ខេត្តព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា មានករណីបំពានសេពសន្ថវៈលើក្មេងស្រីអាយុ១៦ឆ្នាំរហូត២លើក និងធ្វើបាបនាងដោយគំរាមកំហែង ហេតុការណ៍បានកើតឡើងកាលពីយប់ថ្ងៃទី៦ ខែធ្នូ ឆ្នាំ២០១៩ ស្ថិតនៅចំណុចអូរ២ សង្កាត់លេខ៤…
ខេត្តព្រះសីហនុ ៖ បើតាមសេចក្តីរាយការណ៍បឋមបានឱ្យដឹងថា មានករណីបំពានសេពសន្ថវៈលើក្មេងស្រីអាយុ១៦ឆ្នាំរហូត២លើក និងធ្វើបាបនាងដោយគំរាមកំហែង ហេតុការណ៍បានកើតឡើងកាលពីយប់ថ្ងៃទី៦ ខែធ្នូ ឆ្នាំ២០១៩ ស្ថិតនៅចំណុចអូរ២ សង្កាត់លេខ៤ ក្រុងព្រះសីហនុ។
សេចក្តីរាយការណ៍បន្តថា ជនសង្ស័យខាងលើ ឈ្មោះ សុភត្រា មុខរបរលក់ដូរ រស់នៅសង្កាត់លេខ៤ ក្រុងព្រះសីហនុ ចំណែកក្មេងស្រីរងគ្រោះអាយុ១៦ឆ្នាំ ស្រុកកំណើតខេត្តបាត់ដំបង មកនៅក្រុងព្រះសីហនុ ដើម្បីធ្វើការងារកាស៊ីណូ ។
បើតាមក្មេងស្រីរងគ្រោះបានប្រាប់ថា នាងស្គាល់ជនសង្ស័យតាមរយៈម្ដាយរបស់គេលក់ដូរ ហើយខ្លួនបានទៅទិញរបស់របរនៅទីនោះ ស្រាប់តែត្រូវជនសង្ស័យនេះ ចាប់អូសដៃចូលក្នុងផ្ទះ រួចសេពសន្ថវៈចំនួន២លើក កាលពីថ្ងៃទី៣ ខែធ្នូ ដោយគំរាមនាងមិនឲ្យបែកធ្លាយរឿងនេះឡើយ។ រហូតមកដល់យប់ថ្ងៃទី៦ ធ្នូ ស្រាប់តែជនសង្ស័យរូបនេះមកគំរាមឲ្យនាងឡើងជិះម៉ូតូយកទៅផ្ទះគេម្ដងទៀត នៅពេលនោះនាងក៏មានបំណងរត់ចេញតែ ប៉ុន្តែត្រូវបានជនសង្ស័យចាប់អូសចូលក្នុងផ្ទះគំរាម និងកាត់ខោអាវលើខ្លួនរបស់នាងអស់ រួចវាយនាងឲ្យរងរបួសពេញខ្លួន។
ក្មេងស្រីជាជនរងគ្រោះបន្តថា នាងក៏បានស្រែកហៅឲ្យគេជួយ ប៉ុន្តែនៅទីនោះមានតែម្ដាយរបស់ជនសង្ស័យនេះមិនបានជួយនោះទេ ផ្ទុយទៅវិញគាត់ថែមទាំងទាញទ្វារបិទមិនឲ្យនាងរត់ចេញទៀតផង ។ ពេលនោះត្រូវបានមិត្តភ័ក្ដិរបស់នាងជួយប្ដឹងសមត្ថកិច្ច ក្រោយមកសមត្ថកិច្ចបានចុះឃាត់ខ្លួនជនសង្ស័យរូបនោះតែម្ដង ។
ចំណែកឯម្ដាយរបស់ជនរងគ្រោះបានប្រាប់ថា នៅពេលដែលឮថា កូនស្រីរបស់គាត់ត្រូវជួបរឿងបែបនេះ គាត់មានការភិតភ័យខ្លាំងណាស់ និងបានមកជួបកូនស្រីឃើញមានស្នាមរបួសពេញខ្លួន ហើយគាត់ក៏នាំកូនទៅមន្ទីរពេទ្យបង្អែកខេត្តដើម្បីព្យាបាល។ គាត់បានសំណូមពរទៅដល់សមត្ថកិច្ចឲ្យជួយរកយុត្តិធម៌ជូនកូនស្រីគាត់ផង កូនស្រីគាត់ទើបតែ អាយុ១៦ឆ្នាំទេ ។
ពាក់ព័ន្ធនឹងបញ្ហាខាងលើនេះ លោក ភុល ភស្ដា អធិការនគរបាលក្រុងព្រះសីហនុ បានប្រាប់តាមទូរស័ព្ទថា លោកបានចុះទៅឃាត់ខ្លួនជនសង្ស័យម្នាក់មែន ប៉ុន្តែលោកមិនបានទទួលពាក្យបណ្ដឹងថា មានករណីបំពានសេពសន្ថវៈនោះទេ គឺលោកបានទទួលតែពាក្យបណ្ដឹងថា ជាករណីប្រើអំពើហិង្សាតែប៉ុណ្ណោះ ។ (កែសម្រួលដោយ ៖ បុប្ផា)
ចែករំលែកព័តមាននេះ