ខេត្តឧត្តរមានជ័យ ៖ ក្រុមអាជ្ញាធរថៃបានធ្វើការដោះលែងអ្នកទោសខ្មែរចំនួន២នាក់ឱ្យមានសេរីភាពវិញ និងនាំយកមកប្រគល់ឱ្យក្រុមអាជ្ញាធរកម្ពុជាតាមមាត់ច្រកទ្វារអន្តរជាតិជាំ (ថៃហៅថាឆងសាងាំ) ស្ថិតនៅក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យកាលពីវេលាម៉ោង៣និង៣០នាទីរសៀលថ្ងៃទី៧ ធ្នូ…
ខេត្តឧត្តរមានជ័យ ៖ ក្រុមអាជ្ញាធរថៃបានធ្វើការដោះលែងអ្នកទោសខ្មែរចំនួន២នាក់ឱ្យមានសេរីភាពវិញ និងនាំយកមកប្រគល់ឱ្យក្រុមអាជ្ញាធរកម្ពុជាតាមមាត់ច្រកទ្វារអន្តរជាតិជាំ (ថៃហៅថាឆងសាងាំ) ស្ថិតនៅក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យកាលពីវេលាម៉ោង៣និង៣០នាទីរសៀលថ្ងៃទី៧ ធ្នូ ឆ្នាំ២០១៩។
អ្នកទោសទាំង២នាក់ដែលក្រុមអាជ្ញាធរថៃដោះលែង ក្នុងនោះម្នាក់ឈ្មោះហ៊ន ចាន់វិចិត្រ ភេទប្រុស អាយុ៣០ឆ្នាំ រស់នៅភូមិត្រយ៉ង់ ឃុំត្រយ៉ង់ ស្រុកគូលែន ខេត្តព្រះវិហារ និងម្នាក់ទៀតឈ្មោះយឹម សុខណៃ ភេទប្រុស អាយុ២៨ឆ្នាំ រស់នៅភូមិចំការចេក ឃុំស្លែងស្ពាន ស្រុកស្រីស្នំ ខេត្តសៀមរាប។ អ្នកទាំងពីរចូលតាមច្រកទឹកជប់ ត្រូវក្រុមអាជ្ញាធរថៃចាប់ខ្លួនកាលពីថ្ងៃទី១៨ កញ្ញា ឆ្នាំ២០១៨ ហើយជាប់ពន្ធនាគារនៅស្រុកខាន់តាឡាក់ ខេត្តស៊ីសាកេត ប្រទេសថៃ ពីបទឆ្លងដែនកាប់ឈើគ្រញូងនៅក្នុងទឹកដីថៃ។
ក្រុមអាជ្ញាធរកម្ពុជាដែលបម្រើការងារនៅមាត់ច្រកទ្វារអន្តរជាតិជាំបានឱ្យដឹងថា អ្នកទោសខ្មែរ២នាក់ក្រុមអាជ្ញាធរថៃដោះលែងនាំយកមកប្រគល់ឱ្យ អាជ្ញាធរកម្ពុជាបានធ្វើការអប់រំ ឱ្យវិលត្រឡប់ទៅលំនៅឋានវិញក្នុងថ្ងៃដដែល។
គួរំលឹកផងដែរថា កាលពីថ្ងៃទី៣ ធ្នូ ឆ្នាំ២០១៩ ស្ត្រីម្នាក់ត្រូវបានក្រុមអាជ្ញាធរថៃចាប់បញ្ជូនខ្លួនយកមកប្រគល់ឱ្យវិញផងដែរ ពីបទឆ្លងដែនចូលទៅរកការងារធ្វើនៅប្រទេសថៃ៕ (កែសម្រួលដោយ ៖ ធីតា)
ចែករំលែកព័តមាននេះ