ខេត្តកំពង់ចាម ៖ នៅក្នុងរដូវបើកនេសាទនៅលើផ្ទៃទឹកទន្លេមេគង្គត្រង់ចំណុចស្ពានគីស្សុណា ក្រុងកំពង់ចាម នាព្រឹកថ្ងៃទី១១ ខែធ្នូ ឆ្នាំ២០១៩នេះ គេបានសង្កេតឃើញថា ទូកនេសាទ អូសអួន អូសមាញ់ នឹងដាក់មងជាច្រើនគ្រឿង កំពុងតែបណ្ដែតទៅលើផ្ទៃទឹកចាប់ត្រី ដើម្បីលក់សម្រាប់ដោះស្រាយជីវភាពគ្រួសាររបស់បងប្អូនខ្មែរអ៊ិស្លាម។
លោកអ៊ុក ណារិន នាយខណ្ឌរដ្ឋបាលជលផលខេត្ត បានឲ្យដឹងថា ខ្យល់កត្តិក បានបក់ផាត់មកពីទិសខាងជើងឱ្យនៅថ្ងៃទី៩ ធ្នូ ត្រីបានចាប់ផ្ដើមត្រូវជាបណ្ដើរៗហើយ ប៉ុន្តែបើតាមការប្រមើលមើលផលត្រីនៅឆ្នាំនេះ អាចនឹងមានការថមថយចុះប្រមាណពី១០ទៅ១៥ភាគរយជាងឆ្នាំកន្លងទៅ។
លោក អ៊ុក ណារិន នាយខណ្ឌរដ្ឋបាលជលផលខេត្តប្រាប់បន្តថា សម្រាប់ទីតាំងត្រីដែលត្រូវនៅតាមដងទន្លេមេគង្គ ក្នុងនោះរួមមាននៅជីរោរ៍ ក្រុងកំពង់ចាម ខ្ញូង ភូមិថ្មី និងស្រុកស្រីសន្ធរ ។ នៅក្នុងថ្ងៃទី៩ ធ្នូ ២០១៩ តម្លៃត្រីក្នុងមួយគីឡូក្រាមពី៦.០០០ ទៅ៧.០០០ រៀល ហើយមកដល់ថ្ងៃទី១០ និង១១ធ្នូ តម្លៃត្រីនៅ ២.០០០ ទៅ៣.៥០០ រៀល ក្នុងមួយគីឡូក្រាម។
ជាមួយគ្នានោះលោកសូមឲ្យបងប្អូន ពូ មីង លោកតា លោកយាយ ដែលចង់ធ្វើប្រហុកផ្អក ទុកទទួលទាននោះ សូមមកធ្វើនៅទីតាំងត្រង់ចំណុចមុខវត្តជ្រោយថ្ម កំពង់សាឡាងចាស់ ភូមិថ្មី និងតាមច្រាំងទំន្លេមួយចំនួនទៀត។
បើតាមពិនិត្យមើលដោយមន្ត្រីក្រោមឱវាទរបស់លោកឃើញថា បងប្អូនខ្មែរអ៊ិស្លាមដែលចុះនេសាទត្រីមើលទៅហាក់បីដូចជាមិនសូវត្រូវប៉ុន្មានទេ ប៉ុន្តែសម្រាប់ខ្នើតពេញបរមី ពេលក្រោយត្រីនឹងអាចត្រូវជាងនេះ។
ក្នុងនាមរដ្ឋបាលជលផលខេត្ត សូមធ្វើការអំពាវនាវដល់បងប្អូនប្រជានេសាទទាំងឡាយធ្វើយ៉ាងណាប្រើប្រាស់ឧបករណ៍នេសាទស្របច្បាប់ទៅតាមការស្នើសុំរបស់ក្រសួងកសិកម្មរុក្ខាប្រមាញ់ និងនេសាទ ដើម្បីចាប់យកត្រីនៅក្នុងដងទន្លេមេគង្គ ជាមួយនោះសូមចៀសវាងការប្រើប្រាស់ឧបករណ៍នេសាទល្មើសច្បាប់ ដែលច្បាប់បានហាមឃាត់។
គួររំលឹកដែរថា កាលពីប៉ុន្មានឆ្នាំមុនក្នុងគ្រាដែលផ្លូវថ្នល់មិនទាន់មានការអភិវឌ្ឍឲ្យបានល្អដូចសព្វ ថ្ងៃគេបានឃើញបងប្អូនប្រជាពលរដ្ឋរស់នៅស្រុកឆ្ងាយៗ បានបរទេះគោស្កាត់មកធ្វើប្រហុកផ្អកដល់ក្រុងកំពង់ចាម ដោយពួកគាត់បានបោះតង់ និងសម្រាកនៅមាត់ទន្លេដើម្បីធ្វើប្រហុកផ្អកឲ្យពេញពាង ហើយពួកគាត់ទើបនាំគ្នាត្រឡប់ទៅកាន់លំនៅឋានវិញ។
តែមកដល់សព្វថ្ងៃនេះ ក្រោមការយកចិត្តទុកដាក់របស់ប្រមុខរាជរដ្ឋាភិបាលកម្ពុជា ផ្លូវថ្នល់ ត្រូវបានជួសជុលឡើងរលោងស្អាត ហើយប្រជាពលរដ្ឋងាយស្រួលក្នុងការធ្វើដំណើរដោយជិះម៉ូតូ និងរថយន្ត មកទិញត្រី ហើយពួកគាត់នឹងត្រឡប់ទៅផ្ទះវិញដោយឆាប់ រហ័សទាន់ពេលវេលា៕ (កែសម្រួលដោយ ៖ បុប្ផា)
ចែករំលែកព័តមាននេះ