ខេត្តកំពង់ឆ្នាំង ៖ កសិកររស់នៅភូមិកោះក្របី សង្កាត់កំពង់ឆ្នាំង ក្រុងកំពង់ឆ្នាំង បានត្អូញត្អែរគ្រប់ៗគ្នាថា ឆ្នាំនេះបន្លែស្ពៃរបស់ពួកគាត់ថោកហួសកម្រិត មិនអាចទទួលយកបានឡើយ ។ ពួកគាត់សំណូមពរដល់មន្ទីរជំនាញក៏ដូចជា…
ខេត្តកំពង់ឆ្នាំង ៖ កសិកររស់នៅភូមិកោះក្របី សង្កាត់កំពង់ឆ្នាំង ក្រុងកំពង់ឆ្នាំង បានត្អូញត្អែរគ្រប់ៗគ្នាថា ឆ្នាំនេះបន្លែស្ពៃរបស់ពួកគាត់ថោកហួសកម្រិត មិនអាចទទួលយកបានឡើយ ។ ពួកគាត់សំណូមពរដល់មន្ទីរជំនាញក៏ដូចជា ក្រសួងពាក់ព័ន្ធ សូមមេត្តាជួយពួកគាត់ផង ខណៈពេលដែលស្ពៃក្រញាញ់របស់ពួកគាត់មួយគីឡូក្រាមត្រឹមតែ ៤០០ រៀលតែប៉ុណ្ណោះ ខុសពីឆ្នាំកន្លងទៅអាច១៥០០ ទៅ ២៥០០ ក្នុង១គីឡូក្រាម ។
ប្រជាកសិកររស់នៅ និងធ្វើចម្ការនៅភូមិឃុំខាងលើបានបញ្ជាក់ថា ពួកគាត់បានចំណាយដើមទុនកម្លាំងពលកម្ម រួមទាំងការជួលគេកាត់ស្ពៃទៀតចំណាយអស់ថវិកាជាច្រើនណាស់ ។ ប៉ុន្តែលទ្ធផលថោកខ្លាំងណាស់ គឺស្ពៃ១គីឡូក្រាមត្រឹម៤០០រៀលតែប៉ុណ្ណោះ ។ ពួកគាត់យំលែងចេញនៅពេលដែលបន្លែរបស់ពួកគាត់ថោកដល់ថ្នាក់នេះ បើប្រៀបធៀបស្ពៃ១គីឡូក្រាមមិនស្មើថ្លៃប៊ីចេង១កញ្ចប់តូច ថ្លៃ៥០០រៀលផង ។
បងស្រីម្នាក់បានរៀបរាប់ថា គាត់បានចំណាយដើមទុន២លានរៀល សម្រាប់ដាំបន្លែស្ពៃ ក្រញាញ់ឆ្នាំនេះ ។ ប៉ុន្តែគាត់ទទួលផលមកវិញបានត្រឹមតែ៤០ម៉ឺនប៉ុណ្ណោះពេលស្ពៃគាត់កាត់បានទម្ងន់១តោន ។ បើគិតគ្រាន់តែឈ្នូលកាត់ស្ពៃមនុស្ស៥នាក់ ក្នុងម្នាក់២៥០០០រៀល ក្នុង១ថ្ងៃដែលគាត់កាត់ស្ពៃបាន១តោនត្រូវចំណាយលើឈ្នួលអស់១២៥ ០០០រៀល ទៅហើយ ។ នេះនៅមិនទាន់គិតថ្លៃទិញប្រេងចាក់ម៉ាស៊ីនស្រោចទឹក ថ្លៃថ្នាំសម្លាប់សត្វល្អិត និងថ្លៃជីផង ។
ចំណែកបងស្រីម្នាក់ទៀតក៏បានបញ្ជាក់ដែរថា កាលពីឆ្នាំកន្លងទៅតម្លៃស្ពៃមានហាងឆេងដល់ ២៥០០រៀល បើថោកណាស់ក៏ត្រឹម១៥០០រៀលដែរ ។ ប៉ុន្តែឆ្នាំនេះពេលប្រមូលផលបានពីដើមដៃបានថ្លៃ៨០០រៀល ប៉ុន្តែបានត្រឹមតែមួយថ្ងៃ បន្ទាប់មកក៏ធ្លាក់នៅ៤០០រៀលរហូតតែម្ដង ។ តម្លៃថោកបែបនេះហើយឈ្មួញនៅរើសចេញស្ពៃ ដើមតូច និងខូចខាតបន្តិចថែមទៀត ក្នុងស្ពៃ ១តោនដកចេញអស់៥០ទៅ៦០គីឡូក្រាមទៀត ដោយគេយកតែដើមស្បៃធំល្អៗតែប៉ុណ្ណោះ ។
ប្រជាកសិករបានសំណូមពរជាថ្មីដល់អាជ្ញាធរ មន្ទីរជំនាញ និងក្រសួងពាក់ព័ន្ធ សូមមេត្តាជួយឲ្យបន្លែរបស់ពួកគាត់មានទីផ្សារបានខ្ពស់ ។
សូមបញ្ជាក់ដែរថា ប្រជាពលរដ្ឋនៅភូមិកោះក្របី សង្កាត់ផ្សារឆ្នាំង ក្រុងកំពង់ឆ្នាំង ក្រៅពីការងារស្រែចម្ការ គឺបានដាំដំណាំស្ពៃជារៀងរាល់ឆ្នាំ ហើយមានឈ្មួញមកទិញពីរាជធានីភ្នំពេញដឹកទាំងរថយន្ត ។ ប៉ុន្តែតម្លៃ គឺស្ថិតនៅលើឈ្មួញទិញតែប៉ុណ្ណោះពេលខ្លះក៏បានថ្លៃពេលខ្លះគាត់ថោកហួសហេតុ ៕ កែសម្រួលដោយ ៖ សុឃាក់
ចែករំលែកព័តមាននេះ