ខេត្តប៉ៃលិន ៖ ជារៀងរាល់ឆ្នាំ ឱ្យតែរដូវរងារឈានចូលមកដល់ អ្វីដែលគេសង្កេតឃើញនៅតាមផ្សារ គឺប្រជាពលរដ្ឋតែងតែជុំៗគ្នានៅកន្លែងលក់ខោអាវជជុះ និងអាវរងា ដោយម្នាក់ៗខ្លះទិញ២ទៅ៣កំប្លេ ហើយខ្លះទៀតទិញសម្រាប់ខ្លួនឯង និងផ្ញើអ្នកផ្ទះដូចជាកូនចៅ និងប្តី ដើម្បីពាក់បំបាត់រងាផងដែរ ។
ជាក់ស្តែងកាលពីម៉ោង៩ និង៥៣នាទីព្រឹក ថ្ងៃទី១២ ខែធ្នូ ឆ្នាំ២០១៩ ស្ថិតនៅក្នុងផ្សារត្រី ក្នុងភូមិប៉ាហ៊ីជើង សង្កាត់ប៉ៃលិន មានប្រជាពលរដ្ឋជាច្រើនបាននាំគ្នាសម្រុកចូលទៅទិញយ៉ាងពពាក់ពពូន ដែលធ្វើឱ្យអ្នកលក់ដូរមានទឹកមុខញញឹមញញែម ស្ទើរតែបិទមាត់មិនជិតនោះឡើយ ហើយក៏តែងតែជម្រុញឱ្យអតិថិជនដែលរើសខោអាវក្នុងម្នាក់ៗទិញមិនតិចនោះទេ ។
ប្រភពព័ត៌មានពីស្ត្រីម្នាក់ឈ្មោះ ស្រីម៉ៅ អាយុប្រហែល៤៥ឆ្នាំ មានស្រុកកំណើតរស់នៅខេត្តបាត់ដំបង ជាអាជីវករលក់ខោអាវជជុះក្នុងផ្សារខាងលើ បានរៀបរាប់ថា ឱ្យតែដល់រដូវរងាម្តងៗ គាត់តែងតែដឹកខោអាវជជុះពីខេត្តបាត់ដំបងឆ្ពោះទៅខេត្តប៉ៃលិន ដើម្បីដាក់លក់ដូរឱ្យប្រជាពលរដ្ឋមកពីតាមជនបទស្រែចម្ការទិញយកទៅប្រើប្រាស់ ។
គាត់បន្តទៀតថា ការប្រកបរបរលក់ដូរខោអាវជជុះ ដែលលក់ដាច់ច្រើនជាងគេបំផុត គឺមានតែរដូវរងានេះមួយគត់ ក្រៅពីនេះគឺលក់ដាច់មួយៗប៉ុណ្ណោះ ព្រោះប្រជាពលរដ្ឋមិនសូវសម្រុកទិញដូចខែធ្នូនេះឡើយ ។ គាត់បន្ថែមទៀតថា ការលក់ដូរសម្លៀកបំពាក់រងារ ក៏ដូចជាខោអាវជជុះ មិនថ្លៃប៉ុន្មាននោះទេ ជួនកាលអាវ១ លក់ត្រឹមតែ២០០០ទៅ៣០០០រៀល បើស្អាតជាងនេះ ក៏លក់បានថ្លៃរហូតដល់៤០០០ទៅ៥០០០រៀលដែរ ព្រោះគាត់លើកពីគេមកគិតជាការ៉ុង យកមកលក់ជូនប្រជាពលរដ្ឋទិញយកទៅពាក់បំបាត់រងា និងអាចពាក់ធ្វើការងារស្រែចម្ការបានយ៉ាងស្រួលផងដែរ ។
ចំណែកស្ត្រីវ័យចំណាស់ម្នាក់ ឈ្មោះ អ៊ុន អាយុ៥០ឆ្នាំ រស់នៅភូមិប៉ាហ៊ីជើង សង្កាត់ប៉ៃលិន បានឱ្យដឹងថា គាត់បានទៅផ្សារទិញខោអាវជជុះជាច្រើនសម្រាប់យកមកអ៊ុតឱ្យស្អាត អាច ប្រើប្រាស់ដូចសម្លៀកបំពាក់ក្នុងហាងដែរ ព្រោះសាច់ក្រណាត់ស្អាតៗ មើលស្ទើរតែមិនដឹងថា ជាខោអាចជជុះនោះឡើយ ។
គាត់ចូលចិត្តទិញសម្លៀកបំពាក់បែបនេះ ព្រោះកាត់បន្ថយការចំណាយថវិកា និងរើសបានសម្លៀកបំពាក់ស្អាតសមរម្យ អាចទទួលយកបាន ហើយគាត់ក៏ទិញយកទៅផ្ញើកូនៗនៅផ្ទះជាច្រើនថែមទៀត ដោយគិតទៅទិញម្តងៗអស់ត្រឹមតែ២ទៅ៣ម៉ឺនរៀល បានសម្លៀកបំពាក់ជាច្រើន ។ ម្យ៉ាងវិញទៀត គាត់ក៏ទិញខៀអាវទាំងនេះ ទុកសម្រាប់យកទៅចម្ការកាច់ពោត និងដាំដំឡូងមី មិនប្រើសម្លៀកបំពាក់ថ្មីនោះឡើយ ៕ (កែសម្រួលដោយ ៖ បុប្ផា)
ចែករំលែកព័តមាននេះ