រាជធានីភ្នំពេញ ៖ យានដ្ឋានជួសជុលរថយន្តមួយកន្លែងត្រូវបានអគ្គីភ័យឆាបឆេះបង្កការផ្អើលកាលពីវេលាម៉ោង១០យប់ថ្ងៃទី៤ ខែធ្នូ ឆ្នាំ២០១៩ តាមបណ្តោយផ្លូវ២០១១ ស្ថិតក្នុងភូមិតាងួន១ សង្កាត់កាកាបទី១ ខណ្ឌពោធិ៍សែនជ័យ ។…
រាជធានីភ្នំពេញ ៖ យានដ្ឋានជួសជុលរថយន្តមួយកន្លែងត្រូវបានអគ្គីភ័យឆាបឆេះបង្កការផ្អើលកាលពីវេលាម៉ោង១០យប់ថ្ងៃទី៤ ខែធ្នូ ឆ្នាំ២០១៩ តាមបណ្តោយផ្លូវ២០១១ ស្ថិតក្នុងភូមិតាងួន១ សង្កាត់កាកាបទី១ ខណ្ឌពោធិ៍សែនជ័យ ។
តាមប្រភពព័ត៌មានពីបុរសម្នាក់ឈ្មោះ ម៉ៅ វីឡូញ អាយុ២៣ឆ្នាំ មុខរបរជាជាងជួសជុលរថយន្ត ស្នាក់នៅកន្លែងកើតហេតុ បានឲ្យដឹងថា មុនពេលកើតហេតុ នៅពេលល្ងាចបន្ទាប់ពីផុតម៉ោងធ្វើការ ពួកគាត់បាននាំគ្នាផឹកស៊ីនៅក្នុងយានដ្ឋានកើតហេតុខាងរហូតស្រវឹង ហើយគាត់បានចូលទៅដេកមុនគេ។
តាមប្រភពដដែលបានបន្តថា បន្ទាប់មកម្ចាស់យានដ្ឋានជួសជុលរថយន្ត ព្រមទាំងបុគ្គលិកផ្សេងៗទៀតនាំគ្នាចែកផ្លូវគ្នារៀងៗខ្លួនអស់ នៅសល់តែគាត់ដេកយាមនៅកន្លែងកើតហេតុតែម្នាក់ឯង ខណៈពេលកំពុងតែដេកលង់លក់ដោយសារស្រវឹងផងនោះ លុះពេលដឹងខ្លួនឡើង ស្រាប់តែមានភ្លើងឆាបឆេះដល់ពូករបស់គាត់កំពុងតែដេកទៅហើយ ធ្វើឱ្យគាត់ស្ទុះក្រោកឡើងស្រែកឆោឡោអោយគេឯងជួយ។ ភ្លាមៗនោះបង្កការភ្ញាក់ផ្អើលដល់ប្រជាពលរដ្ឋនាំគ្នាទាក់ទងទៅកំលាំងនគរបាលប៉ុស្តិ៍ និងរថយន្តពន្លត់អគ្គីភ័យចុះមកអន្តរាគមន៍នៅកន្លែងកើតហេតុភ្លាមផងដែរ។
ក្នុងហេតុការណ៍ខាងលើនេះ មានរថយន្តពន្លត់អគ្គីភ័យមកបាញ់ពន្លត់អស់ចំនួន២គ្រឿង គឺរថយន្តពន្លត់អគ្គីភ័យរបស់ខណ្ឌពោធិ៍សែនជ័យ និងរថយន្តពន្លត់អគ្គីភ័យរបស់ខណ្ឌសែនសុខបានចុះមកជួយអន្តរាគមន៍បាញ់ទឹកពន្លត់ភ្លាមៗផងដែរ ។
ក្រោយពីរថយន្តពន្លត់អគ្គីភ័យបាញ់ទឹកពន្លត់រួច កំលាំងនគរបាលប៉ុស្តិ៍ និងម្ចាស់យានដ្ឋាន ចូលទៅពិនិត្យឃើញថា ពុំមានការរងការខូចខាតធ្ងន់ធ្ងរនោះទេ គ្រាន់តែឆេះគ្រែពូក និងគ្រឿងបន្លាស់រថយន្តមួយចំនួន ព្រមទាំងឆេះខូចខាតរថយន្តដែលយកទៅជួសជុលអស់មួយគ្រឿងផងដែរ តែមិនមានគ្រោះថ្នាក់ដល់មនុស្សទេ ។ ពាក់ព័ន្ធនឹងករណីនេះ គេមិនដឹងថាផ្តើមចេញពីមូលហេតុអ្វីនៅឡើយទេ ៕ (កែសម្រួលដោយ ៖ ធីតា)
ចែករំលែកព័តមាននេះ