ខេត្តស្ទឹងត្រែង ៖ គ្រួសារកងទ័ព និងនគរបាលវរៈព្រំដែនកម្ពុជា-ឡាវចំណុចស្វាយធំ និងកោះទន្សាយ នៃស្រុកសៀមប៉ាង ទទួលបានអំណោយដ៏ថ្លៃថ្លាពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដោយក្នុងមួយគ្រួសារ ឬ១ខ្នងផ្ទះទទួលបានផ្ទាំងសូឡាចំនួនមួយផ្ទាំង និងពិល១គ្រឿង សរុបទាំងអស់មានចំនួន៥០០គ្រួសារ ស្មើនឹង៥០០ខ្នងផ្ទះ។
លោក ម៉ុម សារឿន អភិបាលនៃគណៈអភិបាលខេត្តស្ទឹងត្រែង រួមដំណើរជាមួយនឹងមន្ត្រីរាជការនៃអង្គភាពជុំវិញខេត្តបានចុះទៅដល់ចំណុចខាងលើ និងធ្វើការចែកអំណោយកាលពីព្រឹកថ្ងៃទី១២ ខែធ្នូ ឆ្នាំ២០១៩។ កងទ័ព និងនគរបាលវរៈព្រំដែន ចំនួន៥០០គ្រួសារ មានក្តីសោមនស្សរីករាយ ទទួលស្វាគមន៍យ៉ាងកក់ក្តៅបំផុតដល់ថ្នាក់ដឹកនាំខេត្ត ដែលបានចុះសួរសុខទុក្ខដល់កងកំលាំងប្រដាប់អាវុធទាំង២ប្រភេទ កំពុងឈជើងការពារទឹកដីតាមខ្សែបន្ទាត់ព្រំដែនកម្ពុជា-ឡាវ ហើយបានពាំនាំនូវអំណោយផ្ទាំងសូឡាប្រើពន្លឺព្រះអាទិត្យ ចែកជូនដើម្បីប្រើប្រាស់ក្នុងផ្ទះនីមួយៗ។
លោកអភិបាលនៃគណៈអភិបាលខេត្ត បានមានប្រសាសន៍ថា កម្លាំងអគ្គិសនីប្រើពន្លឺព្រះអាទិត្យដែលយកមកចែកជូនគ្រួសារកងទ័ព និងនគរបាលវរៈព្រំដែននាពេលនេះ ទោះបីជាមិនអាចប្រើប្រាស់កម្លាំងអគ្គិសនីខ្លាំងក៏ពិតមែន តែវាជាចំណែកមួយផ្តល់ពន្លឺនៅក្នុងផ្ទះរបស់យើងបាន។
លោក អភិបាលនៃគណៈអភិបាលខេត្តមានប្រសាសន៍បន្តថា រាជរដ្ឋាភិបាល ដែលមាន សម្តេចតេជោ ហ៊ុន សែននាយករដ្ឋមន្ត្រី មិនបានទុកនរណាម្នាក់ចោលឡើយ ដោយសម្តេច បានគិតគូរសុខទុក្ខជានិច្ចដល់កងកំលាំងប្រដាប់អាវុធការពារទឹកដីនៅតាមបន្ទាត់ព្រំដែនកម្ពុជា-ឡាវ ៕ (កែសម្រួលដោយ ៖ ធីតា)
ចែករំលែកព័តមាននេះ