ខេត្តកំពត ៖ ថ្ងៃបុណ្យសមុទ្រលើកទី៨ ជុំទី២ដែលប្រព្រឹត្តទៅនៅថ្ងៃទី២០ដល់ថ្ងៃ ២២ ខែធ្នូនេះ កាន់តែខិតជិតចូលមកដល់ រីឯការរៀបចំតុបតែងគ្រប់ហេដ្ឋារចនាសម្ពន្ឋ័ ការសំអាតអនាម័យបរិស្ថាន ការរៀបចំសណ្តាប់ធ្នាប់សារណ:នៅក្នុងក្រុងកំពត ក៏បានរៀបចំយ៉ាងមមាញឹកចាប់តាំងពីខែវិច្ឆិកាកន្លងមក ឃើញថាមានការរៀបចំបានពី៨០ទៅ៩០ភាគរយហើយដែរ។
ជាមួយនឹងការរៀបចំនេះដែរ កាលពីព្រឹកថ្ងៃទី១១ ខែធ្នូ ឆ្នាំ២០១៩នេះ លោក ជាវ តាយ អភិបាលនៃគណ:អភិបាលខេត្តកំពត បានដឹកនាំក្រុមការងារអាជ្ញាធូរក្រុងសង្កាត់និងមន្ត្រីជំនាញពាក់ពន្ធ័ដោយធ្វើដំណើរតាមរថយន្តប្រតិភូរដ្ឋបាលខេត្ត ដើម្បីចុះត្រួតពិនិត្យឡើងវិញពីការរៀបចំខាងលើ តើនៅកន្លែងណាខ្លះដែលធ្វើមិនទាន់ហើយតាមការកណត់នៃស្មារតីប្រជុំរបស់រដ្ឋបាលខេត្ត និងគណៈកម្មការរៀបចំបុណ្យសមុទ្រខេត្តកំពតយើង ហើយកន្លែងណាខ្លះដែលបានរៀបចំហើយរួចរាល់។
លោកអភិបាលខេត្តបានមានប្រសាសន៍ថា នៅតែរយៈពេល១០ថ្ងៃទៀតពិធីបុណ្យសមុទ្រក្នុងខេត្តកំពតនៅគ្រប់គ្នារំពឹងទុកឱកាសដ៏អធិកអធមនិងចូលមកដល់។ ជាការពិតណាស់លទ្ឋផលដែលកើតចេញពីកិច្ចខិតខំប្រឹងប្រែងរបស់ព្រះសង្ឃមន្ត្រីរាជការកងកម្លាំងប្រដាប់អាវុធក៏ដូចជាប្រជាពលរដ្ឋទូទាំងក្រុងដែរដើម្បីឱ្យក្រុងកំពតទាំងមូលក្លាយជាទីចាប់អារម្មណ៍ពីសំណាក់ភ្ញៀវទេសចរណ៍បានលេចឡើងជាបណ្ដើរៗហើយនោះ ។ ប៉ុន្តែក្នុងនាមរដ្ឋបាលខេត្តលោកចង់ឲ្យព្រឹត្តិការណ៍នៃពិធីបុណ្យសមុទ្រលើកទី៨ ជុំទី២ នេះក្លាយជាគំរូតាមរយៈការស្រូបទាញភ្ញៀវក្នុងបរិមាណដ៏ច្រើនសន្ធឹកសន្ធាប់ដែលកន្លងមកមិនធ្លាប់មាន។
លោកជាវ តាយ អភិបាលខេត្តបានបន្តថា អ្វីដែលជាគន្លឹះសំខាន់សម្រាប់ទាក់ទាញភ្ញៀវឲ្យចាប់អារម្មណ៍មកលេងកំសាន្តនោះគឺអនាម័យបរិស្ថានភាពសន្តិសុខសណ្ដាប់ធ្នាប់និងបដិសណ្ឋារកិច្ចល្អ ។
ជាការពិតណាស់ ជាក់ស្ដែងភាពខ្វះចន្លោះខ្វះខាតមួយចំនួនក៏នៅកើតមានដែលតម្រូវឲ្យគ្រប់ផ្នែកពាក់ព័ន្ធរួមគ្នាបំពេញបន្ថែមដើម្បីឲ្យការគ្រោងទុកទទួលបានជោគជ័យ។ កិច្ចការដែលត្រូវធ្វើជាបន្ទាន់បន្ថែមទៀតនោះគឺការរៀបចំបំពាក់អំពូលភ្លើងបន្ថែមតាមបណ្ដោយផ្លូវបញ្ជាការដ្ឋានតំបន់ប្រតិបត្តិការសឹករងកំពតនិងមន្ទីរធនធានទឹក ។ ចំពោះស្លាកយីហោដែលតាំងគ្មានសណ្តាប់ធ្នាប់ត្រូវកាត់ចេញនិងកែសម្រួលតាមដងផ្លូវជាតិលេខ៣ ចំណុចផ្លូវវាងក្រុងទីរួមខេត្ត។ ការដកចេញនូវផ្ទាំងប៉ាន់ណូផ្សព្វផ្សាយផ្សេងៗរបស់ក្រុមហ៊ុនសហគ្រាសក៏ដូចជាហាងលក់ទំនិញនានាដែលលយចូលចំណីផ្លូវ។ ដោយឡែកនៅតាមបណ្ដោយផ្លូវបេតុងព្រះបាទអង្គឌួងចាប់ពីចំណុចរូបសំណាកត្រីផ្សោតដល់ផ្លូវជាតិលេខ៣៣ ត្រូវដាំដើមរំដួលនៅអមសងខាងផ្លូវដើម្បីភាពស្រស់ស្អាតយូរអង្វែង ។
លោកអភិបាលខេត្តក៏បានដាស់តឿនដល់អភិបាលក្រុង និងអាជ្ញាធរសង្កាត់ចុះក្រើនរំលឹកដល់ប្រជាពលរដ្ឋក៏ដូចជាអាជីវករទាំងអស់ថាឲ្យបន្តសហការកែលម្អសោភ័ណភាពបង្កើនអនាម័យបរិស្ថានតាមរយៈបញ្ឈប់ការហាលសម្លៀកបំពាក់ពីមុខលំនៅឋានដាក់ធុងសំរាមរប៉ាត់រប៉ាយនិងការដាក់តាំងភ្លើងពណ៌លំអជាដើម។
ពាក់ព័ន្ធនឹងបញ្ហាសណ្តាប់ធ្នាប់របៀបរៀបរយនេះដែរ លោកអភិបាលខេត្តបានបញ្ជាក់ថារឿងដែលមិនអាចអូសបន្លាយតទៅទៀតនោះគឺរដ្ឋបាលក្រុងត្រូវយកចិត្តទុកដាក់បញ្ហាសណ្តាប់ធ្នាប់ចំពោះក្រុមរថយន្តតាក់ស៊ី ដោយតម្រូវឲ្យចូលចតក្នុងចំណតដើមវិញដោយរដ្ឋបាលខេត្តបានរៀបចំទីលានចំណតបានស្អាត ហើយមិនអាចនាំគ្នាបន្តចតលើផ្លូវសាធារណៈដែលធ្វើឱ្យប៉ះពាល់ដល់អ្នកធ្វើដំណើរទាំងគ្មានសណ្ដាប់ធ្នាប់និងជាភាពបង្កគ្រោះថ្នាក់ដូចសព្វថ្ងៃនេះ ៕ (កែសម្រួលដោយ ៖ ធីតា)
ចែករំលែកព័តមាននេះ