ខេត្តស្វាយរៀង ៖ សេចក្តីរាយការណ៍បឋមបានឲ្យដឹងថា ភ្លើងអគ្គិភ័យបានឆាបឆេះហាងលក់គ្រឿងសម្ភារៈសំណង់មួយកន្លែង របស់ក្រុមហ៊ុនចុងគ័រហ្វ៊ហ័រ របស់ជនជាតិចិន កាលពីវេលាម៉ោង៨និង៣០នាទីយប់ ថ្ងៃទី១១ ខែធ្នូនេះ ស្ថិតនៅភូមិបាវិតលើ សង្កាត់បាវិត ក្រុងបាវិត ឆេះអស់ទាំងស្រុង ។
បើតាមសមត្ថកិច្ចកងរាជអាវុធហត្ថក្រុងបាវិតបានឲ្យដឹងថា ករណីអគ្គិភ័យឆាបឆេះហាងលក់សម្ភារៈគ្រឿងសំណង់របស់ជនជាតិចិននេះ មូលហេតុឆ្លងចរន្តអគ្គីសនី (ទុស្សេខ្សែភ្លើង) ដោយប្រើប្រាស់រថយន្តពន្លត់អគ្គិភ័យចំនួន០៣គ្រឿង ប្រើប្រាស់ទឹកអស់ចំនួន១១រថយន្ត ។
ប្រភពដដែលបន្តទៀតថា ក្រោយពីទទួលព័ត៌មានពីអាជ្ញាធរភ្លាមកម្លាំងកងរាជអាវុធហត្ថខេត្តដឹកនាំដោយលោកស្រី វរៈសេនីយ៍ទោនួន នីម មេបញ្ជាការរងខេត្ត និងកម្លាំងមូលដ្ឋានអាវុធហត្ថក្រុងបាវិតដឹកនាំដោយលោកវរសេនីយ៍ទោខាំណាន មេបញ្ជាការកងរាជអាវុធហត្ថក្រុងបាវិតសហការជាមួយកម្លាំងនគរបាលក្រុងបាវិតបានសហការគ្នាពន្លត់អគ្គិភ័យដោយប្រើប្រាស់រថយន្ថពន្លត់អគ្គិភ័យចំនួន០៣គ្រឿង ប្រើប្រាស់ទឹកអស់១១រថយន្ត ក្នុងនោះរថយន្តកងរាជអាវុធហត្ថខេត្តចំនួន០១គ្រឿង ប្រើទឹកអស់ចំនួន០៣រថយន្ត ។
រថយន្ថពន្លត់អគ្គិភ័យកងរាជអាវុធហត្ថក្រុងចំនួន០១គ្រឿង ប្រើទឹកអស់ចំនួន០៥រថយន្ត ។ រថយន្ថពន្លត់អគ្គិភ័យនគរបាលក្រុងចំនួន០១គ្រឿង ប្រើទឹកអស់ចំនួន០៣រថយន្ត ប្រើប្រាស់ពេលវេលាអស់ជិត២ម៉ោងទើបគ្រប់គ្រងបាន ក៏ប៉ុន្តែដោយហាងលក់គ្រឿងសម្ភារៈសំណង់ (ចុងគ័រហ្វ៊ូហ័រ) របស់ជនជាតិចិនសង់ពីសង្ក័សី និងសម្ភារៈគ្រឿងសំណង់មានគ្រឿងជ័រត្រូវភ្លើងឆាបឆេះខូចខាតទាំងស្រុង ហើយពុំមានមនុស្សរងគ្រោះទេ និងទប់ស្កាត់បានមិនអោយឆ្លងរាលដាលដល់លំនៅដ្ឋានអ្នកជិតខាងទេ ។ សមត្ថកិច្ចសូមសំណូមពរដល់បងប្អូនមានការប្រុងប្រយត្ន័ទាំងអស់គ្នា ៕
ចែករំលែកព័តមាននេះ