រាជធានីភ្នំពេញ ៖ កម្លាំងល្បាតរបស់សមត្ថកិច្ចខណ្ឌ៧មករាបានធ្វើការឃាត់ខ្លួនជនសង្ស័យចំនួន៣នាក់ ខណៈពួកគេចូលទៅទិញថ្នាំញៀនចំនួន២កញ្ចប់ដើម្បីយកទៅប្រើប្រាស់ ក៏ត្រូវសមត្ថកិច្ចប្រទះឃើញរួចឃាត់ខ្លួនយកទៅសួរនាំតែម្តង ។
ហេតុការណ៍ខាងលើនេះបានកើតឡើងកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី១១ ខែធ្នូ ឆ្នាំ២០១៩ នៅចំណុចសួនច្បារក្តាន់ពីរ តាមបណ្តោយផ្លូវសហព័ន្ធរុស្សី ស្ថិតក្នុងសង្កាត់មិត្តភាព ខណ្ឌ៧មករា ។
តាមប្រភពព័ត៌មានពីសមត្ថកិច្ចមូលដ្ឋានបានអោយដឹងថា មុនពេលកើតហេតុ កម្លាំងល្បាតរបស់អធិការដ្ឋាននគរបាលខណ្ឌ៧មករាបានធ្វើការល្បាតពួនស្ទាក់ដើម្បីទប់ស្កាត់នៅក្នុងមូលដ្ឋានដើម្បីកុំឱ្យមានបទល្មើសកើតឡើង ដូចជាលួចឆក់ប្លន់ជាដើម ស្រាប់តែប្រទះឃើញជនសង្ស័យទី១-ឈ្មោះសុខ សម្បត្តិ ភេទប្រុស អាយុជាង២០ឆ្នាំ មុខរបរនិងស្នាក់នៅមិនពិតប្រាកដ បានទិញថ្នាំញៀនយកទៅប្រើប្រាស់។
តាមប្រភពដដែលបានបន្តថា គ្រាន់តែឃើញសមត្ថកិច្ចភ្លាម ជនសង្ស័យម្នាក់ខាងលើនោះក៏ជិះកង់ដើម្បី គេចខ្លួនដែរ ប៉ុន្តែគេចមិនរួចក៏ត្រូវសមត្ថកិច្ចឃាត់ ហើយរកឃើញថ្នាំញៀនចំនួន១កញ្ចប់តូចមិនទាន់បានប៉ុន្មានផង ក៏ឃាត់ខ្លួនបានជនសង្ស័យចំនួន២នាក់ទៀតម្នាក់ ដោយម្នាក់ឈ្មោះចេង សាលាំង ភេទប្រុស អាយុ១៧ឆ្នាំ ស្នាក់នៅសង្កាត់មនោរម្យ ខណ្ឌ៧មករា នៅចំណុចមុខទីស្តីការ អត់មានថ្នាំញៀននោះទេ ប៉ុន្តែមានសារធាតុញៀនក្នុងខ្លួន រីឯម្នាក់ទៀតមិនស្គាល់អត្តសញ្ញាណនោះទេ ត្រូវសមត្ថកិច្ចឃាត់បាននៅចំណុចផ្លូវកម្ពុជាក្រោមក្បែរនឹងស្តុបណាជីង ហើយដកហូតបានថ្នាំមួយកញ្ចប់តូច ព្រមទាំងម៉ូតូមួយគ្រឿង ស៊េរីចាស់ អត់មានស្លាកលេខ ។ បន្ទាប់មកសមត្ថកិច្ចបានយកជនសង្ស័យទាំង៣នាក់ និងវត្ថុតាងទៅធ្វើការសួរនាំនៅប៉ុស្តិ៍មិត្តភាពដើម្បីកសាងសំណុំរឿង ។
ក្រោយពេលកើតហេតុ ជនសង្ស័យទាំង៣នាក់ត្រូវបានសមត្ថកិច្ចកសាងសំណុំរឿងបញ្ជូនខ្លួនទៅកាន់អធិការដ្ឋាននគរបាលខណ្ឌ៧មករាដើម្បីចាត់ការទៅតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ