ប្រទេសស៊ីលី ៖ កងទ័ពអាកាសស៊ីលីប្រកាសកាលពីយប់ថ្ងៃទី១១ធ្នូថា បណ្ដាបំណែករបស់យន្តហោះត្រូវបានរកឃើញក្នុងសមុទ្រ នាចុងខាងត្បូងនៃទ្វីបអាមេរិក ត្រង់តំបន់ដែលយន្តហោះយោធាស៊ីលីមួយគ្រឿងបាត់ដាន ចាប់តាំងពី២ថ្ងៃមកហើយ ដោយក្នុងយន្តហោះនោះមានមនុស្សជិះ៣៨នាក់។
លោកអេឌូអាដូម៉ូស្កើរីយ៉ា មេបញ្ជាការកងពលតូចទ័ពអាកាសទី៤នៅពុនតាអារឺណាស់ចម្ងាយ៣០០០គីឡូម៉ែត្រខាងត្បូងទីក្រុងសាន់ត្យាហ្គោថ្លែងទៅកាន់សារព័ត៌មានថា នាវាមួយគ្រឿងដោតទង់ជាតិស៊ីលីឈ្មោះANTARCTIC ENDEAVOUR បានរកឃើញបំណែកនានា ដែលអាចជាបំណែករបស់យន្តហោះធុនC-130នោះ។ បំណែកទាំងនេះត្រូវបានប្រទះឃើញត្រង់កន្លែងមួយ ចម្ងាយប្រមាណជា៣០គីឡូម៉ែត្រ ពីចំណុចបាត់ដានយន្តហោះចន្លោះប្រទេសស៊ីលីនិងមហាសមុទ្រអង់តាក់ទិក។
ចំណែកអ្នកទទួលខុសត្រូវតំបន់ម្នាក់និយាយថា បណ្ដាមនុស្សដែលបានបាត់បង់ជីវិតត្រូវរកឃើញក្នុងសមុទ្រ ក្នុងដែនទឹកនៃចំណុចចុងខាងត្បូងនៃទ្វីបអាមេរិក ត្រង់តំបន់យន្តហោះបាត់ដាន។ លោកចូសេហ្វ័រណង់ដេសអ្នកទទួលខុសត្រូវតំបន់ម៉ាហ្គាល់ឡាន ចុងខាងត្បូងស៊ីលីថ្លែងទៅកាន់បណ្ដាអ្នកកាសែតថា គេបានរកឃើញបំណែកមួយចំនួន ព្រមទាំងបណ្ដាមនុស្សដែលបាត់បង់ជីវិត។
យន្តហោះយោធាធុនHERCULES C-130បានហោះចេញកាលពីថ្ងៃទី៩ធ្នូពីមូលដ្ឋានចាប៊ុនកូនៅពុនតាអារើណាស់ចុងខាងត្បូងស៊ីលី នាវេលាម៉ោង១៦និង៥៥នាទីម៉ោងក្នុងស្រុក ទៅកាន់មូលដ្ឋានអង់តាក់ទិកEDUARDO FREI។ វាបាត់ដានពីអេក្រង់រ៉ាដានាវេលាម៉ោង១៨និង១៣នាទី។
ចាប់តាំងពីពេលនោះមកយន្តហោះ១៥គ្រឿងនិងនាវា៥គ្រឿងបានចូលរួមក្នុងប្រតិបត្តិការតាមរុករក។ ក្រៅពីស៊ីលីប្រទេសអាហ្សង់ទីន អ៊ុយរូហ្គាយ ប្រេស៊ីល និងសហរដ្ឋអាមេរិក បានបញ្ជូនបណ្ដាមធ្យោបាយអាកាសនិងជើងទឹក មកកាន់តំបន់យន្តហោះបាត់ដាន។ មានការអះអាងថានាវាប្រេស៊ីលបានរកឃើញបណ្ដារបស់របរផ្ទាល់ខ្លួនព្រមទាំងបណ្ដាបំណែកយន្តហោះ៕ (កែសម្រួលដោយ ៖ បុប្ផា)
ចែករំលែកព័តមាននេះ