ខេត្តបន្ទាយមានជ័យ៖ ទឹកជំនន់លិចលង់ស្រុក-ក្រុងចំនួន៩ ប៉ះពាល់ប្រជាពលរដ្ឋជិត២ម៉ឺនគ្រួសារ និងបង្កការខូចខាតដំណាំជាច្រើនហិកតា
- បន្ទាយមានជ័យ
ខេត្តបន្ទាយមានជ័យ ៖ យោងតាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យ នៅថ្ងៃទី០៨ ខែតុលា ឆ្នាំ២០២៦ បានបង្ហាញថា ទឹកជំនន់បានបង្កផលប៉ះពាល់យ៉ាងខ្លាំងដល់ស្រុក និងក្រុងចំនួន៩ ក្នុងខេត្តបន្ទាយមានជ័យ ។
តំបន់រងគ្រោះមានចំនួន៤៥ឃុំ/សង្កាត់ ស្មើនឹង៣២៣ភូមិ ។ គ្រួសាររងផលប៉ះពាល់៖ ១៩.១៩៣គ្រួសារ (ស្មើនឹងសមាជិកសរុប៨២.៨១៤នាក់) ។ ពលរដ្ឋរងគ្រោះធ្ងន់ធ្ងរដែលត្រូវបានជម្លៀសមកកាន់ទីទួលសុវត្ថិភាពមានចំនួន២.២១៩គ្រួសារ (ស្មើនឹង ៨.៥៩៤នាក់ ក្នុងនោះស្រី ៤.៣៤៣នាក់ និងកុមារ ២.២៩៦នាក់)។ ការខូចខាតដំណាំកសិកម្ម ៖ ស្រូវប៉ះពាល់ចំនួន៣៤.១០១ហិកតា (ខូចខាតចំនួន ១.៦១៤ហិកតា) ។ ដំឡូងមីប៉ះពាល់ ២៤៨ហិកតា និងដំណាំរួមផ្សំ៤៨ហិកតា ។ សត្វពាហនៈរងផលប៉ះពាល់ចំនួន ៥៤៣ក្បាល។ សាលារៀនចំនួន៦៥ខ្នង ។ វត្តអារាមចំនួន ២២កន្លែង ។ មណ្ឌលសុខភាពចំនួន ៨កន្លែង។ ផ្លូវលិច និងច្រោះដាច់ចំនួន ៧០៤ខ្សែ (ប្រវែងសរុប ៤៤៨.០១៥ម៉ែត្រ)។
យោងតាមរបាយការណ៍របស់មន្ទីរធនធានទឹក និងឧតុនិយមខេត្តបន្ទាយមានជ័យ នៅថ្ងៃដដែលនោះ មានស្រុក/ក្រុងចំនួន៣ ដែលកម្ពស់ទឹកបានឡើងលើសកម្រិតប្រកាសអាសន្ន រួមមាន៖ អាងត្រពាំងថ្ម (ស្រុកភ្នំស្រុក)៖ កម្ពស់ទឹក៣.៧៣ម៉ែត្រ ។ ស្ទឹងស្ពានស្រែង (ស្រុកភ្នំស្រុក)៖ កម្ពស់ទឹក ៧.០៦ម៉ែត្រ។ ស្ទឹងសិរីសោភ័ណ៖ កម្ពស់ទឹក ៧.៨៥ម៉ែត្រ ។
ចែករំលែកព័តមាននេះ