ខេត្តស្ទឹងត្រែង ៖ សាលាខេត្តស្ទឹងត្រែងបានរៀបចំពិធីប្រកាសចូលកាន់មុខតំណែងជាអភិបាលរងនៃគណៈអភិបាលខេត្តស្ទឹងត្រែងមួយរូប កាលពីថ្ងៃទី៣ ធ្នូ ឆ្នាំ២០១៩ ក្រោមអធិបតីភាពលោក លេង វី រដ្ឋលេខាធិការក្រសួងមហាផ្ទៃតំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
ក្នុងពិធីខាងលើនេះដែរ ក៏មានការ អញ្ជើញចូលរួមផងដែរពីរដ្ឋលេខាធិការ អនុរដ្ឋលេខាធិការអគ្គនាយក អគ្គនាយករង លោក ឈាង ឡាក់ ប្រធានក្រុមប្រឹក្សាខេត្ត លោក ម៉ុម សារឿន អភិបាលខេត្តនៃគណៈអភិបាលខេត្ត ព្រមទាំងសមាជិកក្រុមប្រឹក្សាខេត្ត មន្ទីរ អង្គភាពពាក់ព័ន្ធជុំវិញខេត្ត កងកម្លាំងប្រដាប់អាវុធទាំងបីប្រភេទ អភិបាលក្រុង ស្រុក ព្រមទាំងលោកមេឃុំ ចៅ សង្កាត់ជាច្រើនរូបទៀត ។
សារលិខិតរបស់រាជរដ្ឋាភិបាលកម្ពុជាបានចេញអនុក្រិតលេខ ១២ ១៥ អនក្រ.តត ស្តីពីការតែងតាំងមន្ត្រីរាជការ ដោយបានសម្រេចតែងតាំងលោក ស៊ី សួន មានឋានន្តរស័ក្កិឧត្តមមន្ត្រីថ្នាក់លេខ៤ ឲ្យចូលកាន់មុខតំណែងជាអភិបាលរង នៃគណៈអភិបាលខេត្តស្ទឹង ត្រែងដើម្បីបន្តរួមការអភិវឌ្ឍន៍បម្រើប្រទេសជាតិ។
លោក ស៊ី សួន អភិបាលរងនៃគណៈអភិបាលខេត្តដែលទើបទទួលការតែងតាំងថ្មីបានឡើងប្តេជ្ញាចិត្តក្រោយរាជរដ្ឋាភិបាលផ្តល់សេ ចក្តីទុកចិត្តតែងតាំងជាអភិបាលរងខេត្តស្ទឹងត្រែង លោកនឹងខិតខំបម្រើការងារទាំងក្នុងរដ្ឋបាលខេត្តនិងប្រជាពលរដ្ឋឲ្យបានល្អប្រសើរបន្ថែមទៀត ព្រមទាំងពង្រឹងសាម គ្គីភាពផ្ទៃក្នុង គោរពរដ្ឋធម្មនុញ លិខិតបទដ្ឋានគតិយុទ្ធនានា យកប្រយោជន៍ជាតិជាធំ ចូលរួមថែរក្សាការពារអធិបតេយ្យភាពបូរណ ភាពទឹកដី ការពារសន្តិភាព ស្ថេរភាពនយោបាយ សណ្តាប់ធ្នាប់សាធារណៈ និងយកចិត្តទុកដាក់អនុវត្តន៍នូវកម្មវិធីនយោបាយយុទ្ធ សាស្ត្រចតុកោណរបស់រាជរដ្ឋាភិ បាលកម្ពុជាឲ្យបានខ្ជាប់ខ្ជួន។
លោក លេង វី រដ្ឋលេខាធិការ ក្រសួងមហាផ្ទៃ បានមានប្រសាសន៍ថា ដើម្បីបំពេញជួរថ្នាក់ដឹកនាំរដ្ឋបាលខេត្ត និងយោងតាមការចាំបាច់របស់រដ្ឋបាលខេត្ត ក្រសួងមហាផ្ទៃបានផ្តល់សេចក្តីទុកចិត្តតែងតាំងលោក ស៊ី សួន អតីតអភិបាលស្រុកសៀមប៉ាង ឲ្យទទួលមុខ តំណែងជាអភិបាលរងខេត្តនៃគណៈអភិបាលខេត្តស្ទឹងត្រែង។ លោកបន្តថាការតែងតាំងនេះក៏យោងទៅតាមសមត្ថភាពការងារ និងមានបទពិសោធន៍យ៉ាងច្រើនក្នុងការបំពេញការងារនៅមូលដ្ឋាន ពិសេសលោក ស៊ី សួន ធ្លាប់ជាអភិបាលស្រុកសៀមប៉ាងមុននិងទទួលតំណែងការងារថ្មីជាអភិបា លរងខេត្ត។
លោករដ្ឋលេខាធិការ ក្រសួងមហាផ្ទៃបានណែនាំដល់អភិបាលរងខេត្តថ្មី ត្រូវខិតខំប្រឹង ប្រែងអនុវត្តតួនាទីភារកិច្ចរបស់ខ្លួនតាមរយៈចំណេះដឹងសមត្ថភាពនិងបទពិសោធន៍ការងាររបស់ខ្លួន ពិសេសអនុវត្តន៍ឲ្យបានត្រឹមត្រូវនិងខ្ជាប់ខ្ជួនតាមការប្តេជ្ញាចិត្ត។ មិនតែប៉ុណ្ណោះ អភិបាលរងខេត្តថ្មីត្រូវបន្តចូលរួមដឹកនាំគាំទ្រ អភិវឌ្ឍន៍រដ្ឋបាលខេត្តស្ទឹងត្រែង ឲ្យកាន់ តែមានភាពរីកចម្រើន និងទទួលបានសមិទ្ធិផលថ្មីៗបន្ថែមទៀត ព្រមទាំងចូលរួមក្នុងការការពារសុខសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ