រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា រោងចក្រផលិតទឹកកកដើម និងអនាម័យចំនួន២កន្លែងខាងជើង និងខាងត្បូងក្បែរកំពង់ដព្រែកលៀប កោះដាច់ កំពុងតែបង្កសំឡេងរំខាងដល់ប្រជាពលរដ្ឋជិតខាងដេកពួនមិនបាន ហើយប្រជាពលរដ្ឋ សំណូមពរ ដល់អាជ្ញាធរខណ្ឌជ្រោយចង្វារ ព្រមទាំងក្រសួងមន្ទីរជំនាញ មេត្តាចុះត្រួតពិនិត្យ ដើម្បីមានវិធានការ ។
ទីតាំងរោងចក្រដែលបង្កផលប៉ះពាល់នោះ១- យីហោ «សេង ចាន់ធី រោងចក្រផលិតទឹកកកដើមធុនតូច និងទឹកកកអនាម័យគ្រាប់តូច គ្រាប់ធំ នៅខាងជើងកំពង់ដព្រែកលៀប ក្នុងភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វារ និង២-រោងចក្រផលិតទឹកកកដើមលៀង ថន ស្ថិតនៅផ្ទះលេខ ១៤៦G ខាងត្បូងកំពង់ដ ក្នុងភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។
តាមប្រជាពលរដ្ឋដែលរស់នៅទល់មុខ និងជាប់របងរោងចក្រសេង ចាន់ធី បានឲ្យដឹងថា រោងចក្រនេះកំពុងតែបង្កឲ្យប៉ះពាល់ដល់បរិស្ថានយ៉ាងខ្លាំងរកពេលដេកពួនមិនបាននោះទេ ទាំងសំឡេងម៉ាស៊ីនបង្ក និងពេលទម្លាក់ទឹកកកលាន់ឮខ្លាំងៗ រួមជាមួយសំឡេងរថយន្តដឹកទឹកកកចេញចូល ។
ប្រជាពលរដ្ឋបានបន្តទៀត ទាំងយប់ទាំងថ្ងៃ រោងចក្រផលិតទឹកកកនេះបង្កឲ្យមានការរំខានដល់ការរស់នៅ ។ នៅពេលយប់សំឡេងម៉ាស៊ីនរញ្ជួយដី ហើយនៅពេលទៀបភ្លឺពេលដែលទឹកកកអនាម័យទម្លាក់ចេញធុងធ្លាក់មកលាន់ឮមិនអាចដេកបាន ។
ប្រជាពលរដ្ឋក៏បានសំណូមពរដល់អាជ្ញាធរ ខណ្ឌជ្រោយចង្វារក៏ដូចជា ក្រសួងមន្ទីរជំនាញមេត្តាចុះទៅត្រួតពិនិត្យ និងមានវិធានការទប់ស្កាត់ផងកុំទុកឲ្យរោងចក្រនេះមានផលប៉ះពាល់ដលអ្នកជិតខាង ។ ទីតាំងរោងចក្រនេះមិនគួរឲ្យមាននោះទេ ព្រោះតំបន់ជាតំបន់ប្រជាពលរដ្ឋច្រើនកុះករ ។
ជុំវិញការចោទប្រកាន់នេះលោក ប៊ុន ង៉ូវ ជាមេការក៏បានឲ្យកោះសន្តិភាពដឹងថា រោងចក្រ សេង ចាន់ធី នេះពិតជាបង្កសំឡេងខំខានបន្តិចមែន ហើយកន្លងមកធ្លាប់ត្រូវបានប្រជាពលរដ្ឋទៅប្រាប់ដែរ ។ មេការរូបនោះបានបន្តទៀតថា មុនម៉ាស៊ីនចាស់បានលាន់ឮសំឡេងរំខានដល់អ្នកជិតខាង ក្រោយមកបានប្តូរម៉ាស៊ីនថ្មី និងបានរៀបចំធ្វើជញ្ជាំងបាំងខ្ពស់ ហើយបានកាត់បន្ថយសំឡេងមិនសូវប៉ះពាល់នោះទេ ។ ម្យ៉ាងទៀតខែត្រជាក់នេះ រោងចក្រមិនបានបញ្ឆេះម៉ាស៊ីនពេលថ្ងៃនោះទេ ។
ចំណែកទឹកកកអនាម័យពេលទម្លាក់ក៏បានលាន់ឮសំឡេង បង្កការរំខានដល់ពេលទ្រាប់ទៅមិនសូវឮនោះទេ ។ ដោយឡែក ប្រជាពលរដ្ឋដែលរស់នៅជុំវិញរោងចក្រផលិតទឹកកកលៀង ថន បានឲ្យដឹងដូចគ្នាដែរថា រោងចក្រនេះបានបង្កសំឡេងរំខានដល់ពេលដេកពួន មិនបាននោះទេ ។ ប្រជាពលរដ្ឋបានសំណូមពរដល់ថៅកែរោងចក្រ មេត្តាបាំងឲ្យជិតកុំទុកឲ្យនៅវាលបង្ក សំឡេងប៉ះពាល់ដល់ការរស់នៅបែបនេះ ។
ម្ចាស់រោងចក្រផលិតទឹកកកលៀង ថន បាន ឲ្យដឹងថា រោងចក្ររបស់លោកមិនបង្ករំខាននោះទេ ដោយប្រជាពលរដ្ឋចេះតែថានោះទេ កន្លងមានក្រសួងមន្ទីរបានចុះទៅត្រួតពិនិត្យ និងបានដាក់ម៉ាស៊ីនវាស់ថា មិនអីទេ ៕ កែសម្រួលដោយ ៖ សុឃាក់
ចែករំលែកព័តមាននេះ