាតិអូឡាំពិកកម្ពុជា និងសហព័ន្ធកីឡា
វ៉ូវីណាមកម្ពុជា បានផ្ដោតសំខាន់ទៅលើការត្រៀមលក្ខណៈបច្ចេកទេសឆ្ពោះទៅដណ្ដើមជ័យជម្នះពីការប្រកួតកីឡាស៊ីហ្គេមលើកទី៣២ ឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះ ៕ (កែសម្រួលដោយ ៖ បុប្ផា)
ចែករំលែកព័តមាននេះ